വാഷിംഗ്ടൺ/തെഹ്റാൻ: ഇറാനെതിരെ കർശന സൈനിക നടപടികൾ സ്വീകരിക്കുമെന്ന അമേരിക്കൻ പ്രസിഡന്റ് ഡൊണാൾഡ് ട്രംപിന്റെ മുന്നറിയിപ്പിന് പിന്നാലെ പശ്ചിമേഷ്യയിൽ സംഘർഷാവസ്ഥ മൂർച്ഛിക്കുന്നു (Donald Trump Iran). ഹോർമുസ് കടലിടുക്കിലുള്ള യുഎസ് നാവികസേനയുടെ കപ്പലുകളിലേക്ക് ഇന്ധനം, ഭക്ഷണം, മാരകമായ യുദ്ധോപകരണങ്ങൾ എന്നിവ അടിയന്തരമായി എത്തിച്ചു തുടങ്ങിയതായി യുഎസ് സെൻട്രൽ കമാൻഡ് അറിയിച്ചു.
അമേരിക്കൻ നീക്കം ശക്തമായതോടെ സംഘർഷം ലഘൂകരിക്കാനുള്ള പുതിയ നിർദ്ദേശങ്ങളുമായി ഇറാൻ രംഗത്തെത്തിയിട്ടുണ്ട്. മധ്യസ്ഥരായ പാകിസ്താൻ വഴിയാണ് ഇറാൻ പുതിയ നിർദ്ദേശങ്ങൾ അമേരിക്കയ്ക്ക് മുന്നിൽ സമർപ്പിച്ചത്. ഇറാനെതിരെ സ്വീകരിക്കാവുന്ന സൈനിക നടപടികളെക്കുറിച്ചുള്ള കൃത്യമായ പ്ലാൻ യുഎസ് സെൻട്രൽ കമാൻഡ് ട്രംപിന് കൈമാറിയതിന് തൊട്ടുപിന്നാലെയാണ് ഇറാന്റെ ഈ നയതന്ത്ര നീക്കം.
സൈനിക വിന്യാസത്തിന്റെ കാര്യത്തിൽ യൂറോപ്യൻ സഖ്യകക്ഷികൾക്കെതിരെയും ട്രംപ് കടുത്ത നിലപാടിലാണ്. ജർമ്മനിയിലെ സൈനികരുടെ എണ്ണം കുറയ്ക്കുമെന്ന് പ്രഖ്യാപിച്ചതിന് പിന്നാലെ, ഇറ്റലി, സ്പെയിൻ എന്നിവിടങ്ങളിൽ നിന്നും സൈന്യത്തെ പിൻവലിക്കുമെന്ന് ട്രംപ് ഭീഷണിപ്പെടുത്തി. നാറ്റോ (NATO) രാജ്യങ്ങൾ പ്രതിരോധ ചെലവുകൾ വർദ്ധിപ്പിക്കണമെന്ന നിലപാടിൽ ട്രംപ് ഉറച്ചുനിൽക്കുകയാണ്.
യുദ്ധം പുനരാരംഭിക്കേണ്ടി വരുമെന്ന ട്രംപിന്റെ പ്രസ്താവനയെ ഇസ്രായേലും പിന്തുണച്ചു. ആവശ്യമായ തുടർനടപടികൾ സ്വീകരിക്കുമെന്ന് ഇസ്രായേൽ പ്രതിരോധമന്ത്രി ഇസ്രായേൽ കാട്സ് ആവർത്തിച്ചു. ഇതോടെ ഇസ്രായേൽ-ഇറാൻ പോര് വീണ്ടും ഒരു പൂർണ്ണരൂപത്തിലുള്ള യുദ്ധത്തിലേക്ക് നീങ്ങുമോ എന്ന ആശങ്കയിലാണ് ലോകരാജ്യങ്ങൾ. ഹോർമുസ് കടലിടുക്കിലെ ഗതാഗതം തടസ്സപ്പെടുന്നത് ആഗോള എണ്ണ വിപണിയെയും സാമ്പത്തിക വ്യവസ്ഥയെയും സാരമായി ബാധിച്ചേക്കാം.
Story Summary: Following President Donald Trump’s warning of military action against Iran, the US Navy has ramped up preparations in the Strait of Hormuz. Supplies, including fuel and ammunition, are being dispatched to warships. Amidst the rising tension, Iran has submitted a fresh proposal through Pakistan to de-escalate the conflict. Meanwhile, Trump threatened to withdraw troops from Italy and Spain, adding pressure on European allies. Israel’s Defense Minister also hinted at further military actions, heightening war fears in West Asia.
