ബെയ്റൂട്ട്: ഇസ്രായേലും അമേരിക്കയും ഇറാനെതിരെ നടത്തിയ സംയുക്ത ആക്രമണത്തിന് പിന്നാലെ, ലെബനനെ മറ്റൊരു ‘സാഹസികതയിലേക്ക്’ വലിച്ചിഴയ്ക്കരുതെന്ന് പ്രധാനമന്ത്രി നവാഫ് സലാം മുന്നറിയിപ്പ് നൽകി (Lebanese PM Nawaf Salam Warning Hezbollah). രാജ്യത്തിന്റെ സുരക്ഷയെയും ഐക്യത്തെയും ബാധിക്കുന്ന ഒരു നീക്കവും അനുവദിക്കില്ലെന്ന് അദ്ദേഹം വ്യക്തമാക്കി. ഇറാൻ പിന്തുണയുള്ള സായുധ സംഘടനയായ ഹിസ്ബുള്ള ഈ യുദ്ധത്തിൽ പങ്കുചേരാനുള്ള സാധ്യത മുൻനിർത്തിയാണ് പ്രധാനമന്ത്രിയുടെ ഈ കർശന നിർദ്ദേശം.
മേഖലയിലെ അതീവ ഗുരുതരമായ സാഹചര്യത്തിൽ എല്ലാ ലെബനൻ പൗരന്മാരും വിവേകത്തോടെയും രാജ്യസ്നേഹത്തോടെയും പ്രവർത്തിക്കണമെന്ന് അദ്ദേഹം ആഹ്വാനം ചെയ്തു. ലെബനന്റെയും അവിടുത്തെ ജനങ്ങളുടെയും താൽപ്പര്യങ്ങൾക്കാണ് പ്രഥമ പരിഗണന നൽകേണ്ടതെന്നും അദ്ദേഹം ഓർമ്മിപ്പിച്ചു. യുഎസ്-ഇറാൻ യുദ്ധത്തിൽ ഹിസ്ബുള്ള ഇടപെടുകയാണെങ്കിൽ ബെയ്റൂട്ട് വിമാനത്താവളം ഉൾപ്പെടെയുള്ള സിവിൽ അടിസ്ഥാന സൗകര്യങ്ങളെ ഇസ്രായേൽ ലക്ഷ്യം വയ്ക്കുമെന്ന് നേരത്തെ മുന്നറിയിപ്പ് നൽകിയിരുന്നു. 2024-ലെ യുദ്ധത്തിൽ ഹിസ്ബുള്ള നേതാവ് ഹസ്സൻ നസ്റള്ള കൊല്ലപ്പെട്ടതും ആയിരക്കണക്കിന് പോരാളികൾക്ക് ജീവൻ നഷ്ടപ്പെട്ടതും ലെബനനെ സാമ്പത്തികമായും തകർത്തിരുന്നു.
നിലവിൽ ഇറാൻ ഇസ്രായേലിന് നേരെ മിസൈൽ ആക്രമണം ആരംഭിച്ച പശ്ചാത്തലത്തിൽ, ഹിസ്ബുള്ള ലെബനൻ അതിർത്തിയിൽ നിന്ന് ഇസ്രായേലിനെതിരെ പ്രത്യാക്രമണം നടത്തുമോ എന്ന ആശങ്കയിലാണ് ലോകരാജ്യങ്ങൾ. ഇറാൻ ആക്രമണത്തിന് പിന്തുണയുമായി ലെബനനിലെ വിപ്ലവ വിഭാഗങ്ങൾ തെരുവിലിറങ്ങാൻ സാധ്യതയുള്ളതിനാൽ ബെയ്റൂട്ടിൽ സൈനിക ജാഗ്രത വർദ്ധിപ്പിച്ചു. ലെബനനിലെ വിവിധ വിഭാഗങ്ങൾ തമ്മിലുള്ള ഐക്യം നിലനിർത്തുക എന്നതിനാണ് സർക്കാർ ഇപ്പോൾ മുൻഗണന നൽകുന്നത്.
