ഓക്ലൻഡ്: കൃത്രിമ ബുദ്ധി ഗവേഷണ സ്ഥാപനമായ ഓപ്പൺഎഐക്കും അതിന്റെ ചീഫ് എക്സിക്യൂട്ടീവ് സാം ആൾട്ട്മാനും എതിരെ ശതകോടീശ്വരൻ ഇലോൺ മസ്ക് നൽകിയ കേസ് യുഎസ് ഫെഡറൽ കോടതി തള്ളി (Elon Musk Loses OpenAI Lawsuit). ലാഭേച്ഛയില്ലാതെ പ്രവർത്തിക്കുമെന്ന പ്രഖ്യാപനത്തോടെ തുടങ്ങിയ കമ്പനി, പണമുണ്ടാക്കാനുള്ള ബിസിനസ്സ് സ്ഥാപനമായി മാറിയെന്ന് കാണിച്ചാണ് മസ്ക് കോടതിയെ സമീപിച്ചിരുന്നത്. എന്നാൽ, മസ്ക് കേസ് ഫയൽ ചെയ്യാൻ വളരെ വൈകിയെന്നും നിശ്ചിത സമയപരിധി കഴിഞ്ഞാണ് കോടതിയെ സമീപിച്ചതെന്നും ഒൻപതംഗ ജൂറി ഐകകണ്ഠ്യേന കണ്ടെത്തി. ജൂറിയുടെ ഈ വിധി അംഗീകരിച്ച ജഡ്ജി ഇവോൺ ഗോൺസാലസ് റോജേഴ്സ് കേസ് പൂർണ്ണമായും തള്ളുകയായിരുന്നു. കേസിൽ വെറും രണ്ട് മണിക്കൂർ മാത്രമാണ് ജൂറി ചർച്ച നടത്തിയത്.
2015-ൽ ഓപ്പൺഎഐ രൂപീകരിക്കുന്നതിൽ പ്രധാന പങ്കുവഹിച്ച മസ്ക്, ആദ്യ വർഷങ്ങളിൽ 38 ദശലക്ഷം ഡോളറിലധികം കമ്പനിയിൽ നിക്ഷേപിച്ചിരുന്നു. എന്നാൽ സാം ആൾട്ട്മാനും സഹപ്രവർത്തകരും ചേർന്ന് തന്റെ അറിവോ സമ്മതമോ കൂടാതെ കമ്പനിയെ വാണിജ്യവൽക്കരിച്ചുവെന്നായിരുന്നു മസ്കിന്റെ പ്രധാന ആരോപണം. കമ്പനിയുടെ ലാഭവിഹിതം ചാരിറ്റി പ്രവർത്തനങ്ങൾക്ക് നൽകണമെന്നും സാം ആൾട്ട്മാനെ ബോർഡിൽ നിന്ന് പുറത്താക്കണമെന്നും മസ്ക് ആവശ്യപ്പെട്ടിരുന്നു. എന്നാൽ, കമ്പനി എക്കാലവും ലാഭേച്ഛയില്ലാതെ പ്രവർത്തിക്കുമെന്ന് എവിടെയും വാഗ്ദാനം ചെയ്തിട്ടില്ലെന്ന് ഓപ്പൺഎഐയുടെ അഭിഭാഷകർ കോടതിയിൽ വാദിച്ചു. കമ്പനിയുടെ ഏകപക്ഷീയമായ നിയന്ത്രണം ഏറ്റെടുക്കാൻ കഴിയാതെ വന്നപ്പോഴാണ് മസ്ക് പിന്മാറിയതെന്നും ഇപ്പോൾ പ്രതികാരബുദ്ധിയോടെ കേസ് നൽകിയതാണെന്നും അവർ കൂട്ടിച്ചേർത്തു. മൂന്നാഴ്ച നീണ്ടുനിന്ന വിചാരണയിൽ ഇലോൺ മസ്ക്, സാം ആൾട്ട്മാൻ, മൈക്രോസോഫ്റ്റ് സിഇഒ സത്യ നാദെല്ല എന്നിവർ സാക്ഷികളായി ഹാജരായിരുന്നു.
നിലവിൽ 852 ബില്യൺ ഡോളർ മൂല്യമുള്ള ഓപ്പൺഎഐ, ചരിത്രത്തിലെ തന്നെ ഏറ്റവും വലിയ ഐപിഒയിലേക്ക് നീങ്ങുന്നതിനിടയിലാണ് ഈ നിർണായക വിധി പുറത്തുവന്നിരിക്കുന്നത്. ചാറ്റ്ജിപിടിയുടെ വൻ വിജയത്തിന് പിന്നാലെ കമ്പനിയുടെ മൂല്യം കുതിച്ചുയർന്നപ്പോൾ ആൾട്ട്മാനും സംഘവും കോടികളുടെ അവിഹിത സമ്പാദ്യമുണ്ടാക്കിയെന്ന മസ്കിന്റെ വാദങ്ങൾ ഇതോടെ കോടതി തള്ളി. ഇലോൺ മസ്ക് 2023-ൽ ആരംഭിച്ച എക്സ്എഐ എന്ന മത്സര കമ്പനിയെ സഹായിക്കാനും ഓപ്പൺഎഐയെ തകർക്കാനുമാണ് ഈ കേസ് നൽകിയതെന്നാണ് ഓപ്പൺഎഐ വ്യക്തമാക്കുന്നത്. കോടതി വിധി മസ്കിന് വലിയ തിരിച്ചടിയായപ്പോൾ ഓപ്പൺഎഐക്കും സാം ആൾട്ട്മാനും ഇത് വൻ നിയമപരമായ വിജയമായി മാറി.
Summary: In a major legal setback for billionaire Elon Musk, a US federal court has dismissed his lawsuit against ChatGPT-maker OpenAI and its CEO Sam Altman. The nine-person advisory jury unanimously determined that Musk waited too long to file his lawsuit, thereby missing the legal deadline under the statute of limitations.
