മോസ്കോ: ലോകത്തിലെ ഏറ്റവും വലിയ എണ്ണ ഉൽപ്പാദക രാജ്യങ്ങളിലൊന്നായിരുന്നിട്ടും കടുത്ത ഇന്ധനക്ഷാമത്തിൽ നട്ടംതിരിയുകയാണ് റഷ്യ (Russia Fuel Crisis). യുക്രെയ്ൻ ഡ്രോണുകൾ റഷ്യൻ റിഫൈനറികൾക്കു നേരെ നടത്തുന്ന നിരന്തര ആക്രമണങ്ങളാണ് ഈ പ്രതിസന്ധിക്ക് പ്രധാന കാരണം. എണ്ണ ശുദ്ധീകരണശാലകളുടെ പ്രവർത്തനം തടസ്സപ്പെട്ടതോടെ രാജ്യത്തിന്റെ പല ഭാഗങ്ങളിലും പെട്രോളും ഡീസലും ലഭിക്കാത്ത അവസ്ഥയാണ്.
പ്രതിസന്ധി ഇങ്ങനെ:
ക്രൂഡോയിൽ ഉൽപ്പാദനത്തിൽ കുറവില്ലെങ്കിലും, അത് ശുദ്ധീകരിച്ച് പെട്രോളും ഡീസലുമാക്കി മാറ്റുന്ന റിഫൈനറികളുടെ പ്രവർത്തനശേഷി കഴിഞ്ഞ വർഷത്തെ അപേക്ഷിച്ച് 25 ശതമാനം കുറഞ്ഞു. ഈ സാഹചര്യത്തിൽ, പെട്രോൾ ഇറക്കുമതി ചെയ്യുന്നതിനായി റഷ്യൻ പാർലമെന്റ് കമ്പനികൾക്ക് നികുതി ഇളവ് പ്രഖ്യാപിച്ചിട്ടുണ്ട്. ഇന്ത്യയുൾപ്പെടെയുള്ള രാജ്യങ്ങളിൽ നിന്ന് പെട്രോൾ ഇറക്കുമതി ചെയ്യാൻ റഷ്യ പദ്ധതിയിടുന്നതായി യുക്രെയ്ൻ മാധ്യമങ്ങൾ റിപ്പോർട്ട് ചെയ്യുന്നുണ്ടെങ്കിലും, ഇക്കാര്യം റഷ്യയോ ഇന്ത്യയോ ഔദ്യോഗികമായി സ്ഥിരീകരിച്ചിട്ടില്ല. നിലവിൽ ഇന്ത്യയിലേക്ക് വൻതോതിൽ ക്രൂഡോയിൽ നൽകുന്ന റഷ്യ, തങ്ങൾ നൽകുന്ന എണ്ണ ശുദ്ധീകരിച്ച ശേഷം പെട്രോളിയം ഉൽപ്പന്നങ്ങളായി തിരിച്ചെടുക്കാനാണ് ആലോചിക്കുന്നത്.
കസഖ്സ്ഥാന്റെ സഹായം തേടുന്നു:
ഇന്ധനക്ഷാമം പരിഹരിക്കാൻ അയൽരാജ്യമായ കസഖ്സ്ഥാനിൽ നിന്ന് 50,000 ടൺ എണ്ണ ആവശ്യപ്പെട്ടതായി റഷ്യ അറിയിച്ചിട്ടുണ്ട്. റഷ്യൻ തുറമുഖങ്ങളെയും പൈപ്പ് ലൈനുകളെയും ആശ്രയിക്കുന്ന കസഖ്സ്ഥാന് റഷ്യയുടെ ഈ ആവശ്യം നിരാകരിക്കാൻ സാധിക്കാത്ത അവസ്ഥയാണുള്ളത്. എന്നാൽ, റഷ്യയ്ക്ക് സഹായം നൽകിയാൽ തങ്ങൾക്കും യുക്രെയ്ൻ ആക്രമണം നേരിടേണ്ടി വരുമോ എന്ന ആശങ്ക കസഖ്സ്ഥാനുണ്ട്. ബെലാറസിനെതിരെ ഡ്രോൺ ആക്രമണം നടത്തുമെന്ന് യുക്രെയ്ൻ പ്രസിഡന്റ് വൊളോഡിമിർ സെലെൻസ്കി നേരത്തെ മുന്നറിയിപ്പ് നൽകിയിരുന്നു.
ഇതിനിടയിൽ, രാജ്യത്തെ ഇന്ധനക്ഷാമം രൂക്ഷമായതോടെ ഡീസൽ കയറ്റുമതിയും നിരോധിക്കാൻ റഷ്യ തയ്യാറെടുക്കുകയാണ്. നേരത്തെ തന്നെ പെട്രോളിനും ജെറ്റ് ഇന്ധനത്തിനും റഷ്യ കയറ്റുമതി നിരോധനം ഏർപ്പെടുത്തിയിട്ടുണ്ട്. റിഫൈനറികളിലെ അറ്റകുറ്റപ്പണികൾ വൈകുന്നതും കയറ്റുമതിയെയും ആഭ്യന്തര വിപണിയെയും ഒരുപോലെ പ്രതികൂലമായി ബാധിച്ചിരിക്കുകയാണ്.
Summary: Russia is facing a severe fuel crisis despite being a major global oil producer, primarily due to relentless Ukrainian drone attacks on its refineries. With refining capacity dropping by 25%, the country is now exploring options to import petrol from foreign markets, with reports suggesting India could be a potential source, though neither nation has confirmed this. Russia has also approached neighboring Kazakhstan for 50,000 tons of crude, though concerns remain over potential retaliation from Ukraine. Consequently, Russia is considering a ban on diesel exports to stabilize its domestic fuel supply.
