ന്യൂഡൽഹി: സ്പേസ് എക്സിന്റെ റെക്കോർഡ് ഐപിഒ (IPO) നേട്ടത്തിന് പിന്നാലെ ലോകത്തിലെ ആദ്യത്തെ ലക്ഷം കോടീശ്വരനായി ഇലോൺ മസ്ക്. 75 ബില്യൺ ഡോളറിന്റെ റെക്കോർഡ് ഐപിഒ ആണ് സ്പേസ് എക്സ് വ്യാഴാഴ്ച പൂർത്തിയാക്കിയത് (Elon Musk First Trillionaire). ഇതോടെ മസ്കിന്റെ ആകെ ആസ്തി 1.1 ട്രില്യൺ ഡോളറിലെത്തി. ലോക സാമ്പത്തിക ചരിത്രത്തിൽ ആദ്യമായാണ് ഒരാൾ ഇത്രയും വലിയ സമ്പത്ത് സ്വന്തമാക്കുന്നത്. ഫോബ്സ് പുറത്തുവിട്ട കണക്കുകൾ പ്രകാരം, രണ്ടാമതുള്ള ലാരി പേജിനേക്കാൾ വളരെ മുന്നിലാണ് മസ്ക്.
ടെസ്ല, സ്പേസ് എക്സ്, എക്സ്, ന്യൂറലിങ്ക് തുടങ്ങി മസ്കിന്റെ സാമ്രാജ്യത്തിന്റെ ഭാഗമായ കമ്പനികൾ ആഗോള സാമ്പത്തിക, സാങ്കേതിക രംഗങ്ങളിൽ ചെലുത്തുന്ന സ്വാധീനം ചെറുതല്ല. ടെസ്ലയെ ലോകത്തെ ഏറ്റവും മൂല്യമുള്ള വാഹന നിർമ്മാണ കമ്പനിയാക്കി മാറ്റിയ മസ്ക്, ബഹിരാകാശ ഗവേഷണ രംഗത്തും വലിയ കുതിച്ചുചാട്ടമാണ് സ്പേസ് എക്സിലൂടെ നടത്തിയിരിക്കുന്നത്. പലപ്പോഴും വിവാദങ്ങൾക്കിടയാക്കുന്ന അദ്ദേഹത്തിന്റെ ശൈലി വിമർശനങ്ങൾക്കും വഴിവെക്കാറുണ്ട്. അമേരിക്കൻ പ്രസിഡന്റ് ഡൊണാൾഡ് ട്രംപുമായുള്ള അടുപ്പവും തുടർന്നുണ്ടായ രാഷ്ട്രീയ അഭിപ്രായവ്യത്യാസങ്ങളും ചർച്ചയായിരുന്നു.
എന്നാൽ, മസ്കിന്റെ ദീർഘവീക്ഷണത്തിലും ബിസിനസ്സ് തന്ത്രങ്ങളിലും നിക്ഷേപകർക്കുള്ള വിശ്വാസം അദ്ദേഹത്തിന്റെ ആസ്തി കുതിച്ചുയരാൻ കാരണമായി. സാമ്പത്തിക വിദഗ്ധർ ഇതിനെ ‘ഇലോൺ പ്രീമിയം’ എന്നാണ് വിശേഷിപ്പിക്കുന്നത്. പരമ്പരാഗത സാമ്പത്തിക മാനദണ്ഡങ്ങൾക്ക് അപ്പുറം മസ്കിന്റെ കാഴ്ചപ്പാടുകളിലുള്ള വിശ്വാസമാണ് പലപ്പോഴും കമ്പനികളുടെ വിപണി മൂല്യം വർദ്ധിപ്പിക്കുന്നത്. ജെപി മോർഗൻ സിഇഒ ജാമി ഡിമോൺ ഉൾപ്പെടെയുള്ള പ്രമുഖർ മസ്കിനെ നമ്മുടെ കാലഘട്ടത്തിലെ ‘ഐൻസ്റ്റീൻ’ എന്നാണ് വിശേഷിപ്പിക്കുന്നത്. ടെസ്ലയുടെ വളർച്ചയും സ്പേസ് എക്സിന്റെ ബഹിരാകാശ ദൗത്യങ്ങളും ഭാവിയിലും സാങ്കേതികവിദ്യയുടെ അതിരുകൾ ഭേദിക്കുമെന്ന പ്രതീക്ഷയിലാണ് നിക്ഷേപകർ.
Story Summary:
Elon Musk has become the world’s first trillionaire following the record-breaking $75 billion IPO of his aerospace company, SpaceX. With his total net worth now exceeding $1.1 trillion, Musk solidifies his position as the most influential figure in global tech, despite ongoing debates regarding his governance style, political involvement, and the unconventional “Elon premium” that drives his companies’ valuations.
