വാഷിംഗ്ടൺ: രണ്ട് വയസ്സുകാരനായ മകനെ ഒപ്പം വിടാതെ തന്നെ നിർബന്ധിതമായി യു.എസിൽ നിന്നും നാടുകടത്തിയെന്നും, മാസങ്ങൾക്ക് ശേഷം കുഞ്ഞ് ക്രൂരമായി കൊല്ലപ്പെട്ടപ്പോൾ കുറ്റം തന്റെ മേൽ ചുമത്താൻ ശ്രമിക്കുകയാണെന്നും ആരോപിച്ച് ഹോണ്ടുറാസ് സ്വദേശിയായ യുവതി രംഗത്ത് (US ICE Deportation Honduran Woman Wendy). യു.എസ് ഇമിഗ്രേഷൻ ആൻഡ് കസ്റ്റംസ് എൻഫോഴ്സ്മെന്റിനെതിരെ കടുത്ത ആരോപണങ്ങളുമായി വെൻഡി ഹെർണാണ്ടസ് റെയസ് എന്ന അമ്മയാണ് മാധ്യമങ്ങൾക്ക് മുന്നിലെത്തിയത്. തന്റെ മകനായ ഓർലിൻ ജോസഫ് ഹെർണാണ്ടസ് റെയസിനെ ഒപ്പം അയക്കണമെന്ന് താൻ ഉദ്യോഗസ്ഥരോട് കെഞ്ചി അപേക്ഷിച്ചിട്ടും ജനുവരിയിൽ തന്നെ തനിച്ച് നാടുകടത്തുകയായിരുന്നുവെന്ന് വെൻഡി വ്യക്തമാക്കുന്നു.
തുടർന്ന് ഫ്ലോറിഡയിലെ എസ്കാംബിയ കൗണ്ടിയിൽ അമ്മാവന്റെ സംരക്ഷണയിൽ കഴിഞ്ഞിരുന്ന രണ്ട് വയസ്സുകാരൻ മാർച്ച് മാസത്തിലാണ് അതിക്രൂരമായി കൊല്ലപ്പെട്ടത്. വാരിയെല്ലുകൾ തകർന്ന നിലയിലും ശരീരത്തിൽ പൊള്ളലേറ്റ പാടുകളോടെയും ലൈംഗിക അതിക്രമത്തിന്റെ ലക്ഷണങ്ങളോടെയുമാണ് കുഞ്ഞിന്റെ മൃതദേഹം കണ്ടെത്തിയത്. സംഭവത്തിൽ കുട്ടിയുടെ അമ്മാവനെ പിന്നീട് കൊലക്കുറ്റത്തിന് പോലീസ് അറസ്റ്റ് ചെയ്തു. കുഞ്ഞിന്റെ മരണശേഷം ഐസ് പുറത്തിറക്കിയ പ്രസ്താവനയിൽ, അമ്മ കുട്ടിയെ യു.എസിൽ ഉപേക്ഷിച്ച് കടന്നുകളയുകയായിരുന്നുവെന്നും ഒരു കൊലപാതകിയുടെ കൈകളിൽ കുഞ്ഞിനെ ഏൽപ്പിച്ചതിന് ഉത്തരവാദി അമ്മയാണെന്നും ആരോപിച്ച് കുറ്റം വെൻഡിയുടെ മേൽ കെട്ടിവെക്കാൻ ഇമിഗ്രേഷൻ അധികൃതർ ശ്രമിച്ചു.
എന്നാൽ ഈ ആരോപണങ്ങൾ പൂർണ്ണമായും നിഷേധിച്ച വെൻഡി, താൻ ഒരിക്കലും തന്റെ കുഞ്ഞിനെ ഉപേക്ഷിച്ചിട്ടില്ലെന്നും ഇമിഗ്രേഷൻ കോടതിയിലെ വിചാരണയ്ക്ക് ഹാജരാകാത്തതിന്റെ പേരിൽ തന്നെ അറസ്റ്റ് ചെയ്ത് ലൂസിയാനയിലെ ഡിറ്റൻഷൻ സെന്ററിലേക്ക് മാറ്റിയപ്പോൾ മുതൽ കുഞ്ഞിനെ തന്റെ പക്കൽ എത്തിക്കാൻ അധികൃതരോട് ആവശ്യപ്പെട്ടിരുന്നുവെന്നും പറഞ്ഞു. 2022-ൽ അഭയാർത്ഥിയായി യു.എസിൽ എത്തിയ വെൻഡിയെ, പ്രാദേശിക പോലീസാണ് ഇമിഗ്രേഷൻ നിയമങ്ങൾ ലംഘിച്ചതിന് പിടിുകൂടി ഐസിന് കൈമാറിയത്. തന്റെ ജീവന്റെ ജീവനായ മകനെ താൻ മനഃപൂർവ്വം ഒരു കൊലപാതകിയുടെ അടുത്ത് ഉപേക്ഷിച്ചു എന്ന അധികൃതരുടെ വാദം കള്ളമാണെന്നും താനൊരു മോശം അമ്മയല്ലെന്നും അവർ വിതുമ്പലോടെ കൂട്ടിച്ചേർത്തു.
Summary: A Honduran woman, Wendy Hernandez Reyes, has accused US Immigration and Customs Enforcement (ICE) of forcibly deporting her in January without her two-year-old son, Orlin Josue Hernandez Reyes, who was later brutally murdered in Florida in March while staying with his uncle. Following the toddler’s death, ICE issued a statement blaming the mother for “abandoning” her child with a violent illegal alien. However, Wendy strongly denied the claims, stating she had begged immigration authorities to reunite her with her boy before deportation, maintaining that she was separated against her will.
