ചെന്നൈ: തമിഴ്നാട് നിയമസഭാ തിരഞ്ഞെടുപ്പിലെ ദ്രാവിഡ മുന്നേറ്റ കഴകത്തിന്റെ (DMK) അപ്രതീക്ഷിത പരാജയത്തിന് പിന്നാലെ, പാർട്ടിക്ക് വേണ്ടി തിരഞ്ഞെടുപ്പ് തന്ത്രങ്ങളും പ്രചാരണവും ഏകോപിപ്പിച്ച ‘പെൻ’ എന്ന രാഷ്ട്രീയ കൺസൾട്ടിങ് കമ്മ്യൂണിക്കേഷൻസ് കമ്പനിക്കെതിരെ ഉയർന്ന വിമർശനങ്ങളിൽ വിശദീകരണവുമായി മുൻ മുഖ്യമന്ത്രി എം. കെ. സ്റ്റാലിന്റെ മരുമകനും കമ്പനി മേധാവിയുമായ ശബരീശൻ വേദമൂർത്തി രംഗത്ത്. ജനാധിപത്യത്തിൽ പൊതുവിമർശനങ്ങളും പരിശോധനകളും സ്വാഭാവികമാണെന്നും അതിനെ സ്വാഗതം ചെയ്യുന്നുവെന്നും പുറത്തിറക്കിയ ഔദ്യോഗിക പ്രസ്താവനയിൽ ശബരീശൻ വ്യക്തമാക്കി.(Stalin Son In Law Sabareesan Defends Consulting Firm PEN After DMK Election Defeat)
തിരഞ്ഞെടുപ്പ് പരാജയത്തിന്റെ പ്രധാന ഉത്തരവാദിത്തം ‘പെൻ’ എന്ന സ്ഥാപനത്തിനാണെന്ന രീതിയിൽ പാർട്ടിക്ക് അകത്തുനിന്നും പുറത്തുനിന്നും കടുത്ത ആരോപണങ്ങൾ ഉയർന്ന സാഹചര്യത്തിലാണ് ഈ പ്രതികരണം. തമിഴ്നാട് പോലൊരു വലിയ സംസ്ഥാനത്തെ സങ്കീർണ്ണമായ രാഷ്ട്രീയ അടിയൊഴുക്കുകളെയും തിരഞ്ഞെടുപ്പ് ഫലത്തെയും ഒരു ഒറ്റപ്പെട്ട കാരണത്തിലേക്ക് മാത്രമായി ചുരുക്കിക്കാണുന്നത് യാഥാർത്ഥ്യത്തിന് നിരക്കുന്നതല്ലെന്ന് ശബരീശൻ പറഞ്ഞു. വലിയൊരു രാഷ്ട്രീയ പ്രതിഫലനത്തെ ലളിതവൽക്കരിച്ച് ഒറ്റ വിവരണത്തിലേക്ക് ഒതുക്കുന്നത് ഒന്നിനും പരിഹാരമാകില്ലെന്നും അത് യഥാർത്ഥ വസ്തുതകളെ പ്രതിഫലിപ്പിക്കുന്നില്ലെന്നും അദ്ദേഹം കൂട്ടിച്ചേർത്തു.
രാഷ്ട്രീയ ആശയവിനിമയം ശക്തമാക്കുക, ഡിജിറ്റൽ മാധ്യമങ്ങളിലൂടെ ജനങ്ങളിലേക്ക് കൂടുതൽ വേഗത്തിൽ ഇറങ്ങിച്ചെല്ലുക, പൊതു-രാഷ്ട്രീയ രംഗങ്ങളിൽ ആധുനിക പ്രചാരണ രീതികൾ പരിചയപ്പെടുത്തുക എന്നീ ലക്ഷ്യങ്ങളോടെയാണ് ‘പെൻ’ രൂപീകരിച്ചതെന്ന് ശബരീശൻ പ്രസ്താവനയിൽ ഓർമ്മിപ്പിച്ചു. തിരഞ്ഞെടുപ്പ് തിരിച്ചടിയുടെ പശ്ചാത്തലത്തിൽ പാളിച്ചകൾ എന്തൊക്കെയെന്ന് ആത്മാർത്ഥമായി സ്വയം വിലയിരുത്താനും മനസ്സിലാക്കാനും തങ്ങളുടെ സംഘടന പ്രതിജ്ഞാബദ്ധമാണ്. മുൻ മുഖ്യമന്ത്രി സ്റ്റാലിൻ കാണിച്ചുതന്ന വഴി പിന്തുടർന്ന്, ജനങ്ങളുടെ ശബ്ദം ആഴത്തിൽ ശ്രവിക്കാനും തങ്ങളുടെ പോരായ്മകൾ സത്യസന്ധമായി മനസ്സിലാക്കാനും ‘പെൻ’ മുന്നിലുണ്ടാകുമെന്നും ശബരീശൻ വ്യക്തമാക്കി.
Story Summary
Sabareesan Vedamurthy, son-in-law of former CM M K Stalin, defended his political consulting firm PEN following DMK’s unexpected defeat in the 2026 Tamil Nadu Assembly elections. Responding to internal criticism blaming PEN for the electoral setback, Sabareesan stated that oversimplifying a massive political outcome into a single narrative does not reflect reality and affirmed the firm’s commitment to honest introspection.
