ഓക്ലൻഡ്: പ്രധാനമന്ത്രി നരേന്ദ്ര മോദിയും ന്യൂസിലൻഡ് പ്രധാനമന്ത്രി ക്രിസ്റ്റഫർ ലക്സണും തമ്മിൽ നടത്തിയ കൂടിക്കാഴ്ചയ്ക്ക് പിന്നാലെ ഇരുരാജ്യങ്ങളും തമ്മിലുള്ള ഉഭയകക്ഷി ബന്ധം ‘സ്ട്രാറ്റജിക് പാർട്ണർഷിപ്പ്’ ആയി ഉയർത്തി. വരും വർഷങ്ങളിൽ ഉഭയകക്ഷി വ്യാപാരം ഇരട്ടിയാക്കാനും, 2030-ഓടെ ചരക്ക്-സേവന മേഖലകളിലെ വാർഷിക വ്യാപാരം 35,000 കോടി രൂപയായി വർദ്ധിപ്പിക്കാനും ഇരുനേതാക്കളും അഞ്ച് വർഷത്തെ ലക്ഷ്യം നിശ്ചയിച്ചു.(India New Zealand strategic partnership trade target 35000 crore Narendra Modi Auckland visit)
പ്രധാനമന്ത്രിയുടെ മൂന്ന് രാഷ്ട്ര സന്ദർശനത്തിന്റെ അവസാന ഘട്ടമായാണ് നരേന്ദ്ര മോദി ഓക്ലൻഡിൽ എത്തിയത്. ഇന്തോ-പസഫിക് മേഖലയിൽ ചൈന സ്വാധീനം ശക്തമാക്കുന്ന പശ്ചാത്തലത്തിൽ, ഇന്ത്യ-ന്യൂസിലൻഡ് എഫ് ടി എ അടുത്തിടെ ഒപ്പുവെച്ചതിന് പിന്നാലെയാണ് ഈ നിർണായക കൂടിക്കാഴ്ച. അടുത്ത നാല് വർഷത്തേക്കുള്ള സഹകരണത്തിന്റെ റോഡ് മാപ്പ്, ഇന്തോ-പസഫിക് സമുദ്ര സഹകരണത്തിനുള്ള ചട്ടക്കൂട്, ഇന്ത്യൻ നാവികസേനയും ന്യൂസിലൻഡ് ഡിഫൻസ് ഫോഴ്സും തമ്മിലുള്ള പരസ്പര ലോജിസ്റ്റിക്സ് സപ്പോർട്ട് കരാർ എന്നിവയുൾപ്പെടെ 10 കരാറുകളും 18 നിർണായക തീരുമാനങ്ങളും ചർച്ചയിൽ ഉരുത്തിരിഞ്ഞു. ഇരുരാജ്യങ്ങളും തമ്മിലുള്ള അടുത്ത സഹകരണം ഇന്തോ-പസഫിക് മേഖലയ്ക്ക് പുതിയ കരുത്ത് പകരുമെന്ന് പ്രധാനമന്ത്രി നരേന്ദ്ര മോദി വ്യക്തമാക്കി.
ഇന്തോ-പസഫിക് മേഖലയിലെ സുരക്ഷയ്ക്ക് പുറമെ പശ്ചിമേഷ്യയിലെ നിലവിലെ സംഘർഷങ്ങളിലും ഇരുനേതാക്കളും ആശങ്ക രേഖപ്പെടുത്തി. മേഖലയിൽ സമാധാനം പുനഃസ്ഥാപിക്കണമെന്നും സിവിൽ സമൂഹത്തിന്റെ സുരക്ഷ ഉറപ്പാക്കണമെന്നും സംയുക്ത പ്രസ്താവനയിലൂടെ ആവശ്യപ്പെട്ടു. ഹോർമുസ് കടലിടുക്കിലൂടെയുള്ള അന്താരാഷ്ട്ര കപ്പൽ ഗതാഗതത്തിനും ആഗോള വ്യാപാര സ്വാതന്ത്ര്യത്തിനും മേലുള്ള യാതൊരുവിധ നിയന്ത്രണങ്ങളെയും അനുവദിക്കില്ലെന്നും നേതാക്കൾ വ്യക്തമാക്കി. ഐക്യരാഷ്ട്രസഭയിൽ അടിയന്തരവും ഫലപ്രദവുമായ പരിഷ്കരണങ്ങൾ വേണമെന്നും രക്ഷാസമിതി വിപുലീകരിക്കണമെന്നുമുള്ള ആവശ്യത്തെ ഇരുരാജ്യങ്ങളും പിന്തുണച്ചു.
Story Summary
PM Narendra Modi and New Zealand PM Christopher Luxon elevated bilateral ties to a strategic partnership during their meeting in Auckland. They set an ambitious target to double trade to ₹35,000 crore by 2030, while signing 10 agreements covering Indo-Pacific maritime security, defense logistics, and called for stability in West Asia and the Strait of Hormuz.
