ബ്യൂണസ് ഐറിസ്: ഫുട്ബോൾ ഇതിഹാസം ഡീഗോ മറഡോണയുടെ മരണവുമായി ബന്ധപ്പെട്ട പുനർവിചാരണ അർജന്റീനയിൽ ചൊവ്വാഴ്ച ആരംഭിച്ചു (Diego Maradona Death Trial). ചികിത്സയിൽ വീഴ്ച വരുത്തിയെന്നാരോപിച്ച് ഡോക്ടർമാരും നഴ്സുമാരും ഉൾപ്പെടെയുള്ള ഏഴ് മെഡിക്കൽ സംഘാംഗങ്ങൾക്കെതിരെ നരഹത്യാ കുറ്റമാണ് ചുമത്തിയിരിക്കുന്നത്. കഴിഞ്ഞ വർഷം നടന്ന ആദ്യ വിചാരണ അപ്രതീക്ഷിതമായി തടസ്സപ്പെട്ടതിനെത്തുടർന്നാണ് ഇപ്പോൾ വീണ്ടും നടപടികൾ തുടങ്ങുന്നത്.
2020 നവംബർ 25-ന് തന്റെ 60-ാം വയസ്സിലാണ് മറഡോണ അന്തരിച്ചത്. തലച്ചോറിലെ ശസ്ത്രക്രിയയ്ക്ക് ശേഷം വീട്ടിൽ വിശ്രമത്തിലിരിക്കെ ഹൃദയാഘാതം മൂലമായിരുന്നു അന്ത്യം. എന്നാൽ മറഡോണയ്ക്ക് നൽകിയ പരിചരണത്തിൽ മെഡിക്കൽ സംഘം കടുത്ത അനാസ്ഥ കാട്ടിയെന്നും ആവശ്യമായ ചികിത്സാ പ്രോട്ടോക്കോളുകൾ ലംഘിച്ചെന്നുമാണ് പ്രോസിക്യൂഷൻ വാദിക്കുന്നത്. മറഡോണ താമസിച്ചിരുന്ന വീട് ചികിത്സയ്ക്ക് അനുയോജ്യമല്ലാത്ത ഒരു “ഹൊറർ തിയേറ്റർ” പോലെയായിരുന്നുവെന്നും പ്രോസിക്യൂഷൻ ആരോപിച്ചു.
മറഡോണയുടെ സ്വകാര്യ ഡോക്ടർമാരായ ലിയോപോൾഡോ ലൂക്ക്, സൈക്യാട്രിസ്റ്റ് അഗസ്റ്റിന കൊസാച്ചോവ് എന്നിവരുൾപ്പെടെ ഏഴ് പേരാണ് ഇപ്പോൾ വിചാരണ നേരിടുന്നത്. മറ്റൊരു നഴ്സിന്റെ വിചാരണ പിന്നീട് പ്രത്യേകമായി നടക്കും. കുറ്റം തെളിയിക്കപ്പെട്ടാൽ ഇവർക്ക് 8 മുതൽ 25 വർഷം വരെ തടവ് ശിക്ഷ ലഭിക്കാം. എന്നാൽ മറഡോണയുടെ ദീർഘകാലത്തെ ആരോഗ്യപ്രശ്നങ്ങളാണ് മരണകാരണമെന്നും ചികിത്സയിൽ വീഴ്ച വരുത്തിയിട്ടില്ലെന്നുമാണ് മെഡിക്കൽ സംഘത്തിന്റെ വാദം.
നേരത്തെ നടന്ന വിചാരണയ്ക്കിടെ വിധി പറയേണ്ട ജഡ്ജിമാരിലൊരാൾ കോടതി നിയമങ്ങൾ ലംഘിച്ച് ഡോക്യുമെന്ററി സംഘത്തിന് അഭിമുഖം നൽകിയത് വലിയ വിവാദമായിരുന്നു. ഇതേത്തുടർന്നാണ് പഴയ വിചാരണ റദ്ദാക്കി പുതിയ ബെഞ്ചിന് മുന്നിൽ വീണ്ടും വാദം കേൾക്കാൻ തീരുമാനിച്ചത്. നൂറോളം സാക്ഷികളെ വിചാരണയുടെ ഭാഗമായി വിസ്തരിക്കും.
Summary: A new trial over the death of soccer legend Diego Maradona began in Argentina, with seven medical team members charged with negligent homicide. The retrial in San Isidro follows a mistrial last year caused by a judge’s breach of judicial rules. Prosecutors allege that the medical team acted recklessly and ignored treatment protocols during Maradona’s recovery from brain surgery in 2020. If convicted, the defendants, including neurosurgeon Leopoldo Luque and psychiatrist Agustina Cosachov, could face 8 to 25 years in prison.
