നേയ്പിഡോ: മ്യാൻമറിലെ ജനാധിപത്യ പോരാളിയും മുൻ ഭരണാധികാരിയുമായ ആങ് സാൻ സൂചിയെ ജയിലിൽ നിന്ന് വീട്ടുതടങ്കലിലേക്ക് മാറ്റി (Aung San Suu Kyi Sentence Reduction). ബുദ്ധമത വിശ്വാസികൾക്കിടയിലെ വിശുദ്ധ ദിനമായ കാസൺ പൂർണ്ണചന്ദ്ര ദിനത്തോടനുബന്ധിച്ച് പ്രഖ്യാപിച്ച പൊതുമാപ്പിന്റെ ഭാഗമായാണ് നടപടി. 80 വയസ്സുകാരിയായ സൂചിയുടെ ജയിൽ ശിക്ഷയിൽ ഗണ്യമായ ഇളവും മ്യാൻമർ സൈനിക സർക്കാർ പ്രഖ്യാപിച്ചിട്ടുണ്ട്.
വീട്ടുതടങ്കലിലേക്ക്: നേയ്പിഡോയിലെ പ്രധാന ജയിലിൽ നിന്ന് സൂചിയെ ഔദ്യോഗിക വസതിയിലേക്ക് മാറ്റി. 2021 മെയ് മാസത്തിന് ശേഷം ആദ്യമായി സൂചിയുടെ പുതിയ ചിത്രവും സൈനിക സർക്കാർ പുറത്തുവിട്ടു. പോലീസ്, സൈനിക ഉദ്യോഗസ്ഥർക്കൊപ്പം ഇരിക്കുന്ന ചിത്രമാണിത്. വിവിധ കുറ്റങ്ങൾ ചുമത്തി 33 വർഷത്തെ ജയിൽ ശിക്ഷയായിരുന്നു നേരത്തെ സൂചിക്ക് വിധിച്ചിരുന്നത്. പുതിയ ഇളവുകൾ പ്രകാരം ഇത് 18 വർഷമായി കുറച്ചു. ഇതിൽ അഞ്ച് വർഷത്തോളം ശിക്ഷാ കാലാവധി ഇതിനോടകം പൂർത്തിയായിട്ടുണ്ട്.
സൈനിക തലവൻ ജനറൽ മിൻ ആങ് ഹ്ലെയിങ് ഏപ്രിൽ 10-ന് പ്രസിഡന്റായി ചുമതലയേറ്റതിന് പിന്നാലെയാണ് ഈ നീക്കം. ഭരണകൂടത്തിന്റെ പ്രതിച്ഛായ വർദ്ധിപ്പിക്കാനും അന്താരാഷ്ട്ര സമ്മർദ്ദം കുറയ്ക്കാനുമുള്ള ശ്രമമാണിതെന്ന് വിലയിരുത്തപ്പെടുന്നു. സൂചിയുടെ വിശ്വസ്തനായ മുൻ പ്രസിഡന്റ് വിൻ മയിന്റിനെയും നേരത്തെ മോചിപ്പിച്ചിരുന്നു. സൂചിയെ വീട്ടുതടങ്കലിലേക്ക് മാറ്റിയത് രാഷ്ട്രീയ പരിഹാരത്തിലേക്കുള്ള പ്രധാന ചുവടുവെപ്പാണെന്ന് ഐക്യരാഷ്ട്രസഭ സെക്രട്ടറി ജനറൽ അന്റോണിയോ ഗുട്ടെറസ് പ്രതികരിച്ചു. എന്നാൽ, ഇത് കേവലം പബ്ലിക് റിലേഷൻസ് തന്ത്രം മാത്രമാണെന്നും സൈനിക ഭരണം തുടരാനുള്ള നീക്കമാണിതെന്നും ‘ബർമ്മ ക്യാമ്പയിൻ യുകെ’ പോലുള്ള മനുഷ്യാവകാശ സംഘടനകൾ ആരോപിച്ചു.
2021 ഫെബ്രുവരി 1-നാണ് ജനാധിപത്യ സർക്കാരിനെ അട്ടിമറിച്ച് മ്യാൻമറിൽ സൈന്യം അധികാരം പിടിച്ചെടുത്തത്. ഇതിനെത്തുടർന്നുണ്ടായ ആഭ്യന്തര യുദ്ധത്തിൽ ആയിരക്കണക്കിന് ആളുകൾ കൊല്ലപ്പെടുകയും 22,000-ത്തിലധികം രാഷ്ട്രീയ തടവുകാർ ജയിലിലാകുകയും ചെയ്തിട്ടുണ്ട്.
Summary: Former Myanmar leader Aung San Suu Kyi has been moved from prison to house arrest as part of a Buddhist holiday amnesty. Her 33-year sentence has been reduced to 18 years by the military government. This move follows the inauguration of Gen. Min Aung Hlaing as president and is seen by many as an effort to improve the junta’s international image. While the UN welcomed the step toward political dialogue, rights groups remain skeptical, calling it a PR stunt to legitimize military rule.
