ഏഡൻ: പശ്ചിമേഷ്യൻ യുദ്ധം വീണ്ടും ശക്തമാകുന്നതിനിടെ, ചെങ്കടലിലൂടെയുള്ള ഇസ്രായേൽ കപ്പലുകളുടെ ഗതാഗതത്തിന് പൂർണ്ണ നിരോധനം ഏർപ്പെടുത്തി യെമനിലെ ഇറാനുമായി സഖ്യമുള്ള ഹൂത്തി വിമതർ (Yemen Houthi Rebels Israel Shipping Ban). തിങ്കളാഴ്ച പുറത്തിറക്കിയ ഔദ്യോഗിക പ്രസ്താവനയിലൂടെയാണ് ഹൂതി സായുധ സേന ചെങ്കടലിൽ ഇസ്രായേലുമായി ബന്ധമുള്ള എല്ലാ വാണിജ്യ കപ്പലുകൾക്കും ഉപരോധം പ്രഖ്യാപിച്ചതും തങ്ങളുടെ നീക്കങ്ങൾ ലംഘിക്കുന്നവ സൈനിക ലക്ഷ്യങ്ങളായി കണക്കാക്കുമെന്ന മുന്നറിയിപ്പ് നൽകിയതും. ഇതോടൊപ്പം ഇസ്രായേലിന് നേരെ തങ്ങൾ പുതിയ മിസൈൽ ആക്രമണം നടത്തിയതായും വരും ദിവസങ്ങളിൽ കൂടുതൽ ശക്തമായ സൈനിക നടപടികൾ ഉണ്ടാകുമെന്നും ഹൂതികൾ വ്യക്തമാക്കി. ഇസ്രായേൽ പ്രദേശത്തേക്ക് വന്ന മിസൈൽ വ്യോമ പ്രതിരോധ സംവിധാനം ഉപയോഗിച്ച് തകർത്തതായി ഇസ്രായേൽ സൈന്യവും സ്ഥിരീകരിച്ചിട്ടുണ്ട്.
ഇറാൻ-ഇസ്രായേൽ യുദ്ധത്തിന്റെ ഭാഗമായി കഴിഞ്ഞ മൂന്ന് മാസത്തിലേറെയായി ഹോർമുസ് കടലിടുക്ക് അടഞ്ഞുകിടക്കുന്ന പശ്ചാത്തലത്തിൽ, ചെങ്കടലിലെ പുതിയ ഹൂതി ഭീഷണി ആഗോള ഊർജ്ജ വിപണിയെയും ചരക്കുനീക്കത്തെയും കടുത്ത പ്രതിസന്ധിയിലാക്കും. ഹോർമുസ് കടലിടുക്ക് അടച്ചതോടെ ഗൾഫ് രാജ്യങ്ങളിൽ നിന്നുള്ള എണ്ണ കയറ്റുമതിക്കായി പൈപ്പ് ലൈനുകൾ വഴി സൗദി അറേബ്യയുടെ ചെങ്കടൽ തീരത്തെ യാൻബു ടെർമിനലിലേക്ക് എത്തിച്ചാണ് നിലവിൽ അന്താരാഷ്ട്ര വിപണിയിലേക്ക് എത്തിക്കുന്നത്. പുതിയ സാഹചര്യത്തിൽ ചെങ്കടൽ കൂടി അസ്ഥിരപ്പെടുന്നത് ആഗോള എണ്ണവില കുതിച്ചുയരാൻ കാരണമാകും.
മുൻപ് 2023 മുതൽ 2025 വരെയുള്ള ഗാസ യുദ്ധകാലത്ത് ഹൂതികൾ നടത്തിയ തുടർച്ചയായ ആക്രമണങ്ങളെ തുടർന്ന് മെർസ്ക് , ഹാപാഗ്-ലോയ്ഡ് തുടങ്ങിയ വൻകിട ഷിപ്പിംഗ് കമ്പനികൾ ചെങ്കടൽ പാത ഉപേക്ഷിച്ച് ആഫ്രിക്കൻ ഭൂഖണ്ഡം ചുറ്റിയുള്ള ദൈർഘ്യമേറിയതും ചെലവേറിയതുമായ പാതയാണ് തിരഞ്ഞെടുത്തത്. നിലവിലെ പുതിയ ഉപരോധ പ്രഖ്യാപനം ഇസ്രായേൽ കപ്പലുകളെ ലക്ഷ്യമിട്ടാണെന്ന് ബ്രിട്ടീഷ് മാരിടൈം ഏജൻസിയായ വാൻഗാർഡ് വ്യക്തമാക്കുന്നുണ്ടെങ്കിലും, മുൻകാലങ്ങളിൽ ഹൂതികൾ മറ്റ് രാജ്യങ്ങളുടെ കപ്പലുകൾക്ക് നേരെയും ആക്രമണം നടത്തിയിട്ടുള്ളതിനാൽ ചെങ്കടൽ വഴിയുള്ള സർവീസുകൾ വലിയ സുരക്ഷാ ഭീഷണിയാണ് ഉയർത്തുന്നത്.
Summary: Yemen’s Iran-aligned Houthi rebels have declared a complete and total ban on Israeli maritime navigation in the Red Sea, threatening significant disruptions to global trade and energy markets. Simultaneously, the group launched a missile barrage targeting Israel on Monday, which was intercepted by Israeli air defense systems. This escalation comes amid a broader regional conflict where Iran has blocked the vital Strait of Hormuz for over three months, making the Red Sea a crucial alternative pipeline route for Middle East oil.
