മുംബൈ: അടുത്ത മാസം നടക്കാനിരിക്കുന്ന അഫ്ഗാനിസ്ഥാനെതിരെയുള്ള ഏക ടെസ്റ്റ് മത്സരത്തിനും മൂന്ന് മത്സരങ്ങളടങ്ങിയ ഏകദിന പരമ്പരയ്ക്കുമുള്ള ഇന്ത്യൻ ക്രിക്കറ്റ് ടീമിനെ മേയ് 19-ന് പ്രഖ്യാപിക്കും (India vs Afghanistan series 2026). വരാനിരിക്കുന്ന കടുത്ത മത്സരക്രമങ്ങളും ലോകകപ്പും മുന്നിൽ കണ്ട്, മുൻനിര പേസർ ജസ്പ്രീത് ബുംറയുടെ ജോലിഭാരം (Workload) കുറയ്ക്കാൻ അജിത് അഗാർക്കറുടെ നേതൃത്വത്തിലുള്ള സെലക്ഷൻ കമ്മിറ്റി തീരുമാനിച്ചു. ഇതിനാൽ അഫ്ഗാനെതിരെ ഏതെങ്കിലും ഒരു ഫോർമാറ്റിൽ മാത്രമേ ബുംറ കളിക്കുകയുള്ളൂ.
ജൂൺ 6 മുതൽ 10 വരെ ന്യൂ ചണ്ഡിഗഡിലെ മുള്ളൻപൂര് സ്റ്റേഡിയത്തിലാണ് ലോക ടെസ്റ്റ് ചാമ്പ്യൻഷിപ്പിൻ്റെ ഭാഗമല്ലാത്ത ഏക ടെസ്റ്റ് മത്സരം. തുടർന്ന് ജൂൺ 14 (ധരംശാല), 17 (ലക്നൗ), 20 (ചെന്നൈ) തീയതികളിൽ ഏകദിന പരമ്പര നടക്കും. സീനിയർ താരങ്ങളായ രോഹിത് ശർമ്മയും വിരാട് കോലിയും ഏകദിന ടീമിലേക്ക് തിരിച്ചെത്തും.
ബുംറയ്ക്ക് വിശ്രമം; പേസ് നിരയെ നയിക്കാൻ സിറാജും പ്രസിദ്ധും
ഐപിഎല്ലിലെ കടുത്ത മത്സരങ്ങൾക്ക് ശേഷം എത്തുന്ന ബുംറ രണ്ടാഴ്ച നീളുന്ന പരമ്പരയിൽ പൂർണ്ണമായി കളിക്കില്ല. ബുംറ ടെസ്റ്റിൽ കളിക്കുകയാണെങ്കിൽ ഏകദിന പരമ്പരയിൽ നിന്ന് വിശ്രമം അനുവദിക്കും. മറിച്ച് ഏകദിനത്തിലാണ് കളിക്കുന്നതെങ്കിൽ ടെസ്റ്റിൽ വിശ്രമം നൽകും. ബുംറ ടെസ്റ്റിൽ കളിച്ചില്ലെങ്കിൽ മുഹമ്മദ് സിറാജും പ്രസിദ്ധ് കൃഷ്ണയുമാകും ഇന്ത്യൻ പേസ് നിരയെ നയിക്കുക.
പ്രിൻസ് യാദവും അക്വിബ് നബിയും ടീമിലേക്ക്?
യുവ പേസർ ഹർഷിത് റാണയ്ക്ക് പരിക്കേറ്റ പശ്ചാത്തലത്തിൽ ഡൽഹിയുടെ യുവതാരം പ്രിൻസ് യാദവിനെ ഏകദിന ടീമിലേക്ക് പരിഗണിക്കാൻ സാധ്യതയേറി. വിജയ് ഹസാരെ ട്രോഫിയിൽ 17 വിക്കറ്റും ഐപിഎല്ലിൽ ലക്നൗവിനായി 16 വിക്കറ്റും വീഴ്ത്തി പ്രിൻസ് തിളങ്ങിയിരുന്നു. ഐപിഎല്ലിൽ വിരാട് കോലിയെ മനോഹരമായ ഇൻസ്വിംഗറിലൂടെ പുറത്താക്കി പ്രിൻസ് കയ്യടി നേടിയിരുന്നു. പരിക്കിന്റെ പിടിയിലായ ആകാശ് ദീപിനും ഹർഷിത് റാണയ്ക്കും പകരം, രഞ്ജി ട്രോഫിയിൽ 60 വിക്കറ്റുകൾ വീഴ്ത്തിയ ജമ്മു കശ്മീർ പേസർ അക്വിബ് നബിയെ റിസർവ് പേസറായി പരിഗണിച്ചേക്കും. നിതീഷ് കുമാർ റെഡ്ഡിയും ഈ സ്ഥാനത്തിനായി രംഗത്തുണ്ട്.
ടെസ്റ്റ് ടീമിൽ വലിയ പരീക്ഷണങ്ങളില്ല; പടിക്കലിന് സാധ്യത
വരാനിരിക്കുന്ന ശ്രീലങ്ക, ന്യൂസിലൻഡ് പര്യടനങ്ങൾ മുന്നിൽ കണ്ട് ടെസ്റ്റ് ടീമിൽ വലിയ പരീക്ഷണങ്ങൾക്ക് സെലക്ടർമാർ മുതിർന്നേക്കില്ല. സായ് സുദർശന് പകരം മലയാളി താരം ദേവ്ദത്ത് പടിക്കൽ മൂന്നാം നമ്പറിലേക്ക് എത്തിയേക്കും. വാഷിംഗ്ടൺ സുന്ദർ, ധ്രുവ് ജൂറെൽ എന്നിവരും ഈ സ്ഥാനത്തിനായി പരിഗണനയിലുണ്ട്. രവീന്ദ്ര ജഡേജ, കുൽദീപ് യാദവ്, വാഷിംഗ്ടൺ സുന്ദർ എന്നിവർ സ്പിന്നര്മാരായി എത്തുമ്പോൾ അക്സർ പട്ടേലിന് പകരം മാനവ് സുതറിന് അവസരം ലഭിച്ചേക്കും. വിക്കറ്റ് കീപ്പർമാരായി റിഷഭ് പന്തും ധ്രുവ് ജൂറെലും ടീമിലുണ്ടാകും.
Story Summary: The Indian cricket squad for the upcoming one-off Test and 3-match ODI series against Afghanistan will be announced on May 19. To manage his workload, premier pacer Jasprit Bumrah will likely play only one format, while youngsters like Prince Yadav, Devdutt Padikkal, and Aquib Nabi are tracking for selections.
