വാഷിങ്ടൺ: അതീവ അപകടകാരിയായ നിർജ്ജീവമാക്കിയ എംപോക്സ് (Mpox) വൈറസ് അടങ്ങിയ കുപ്പികൾ ഔദ്യോഗിക അനുമതിയില്ലാതെ ആഫ്രിക്കയിൽ നിന്നും അമേരിക്കയിലേക്ക് രഹസ്യമായി കടത്തിയ സംഭവത്തിൽ രണ്ട് പ്രമുഖ ശാസ്ത്രജ്ഞർക്കെതിരെ കേസ് (US scientists booked FBI Mpox virus smuggling). യു.എസ് ഗവൺമെന്റിന്റെ കീഴിലുള്ള പ്രശസ്തമായ റിസർച്ച് ലാബിലെ ശാസ്ത്രജ്ഞർക്കെതിരെയാണ് ഫെഡറൽ കോടതിയിൽ കേസെടുത്തിരിക്കുന്നത്. മൊണ്ടാനയിലുള്ള റോക്കി മൗണ്ടൻ ലബോറട്ടറികളിലെ (Rocky Mountain Laboratories) വൈറസ് ഇക്കോളജി വിഭാഗം മേധാവി വിൻസെന്റ് മുൻസ്റ്റർ, അദ്ദേഹത്തിന്റെ സഹപ്രവർത്തകനായ ക്ലോഡ് ക്യൂ എന്നിവരാണ് കേസിൽ പ്രതികളായ ശാസ്ത്രജ്ഞർ.
ഫ്രാൻസിലെ പാരീസ്, ആഫ്രിക്കൻ രാജ്യമായ റിപ്പബ്ലിക് ഓഫ് കോംഗോ എന്നിവിടങ്ങളിലെ ഔദ്യോഗിക സന്ദർശനത്തിന് ശേഷം കഴിഞ്ഞ ജനുവരിയിൽ ഡെട്രോയിറ്റ് മെട്രോപൊളിറ്റൻ വിമാനത്താവളത്തിൽ തിരിച്ചെത്തിയ ഇവരെ സുരക്ഷാ അധികൃതർ വിശദമായ പരിശോധനയ്ക്ക് വിധേയമാക്കിയിരുന്നു. ഈ സമയം തങ്ങളുടെ പക്കൽ യാതൊരുവിധത്തിലുള്ള ജൈവവസ്തുക്കളോ (Biological Materials) ലാബ് സാമ്പിളുകളോ ഇല്ലെന്നാണ് വിൻസെന്റ് മുൻസ്റ്റർ അന്വേഷണ ഉദ്യോഗസ്ഥരോട് കള്ളം പറഞ്ഞത്. എന്നാൽ പിന്നീട് കസ്റ്റംസ് അധികൃതരുടെ സഹായത്തോടെ നടത്തിയ രഹസ്യ പരിശോധനയിലാണ് ഇവരുടെ ലഗേജിൽ നിന്നും അനുമതിയില്ലാതെ കൊണ്ടുവന്ന നിർജ്ജീവമാക്കിയ എംപോക്സ് വൈറസിന്റെ കുപ്പികൾ എഫ്.ബി.ഐ (FBI) കണ്ടെത്തുകയും പിടിച്ചെടുക്കുകയും ചെയ്തത്.
തന്റെ ലാപ്ടോപ്പിൽ ആവശ്യമായ ലാബ് രേഖകളുണ്ടെന്നും, ഗവേഷണങ്ങളുടെ ഭാഗമായി താൻ ഇത്തരം കാര്യങ്ങൾ എപ്പോഴും ചെയ്യാറുള്ളതാണെന്നുമാണ് മുൻസ്റ്റർ അന്വേഷകരോട് ന്യായീകരിച്ചത്. എന്നാൽ ഇയാളുടേത് പൂർണ്ണമായും വ്യാജവും നിയമവിരുദ്ധവുമായ പ്രസ്താവനയാണെന്ന് എഫ്.ബി.ഐ കോടതിയിൽ സമർപ്പിച്ച ഫയലിംഗിൽ വ്യക്തമാക്കി. അന്താരാഷ്ട്ര തലത്തിൽ കൃത്യമായ അനുമതി വാങ്ങാതെ അപകടകരമായ ജൈവവസ്തുക്കൾ വിമാനമാർഗ്ഗം കടത്താനുള്ള ശ്രമം കടുത്ത നിയമലംഘനമാണെന്നും ഇത് പൊതുജനവിശ്വാസത്തെ തകർക്കുന്നതിനൊപ്പം ജനങ്ങളെ വലിയ ആരോഗ്യ അപകടത്തിലാക്കുന്നതാണെന്നും ആരോഗ്യ വകുപ്പിലെ ഇൻസ്പെക്ടർ ജനറൽ ഓഫീസ് വ്യക്തമാക്കി. വിഷയം നിലവിൽ ഫെഡറൽ ഏജൻസികളുടെ അന്വേഷണത്തിലാണെന്നും നിയമപാലകരുമായി പൂർണ്ണമായി സഹകരിക്കുന്നുണ്ടെന്നും ലബോറട്ടറിയുടെ മേൽനോട്ടം വഹിക്കുന്ന എൻ.ഐ.എച്ച് (NIH) അറിയിച്ചു.
റിപ്പബ്ലിക് ഓഫ് കോംഗോയിൽ രണ്ടായിരത്തിലധികം ആളുകളുടെ ദാരുണ മരണത്തിന് കാരണമായ അതിശക്തമായ വൈറസ് വകഭേദമാണ് ശാസ്ത്രജ്ഞർ കടത്താൻ ശ്രമിച്ചത്. സാധാരണയായി ശക്തമായ പനിയും ശരീരത്തിൽ ആകെ കുമിളകൾ ഉണ്ടാകുന്നതുമാണ് എംപോക്സ് രോഗത്തിന്റെ പ്രധാന ലക്ഷണങ്ങൾ. ചിലരിൽ ഇത് ആന്തരിക അവയവങ്ങളെ ബാധിച്ച് ഗുരുതരമാകാമെങ്കിലും ഭൂരിഭാഗം ആളുകളും കൃത്യമായ ചികിത്സയിലൂടെ സുഖം പ്രാപിക്കാറുണ്ട്. മുൻപ് ‘മങ്കിപോക്സ്’ (Monkeypox) എന്നറിയപ്പെട്ടിരുന്ന ഈ മാരക രോഗം 1958-ൽ കുരങ്ങുകളിലാണ് ആദ്യമായി ശാസ്ത്രലോകം കണ്ടെത്തിയത്. പിന്നീട് 2022-ൽ ഇത് മനുഷ്യരിൽ ലൈംഗികബന്ധത്തിലൂടെ അതിവേഗം പടരുന്നതായി ലോകാരോഗ്യ സംഘടന സ്ഥിരീകരിച്ചു. നിലവിൽ ലോകമെമ്പാടുമുള്ള എഴുപതിലധികം രാജ്യങ്ങളിൽ ഈ വൈറസ് വ്യാപിച്ചതായാണ് ഔദ്യോഗിക കണക്കുകൾ വ്യക്തമാക്കുന്നത്.
Story Summary: Two prominent US government scientists, Vincent Munster and Claude Kwe, face federal charges after FBI caught them smuggling vials of inactivated Mpox virus from Africa to the US without proper authorization at Detroit airport.
