ടെഹ്റാൻ: ഹോർമുസ് കടലിടുക്കിൽ അമേരിക്ക ഏർപ്പെടുത്തിയിരിക്കുന്ന നാവിക ഉപരോധത്തിനെതിരെ കടുത്ത യുദ്ധപ്രഖ്യാപനവുമായി ഇറാൻ സൈനിക നേതൃത്വം (Iran Warns US Navy Gulf of Oman Graveyard). ഒമാൻ ഉൾക്കടലിൽ നിന്ന് യു.എസ് നാവികസേന അടിയന്തരമായി പിന്മാറണമെന്നും അല്ലാത്തപക്ഷം പ്രദേശം അമേരിക്കൻ യുദ്ധക്കപ്പലുകളുടെ ശ്മശാനമായി മാറ്റുമെന്നും ഇറാൻ പരമോന്നത നേതാവ് മൊജ്തബ ഖമേനിയുടെ സൈനിക ഉപദേശകനും എക്സ്പീഡിയൻസി ഡിസ്സേൺമെന്റ് കൗൺസിൽ അംഗവുമായ മൊഹ്സെൻ റെസായി മുന്നറിയിപ്പ് നൽകി. ഇറാൻ ഔദ്യോഗിക ടെലിവിഷനിലൂടെയും റഷ്യൻ മാധ്യമമായ ആർ.ടി വഴിയുമാണ് അദ്ദേഹം ഈ മുന്നറിയിപ്പ് പുറത്തുവിട്ടത്.
നാവിക ഉപരോധം ഏർപ്പെടുത്തുന്നത് പരസ്യമായ യുദ്ധപ്രഖ്യാപനമാണെന്നും അതിനെതിരെ തിരിച്ചടിക്കാൻ ഇറാന് സ്വാഭാവികമായ അവകാശമുണ്ടെന്നും റെസായി വ്യക്തമാക്കി. തങ്ങളുടെ ഇതുവരെയുള്ള സമാധാനപരമായ നിലപാട് യു.എസ് യുദ്ധത്തെ അംഗീകരിച്ചതായോ ഇറാന്റെ ബലഹീനതയായോ തെറ്റിദ്ധരിക്കരുതെന്ന് അദ്ദേഹം ഓർമ്മിപ്പിച്ചു. ഐ.ആർ.ജി.സി നടത്തിയ തിരിച്ചടിയിൽ അമേരിക്കൻ കപ്പലുകൾക്ക് സംഭവിച്ച കേടുപാടുകളും തീപിടുത്തവും ഉപഗ്രഹ ദൃശ്യങ്ങളിൽ വ്യക്തമാണെന്നും എന്നാൽ പെന്റഗൺ ഇത് മൂടിവെക്കുകയാണെന്നും റെസായി ആരോപിച്ചു. ഏപ്രിൽ 13-ന് ഇസ്ലാമാബാദ് ചർച്ചകൾ പരാജയപ്പെട്ടതിന് പിന്നാലെയാണ് അമേരിക്ക ഇറാനിയൻ തുറമുഖങ്ങളിലേക്കുള്ള കപ്പലുകൾ തടഞ്ഞുകൊണ്ട് കടുത്ത നാവിക ഉപരോധം ആരംഭിച്ചത്. മുൻപത്തേക്കാൾ ശക്തമായ സൈനിക ആക്രമണം അഴിച്ചുവിടുമെന്ന് യു.എസ് പ്രസിഡന്റ് ഡൊണാൾഡ് ട്രംപും ഭീഷണി മുഴക്കിയതോടെ മിഡിൽ ഈസ്റ്റിൽ യുദ്ധസാഹചര്യം അതീവ ഗുരുതരമായി തുടരുകയാണ്.
Summary: Iran’s senior military adviser Mohsen Rezaei has issued a stark warning to the United States Navy, demanding they retreat before the Gulf of Oman becomes a “graveyard” for American ships. Speaking on Iranian state media, Rezaei declared the ongoing US naval blockade an act of war and asserted Iran’s natural right to retaliate. He also accused Washington of concealing satellite evidence showing IRGC-inflicted damage on US vessels. The dispute follows a naval blockade enforced by the US on April 13, 2026, after the collapse of peace talks, pushing both nations closer to a major military confrontation.
