ബെയ്റൂട്ട്: പശ്ചിമേഷ്യയിൽ ഇറാനും ഇസ്രയേലും തമ്മിലുള്ള സംഘർഷം തുടരുന്നതിനിടെ ലെബനനിലെ ചരിത്രപ്രസിദ്ധമായ ടയർ ഗരത്തിൽ ഇസ്രയേൽ നടത്തിയ വ്യോമാക്രമണത്തിൽ എട്ടുപേർ കൊല്ലപ്പെട്ടു (Israel Tyre Strike). യുദ്ധം തുടങ്ങിയതിന് ശേഷം ടയറിൽ നടക്കുന്ന ഏറ്റവും വലിയ ആക്രമണമാണിത്. ലെബനനിലെ ഹിസ്ബുള്ളയ്ക്കെതിരെയുള്ള ഇസ്രയേലിന്റെ സൈനിക നടപടികൾ തുടരുന്നത് അമേരിക്കൻ പ്രസിഡന്റ് ഡൊണാൾഡ് ട്രംപ് മുൻകൈയെടുത്ത് നടത്തുന്ന സമാധാന ചർച്ചകൾക്ക് വലിയ തിരിച്ചടിയായിരിക്കുകയാണ്.
അതേസമയം, ഹോർമുസ് കടലിടുക്കിന് സമീപം തകർന്നുവീണ യു.എസ് ആർമിയുടെ ആപ്പാച്ചി ഹെലികോപ്റ്ററിലെ രണ്ട് പൈലറ്റുമാരെയും യു.എസ് നാവികസേനയുടെ ഡ്രോൺ ഉപയോഗിച്ച് സുരക്ഷിതമായി രക്ഷപ്പെടുത്തിയതായി പെന്റഗൺ അറിയിച്ചു. ഇറാനും ഇസ്രയേലും തമ്മിൽ നേരിട്ടുള്ള ആക്രമണങ്ങൾ താൽക്കാലികമായി നിർത്തിവെച്ചിട്ടുണ്ടെങ്കിലും ലെബനനിലെ സൈനിക നീക്കം ഇസ്രയേൽ അവസാനിപ്പിക്കാത്തതാണ് മേഖലയിൽ വീണ്ടും യുദ്ധഭീതി പരത്തുന്നത്. ലെബനനിലെ ആക്രമണങ്ങൾ അവസാനിപ്പിക്കാതെ ഇറാനുമായുള്ള സമാധാന കരാറിലേക്ക് നീങ്ങാൻ കഴിയില്ലെന്ന നിലപാടിലാണ് ടെഹ്റാൻ. ട്രംപ് ഫോണിലൂടെ ഇസ്രയേൽ പ്രധാനമന്ത്രി ബെന്യാമിൻ നെതന്യാഹുവിന് ശക്തമായ മുന്നറിയിപ്പ് നൽകിയതായാണ് റിപ്പോർട്ടുകൾ.
ഇറാനുമായുള്ള യുദ്ധം തുടർന്നാൽ ഇസ്രയേൽ ഒറ്റപ്പെടുമെന്നും അദ്ദേഹം താക്കീത് നൽകിയിട്ടുണ്ട്. അതിനിടെ, ഹോർമുസ് കടലിടുക്കിലെ ഗതാഗതം പൂർണ്ണമായും ഇറാൻ തടസ്സപ്പെടുത്തിയിരിക്കുകയാണ്. ഇസ്രയേലുമായുള്ള യുദ്ധം അവസാനിപ്പിക്കാൻ ലെബനനിൽ ഹിസ്ബുള്ളയ്ക്കെതിരെയുള്ള ആക്രമണം നിർത്തിവെക്കണമെന്നും, അന്താരാഷ്ട്ര ഉപരോധങ്ങൾ പിൻവലിക്കണമെന്നും ഇറാൻ ആവശ്യപ്പെടുന്നു. യുദ്ധം മൂലം എണ്ണവിലയിൽ വൻ ചാഞ്ചാട്ടങ്ങൾ ഉണ്ടാകുന്നതും ആഗോള സമ്പദ്വ്യവസ്ഥയെ ബാധിക്കുന്നുണ്ട്.
Summary: Tensions in the Middle East have spiked as Israel conducted a lethal air strike on the southern Lebanese port city of Tyre, killing at least eight civilians, which complicates U.S.-led efforts to broker a durable peace deal. While President Donald Trump has successfully mediated a temporary pause in direct hostilities between Israel and Iran, the latter has warned that full-scale conflict will resume unless Israel ceases its campaign against Hezbollah in Lebanon.
