ബെംഗളൂരു: ഐപിഎൽ 2026 സീസണിലെ റോയൽ ചലഞ്ചേഴ്സ് ബെംഗളൂരു – സൺറൈസേഴ്സ് ഹൈദരാബാദ് മത്സരത്തിനിടയിൽ വിരാട് കോഹ്ലിയും ട്രാവിസ് ഹെഡും തമ്മിലുണ്ടായ ഓൺ-ഫീൽഡ് തർക്കത്തിന് പിന്നാലെ, ട്രാവിസ് ഹെഡിന്റെ ഭാര്യ ജെസ്സിക്ക ഹെഡിന് നേരെ സോഷ്യൽ മീഡിയയിൽ കടുത്ത സൈബർ ആക്രമണം (Cyber Abuse on Travis Head Wife). മത്സരത്തിൽ ഹൈദരാബാദ് വിജയിച്ചതിന് പിന്നാലെ കോഹ്ലി ട്രാവിസ് ഹെഡിന് ഹാൻഡ്ഷേക്ക് നൽകാതെ തിരിഞ്ഞുനടന്നത് വലിയ ചർച്ചയായിരുന്നു. മത്സരത്തിനിടയിൽ ഇരുവരും തമ്മിൽ വാഗ്വാദങ്ങൾ നടന്നിരുന്നതായും ഇതിന്റെ ദേഷ്യത്തിലാണ് കോഹ്ലി ഹാൻഡ്ഷേക്ക് നിരസിച്ചതെന്നും കമന്റേറ്ററായിരുന്ന മുൻ ഇന്ത്യൻ താരം ഇർഫാൻ പഠാൻ വെളിപ്പെടുത്തിയിരുന്നു. എന്നാൽ ഇതിന് പിന്നാലെ കോഹ്ലിയുടെ ആരാധകരിൽ ചിലർ ട്രാവിസ് ഹെഡിന്റെ ഭാര്യ ജെസ്സിക്കയെയും അവരുടെ കുടുംബത്തെയും ലക്ഷ്യമിട്ട് സോഷ്യൽ മീഡിയയിൽ അധിക്ഷേപകരമായ കമന്റുകളുമായി രംഗത്തെത്തുകയായിരുന്നു.
2023-ലെ ഏകദിന ലോകകപ്പ് ഫൈനലിൽ രോഹിത് ശർമ്മയെ പുറത്താക്കാൻ ട്രാവിസ് ഹെഡ് ഉജ്ജ്വലമായ ക്യാച്ച് എടുത്തപ്പോഴും ജെസ്സിക്കയ്ക്ക് നേരെ സമാനമായ രീതിയിൽ സൈബർ ആക്രമണം ഉണ്ടായിരുന്നു. നിലവിലെ മോശം അനുഭവത്തെക്കുറിച്ച് ഓസ്ട്രേലിയൻ മാധ്യമമായ ‘ദി അഡ്വർടൈസറിനോട്’ പ്രതികരിക്കവെ, കളിയിലെ ആവേശം മനസ്സിലാക്കാമെങ്കിലും മൈതാനത്തിന് പുറത്ത് തങ്ങൾ സാധാരണ മനുഷ്യരാണെന്ന കാര്യം മറക്കരുതെന്ന് ജെസ്സിക്ക ഓർമ്മിപ്പിച്ചു. കായികരംഗത്ത് താരങ്ങളുടെയും കുടുംബത്തിന്റെയും മാനസികാരോഗ്യത്തിന് പ്രാധാന്യം നൽകേണ്ടതുണ്ടെന്നും സോഷ്യൽ മീഡിയയിൽ പരസ്പരം സ്നേഹവും പിന്തുണയും കാണിക്കാൻ ആളുകൾ തയ്യാറാകണമെന്നും അവർ കൂട്ടിച്ചേർത്തു. ഐപിഎൽ ആരാധക സംസ്കാരത്തിന്റെ ഇരുണ്ട വശങ്ങളെ വീണ്ടും തുറന്നുകാട്ടുന്നതാണ് ഈ സംഭവം.
Summary: Travis Head’s wife, Jessica Head, faced severe online abuse from fans following an on-field clash and a snubbed handshake between Virat Kohli and the SRH batter during an IPL 2026 match. Speaking to Australian media, Jessica highlighted the importance of mental health and urged fans to remember that there are real families behind the game. Former all-rounder Irfan Pathan confirmed that heated on-field banter during the game led to the post-match handshake controversy.
