തിരുവനന്തപുരം: കഴക്കൂട്ടത്ത് വീട്ടുമുറ്റത്ത് നിർത്തിയിട്ടിരുന്ന ബൈക്ക് മോഷ്ടിച്ച മൂന്ന് കൗമാരക്കാർ പോലീസിന്റെ പിടിയിൽ (Kazhakkoottam Bike Theft). പോത്തൻകോട് സ്വദേശികളായ 16 വയസ്സുകാരനും രണ്ട് 17 വയസ്സുകാരുമാണ് പിടിയിലായത്. കഴക്കൂട്ടം മഹാദേവ ക്ഷേത്രത്തിന് സമീപം ശിവനഗറിലെ അനിലിന്റെ വീട്ടിൽ നിന്നാണ് സംഘം ബൈക്ക് കവർന്നത്.
കഴിഞ്ഞ രണ്ട് ദിവസം മുമ്പാണ് സംഭവം നടന്നത്. ഹെൽമറ്റ് ധരിച്ചെത്തിയ സംഘം വീടിന് മുന്നിൽ ബൈക്ക് നിർത്തിയ ശേഷം ഒരാൾ അകത്ത് കടന്ന് ബൈക്കുമായി കടന്നുകളയുകയായിരുന്നു. സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് പ്രതികൾ കുടുങ്ങിയത്. ചന്തവിള റോഡ് വഴി രക്ഷപ്പെട്ട ഇവരെ ദൃശ്യങ്ങളുടെ അടിസ്ഥാനത്തിൽ പോലീസ് പിന്തുടർന്നു.
പിടിക്കപ്പെടാതിരിക്കാൻ ബൈക്കിന്റെ സ്റ്റിക്കറുകൾ മാറ്റുകയും പല ഭാഗങ്ങളും ഊരിമാറ്റി രൂപമാറ്റം വരുത്തുകയും ചെയ്തിരുന്നു. രൂപമാറ്റം വരുത്തിയ നിലയിൽ ബൈക്ക് പോലീസ് കണ്ടെടുത്തു. കസ്റ്റഡിയിലെടുത്ത കൗമാരക്കാരെ നിലവിൽ ജുവനൈൽ ഹോമിലേക്ക് മാറ്റിയിരിക്കുകയാണ്. ഇവരെ സ്റ്റേഷനിലെത്തിച്ച് കൂടുതൽ തെളിവെടുപ്പ് നടത്തുമെന്ന് കഴക്കൂട്ടം പോലീസ് അറിയിച്ചു.
Summary: Three teenagers from Pothencode were arrested for stealing a bike from a house in Kazhakkoottam. Although they modified the bike’s appearance and removed stickers to avoid detection, they were caught using CCTV footage.
