ടെഹ്റാൻ: പശ്ചിമേഷ്യയെ യുദ്ധഭീതിയിലാഴ്ത്തി ഇറാൻ തലസ്ഥാനമായ ടെഹ്റാനിൽ ഇസ്രായേലും അമേരിക്കയും സംയുക്തമായി അതിശക്തമായ മിസൈൽ ആക്രമണം നടത്തി (US Israel Joint Strikes Iran Khamenei Office). ഇറാന്റെ പരമോന്നത നേതാവായ ആയത്തുള്ള അലി ഖമേനിയുടെ ഓഫീസിന് തൊട്ടടുത്തായാണ് സ്ഫോടനങ്ങൾ നടന്നതെന്ന് റിപ്പോർട്ടുകൾ വ്യക്തമാക്കുന്നു. കേന്ദ്ര ടെഹ്റാനിലെ അതീവ സുരക്ഷാ മേഖലയിലുണ്ടായ ഈ ആക്രമണം ഇറാൻ ഭരണകൂടത്തിന്റെ അടിത്തറ ലക്ഷ്യമിട്ടുള്ളതാണെന്നാണ് വിലയിരുത്തപ്പെടുന്നത്.
ഇറാൻ പ്രസിഡന്റ് മസൂദ് പെസെഷ്കിയാനെ വധിക്കാൻ ലക്ഷ്യമിട്ടുള്ള ആക്രമണങ്ങൾ നടന്നതായും ചില കേന്ദ്രങ്ങൾ സൂചിപ്പിക്കുന്നുണ്ടെങ്കിലും ഇറാന്റെ ഭാഗത്തുനിന്ന് ഔദ്യോഗിക സ്ഥിരീകരണം വന്നിട്ടില്ല. ഖമേനിയുടെ ഓഫീസിന് സമീപമുണ്ടായ സ്ഫോടനങ്ങളുടെ പശ്ചാത്തലത്തിൽ അദ്ദേഹത്തിന്റെ ആരോഗ്യനിലയെക്കുറിച്ചും ആശങ്കകൾ ഉയരുന്നുണ്ട്. കഴിഞ്ഞ ഏതാനും ദിവസങ്ങളായി അദ്ദേഹം പൊതുവേദികളിൽ പ്രത്യക്ഷപ്പെട്ടിരുന്നില്ല. ടെഹ്റാനിലെ പ്രതിരോധ മന്ത്രാലയം, ഇന്റലിജൻസ് കാര്യാലയം എന്നിവയ്ക്കു പുറമെ ഖോം, ഇസ്ഫഹാൻ എന്നിവിടങ്ങളിലെ ആണവ കേന്ദ്രങ്ങൾക്ക് സമീപവും ആക്രമണങ്ങൾ നടന്നതായാണ് വിവരങ്ങൾ.
അമേരിക്കൻ സൈന്യം നേരിട്ട് ഇസ്രായേലിനൊപ്പം ഈ ആക്രമണത്തിൽ പങ്കുചേർന്നത് മേഖലയിലെ യുദ്ധം പുതിയ തലത്തിലേക്ക് എത്തിച്ചിരിക്കുകയാണ്. ആക്രമണത്തെത്തുടർന്ന് ഇറാൻ തങ്ങളുടെ എല്ലാ വ്യോമപാതകളും അടച്ചുകഴിഞ്ഞു. ഇസ്രായേലിൽ അടിയന്തരാവസ്ഥ പ്രഖ്യാപിച്ചിരിക്കുകയാണ്. ഏത് നിമിഷവും ഇറാന്റെ ഭാഗത്തുനിന്ന് പ്രത്യാക്രമണം ഉണ്ടായേക്കാമെന്ന നിഗമനത്തിൽ രാജ്യത്തെ പ്രതിരോധ സംവിധാനങ്ങൾ അതീവ ജാഗ്രതയിലാണ്.
Summary: The combined forces of the US and Israel have launched massive strikes in Tehran, with explosions reported dangerously close to the office of Supreme Leader Ayatollah Ali Khamenei.
