ടെനറീഫ്: ആഗോളതലത്തിൽ ഭീതി പരത്തിയ ഹാന്റാ വൈറസ് (Hantavirus) ബാധയെത്തുടർന്ന് നെതർലൻഡ്സ് കപ്പലായ ‘എംവി ഹോണ്ടിയസിലെ’ യാത്രക്കാരെ സ്പെയിനിലെ കാനറി ദ്വീപുകളിൽ ഒഴിപ്പിച്ചു തുടങ്ങി. ഒരു മാസത്തോളം നീണ്ട അനിശ്ചിതത്വത്തിനൊടുവിൽ ഞായറാഴ്ച രാവിലെ 6:30-ഓടെയാണ് കപ്പൽ ടെനറീഫ് തീരത്ത് അടുത്തത്.(Hantavirus Outbreak On MV Hondius Cruise Ship Passengers Evacuated In Canary Islands)
ആദ്യഘട്ടത്തിൽ സ്പാനിഷ് പൗരന്മാരെയാണ് കപ്പലിൽ നിന്നും പുറത്തെത്തിച്ചത്. നിലവിൽ കപ്പലിലുള്ള യാത്രക്കാർക്കാർക്കും രോഗലക്ഷണങ്ങളില്ലെന്ന് സ്പാനിഷ് ആരോഗ്യ മന്ത്രാലയം വ്യക്തമാക്കി. ജർമ്മനി, ബെൽജിയം, നെതർലൻഡ്സ് എന്നിവിടങ്ങളിൽ നിന്നുള്ള യാത്രക്കാരെ പ്രത്യേക വിമാനങ്ങളിൽ അവരുടെ രാജ്യങ്ങളിലേക്ക് എത്തിക്കും. ഐറിഷ് പൗരന്മാരെ നിരീക്ഷണത്തിലാക്കാൻ അയർലൻഡും പ്രത്യേക വിമാനം അയച്ചിട്ടുണ്ട്.
കപ്പലിലെ യാത്രക്കാരുമായി ബന്ധപ്പെട്ട് ഇതുവരെ എട്ട് കേസുകളാണ് ലോകാരോഗ്യ സംഘടന സ്ഥിരീകരിച്ചത്. ഇതിൽ മൂന്ന് പേർ മരണപ്പെട്ടു. അർജന്റീനയിൽ നിന്നും ഏപ്രിൽ ഒന്നിന് കപ്പലിൽ കയറിയ ഡച്ച് ദമ്പതികളിൽ നിന്നാണ് രോഗം പടർന്നതെന്നാണ് നിഗമനം. ഇരുവരും പിന്നീട് മരണപ്പെട്ടിരുന്നു. 23 രാജ്യങ്ങളിൽ നിന്നുള്ള യാത്രക്കാരാണ് കപ്പലിലുള്ളത്.
എലികളിൽ നിന്നും പടരുന്ന അപൂർവ്വവും മാരകവുമായ വൈറസ് രോഗമാണിത്. എലികളുടെ മലമൂത്ര വിസർജ്യങ്ങളുമായുള്ള സമ്പർക്കത്തിലൂടെയോ അല്ലെങ്കിൽ അവ കലർന്ന പൊടിപടലങ്ങൾ ശ്വസിക്കുന്നതിലൂടെയോ ആണ് രോഗം പടരുന്നത്. അമേരിക്കൻ രാജ്യങ്ങളിൽ റിപ്പോർട്ട് ചെയ്യപ്പെടുന്ന ഇത്തരം കേസുകളിൽ മരണനിരക്ക് 50 ശതമാനം വരെ ഉയരാറുണ്ട്. ശ്വാസകോശ തകരാറാണ് ഇതിന്റെ പ്രധാന ലക്ഷണം. കേപ് വെർഡിൽ നിന്നെത്തിയ ഈ കപ്പലിനെച്ചൊല്ലി ആഗോളതലത്തിൽ വലിയ സുരക്ഷാ മുൻകരുതലുകളാണ് സ്വീകരിച്ചിരിക്കുന്നത്. ഇറ്റലി ഉൾപ്പെടെയുള്ള രാജ്യങ്ങളിൽ കപ്പലിൽ നിന്നും നേരത്തെ മടങ്ങിയ യാത്രക്കാരെ നിരീക്ഷണത്തിലാക്കിയിട്ടുണ്ട്.
Story Summary
Passengers on the MV Hondius cruise ship have begun evacuating in Spain’s Canary Islands following a deadly hantavirus outbreak that killed three people. Health authorities confirmed that while current passengers are asymptomatic, a coordinated international effort is underway to repatriate and isolate individuals from 23 different countries.
