പാലക്കാട്: റെയിൽവേ സ്റ്റേഷനിൽ ഓടിത്തുടങ്ങിയ ട്രെയിനിൽ കയറാൻ ശ്രമിക്കുന്നതിനിടെ ട്രാക്കിലേക്ക് വീണ് യാത്രക്കാരന്റെ വലതു കാൽ അറ്റുപോയി (Ottapalam train accident). പാലക്കാട് ഒറ്റപ്പാലം റെയിൽവേ സ്റ്റേഷനിലാണ് നാടിനെ നടുക്കിയ ഈ ദാരുണ അപകടമുണ്ടായത്. അപകടത്തിൽ പരിക്കേറ്റത് ഒറ്റപ്പാലം പൂളക്കുണ്ട് സ്വദേശിയായ സിദ്ദിഖിനാണ്.
സ്റ്റേഷനിൽ നിന്നും എടുത്തുതുടങ്ങിയ ട്രെയിനിലേക്ക് ഇയാൾ വേഗത്തിൽ ഓടിക്കയറാൻ ശ്രമിക്കുകയായിരുന്നു. ഇതിനിടെ പിടിവിട്ട് കാൽ വഴുതി പ്ലാറ്റ്ഫോമിനും ട്രെയിനിനും ഇടയിലൂടെ ട്രാക്കിലേക്ക് വീഴുകയായിരുന്നു. അപകടത്തെ തുടർന്ന് ട്രെയിൻ നിർത്തിയാണ് ഇയാളെ പുറത്തെടുത്തത്.
റെയിൽവേ ജീവനക്കാരും യാത്രക്കാരും ചേർന്ന് ട്രാക്കിൽ ഏറെനേരം തിരച്ചിൽ നടത്തിയ ശേഷമാണ് മുറിഞ്ഞുപോയ കാലിന്റെ ഭാഗം കണ്ടെത്താനായത്. ഗുരുതരമായി പരിക്കേറ്റ സിദ്ദിഖിനെ ഉടൻ തന്നെ റെയിൽവേ അധികൃതരും പോലീസും ചേർന്ന് ഒറ്റപ്പാലം താലൂക്ക് ആശുപത്രിയിൽ പ്രവേശിപ്പിച്ചു. ഇയാളുടെ നില ഗുരുതരമായി തുടരുകയാണെന്നാണ് ആശുപത്രി അധികൃതർ നൽകുന്ന വിവരം.
Story Summary: A passenger named Siddique from Poolakkund sustained severe injuries after his leg was severed while attempting to board a moving train at the Ottapalam railway station. The severed part of his leg was recovered from the track after a lengthy search, and he was rushed to the Ottapalam Taluk Hospital in critical condition.
