കൊൽക്കത്ത: സ്ത്രീ ശാക്തീകരണവും യാത്രാസൗകര്യങ്ങളും വർദ്ധിപ്പിക്കുന്നതിന്റെ ഭാഗമായി സംസ്ഥാനത്തെ മുഴുവൻ സർക്കാർ ബസുകളിലും വനിതകൾക്ക് സൗജന്യ യാത്ര പ്രഖ്യാപിച്ച് പശ്ചിമ ബംഗാൾ സർക്കാർ. വരാനിരിക്കുന്ന ജൂൺ 1 മുതൽ പുതിയ ഉത്തരവ് രാജ്യത്ത് നിലവിൽ വരും. മേയ് 21-നാണ് ഇത് സംബന്ധിച്ച ഔദ്യോഗിക വിജ്ഞാപനം ബംഗാൾ ഗതാഗത വകുപ്പ് പുറത്തിറക്കിയത്.(West Bengal Free Bus Travel For Women Scheme June 1 Launch)
സംസ്ഥാനത്തെ ഹ്രസ്വദൂര-ദീർഘദൂര സർവീസുകൾ ഉൾപ്പെടെയുള്ള എല്ലാ വിഭാഗം സർക്കാർ ബസുകളിലും പശ്ചിമ ബംഗാളിലെ മുഴുവൻ വനിതകൾക്കും ഈ ആനുകൂല്യം ലഭ്യമാകുമെന്ന് വിജ്ഞാപനത്തിൽ വ്യക്തമാക്കുന്നു. പദ്ധതി കൃത്യമായി നടപ്പിലാക്കുന്നതിനായി ഗുണഭോക്താക്കൾക്ക് ക്യൂആർ കോഡും ഫോട്ടോയും പേരും അടങ്ങിയ ഡിജിറ്റൽ ‘സ്മാർട്ട് കാർഡ്’ സർക്കാർ വിതരണം ചെയ്യും. ഇതിനായി അതത് പരിധിയിലുള്ള ബി.ഡി.ഒ അല്ലെങ്കിൽ എസ്.ഡി.ഒ ഓഫീസുകളിലാണ് അപേക്ഷ സമർപ്പിക്കേണ്ടത്.
കാർഡിനായി അപേക്ഷിക്കുമ്പോൾ താഴെ പറയുന്ന ഏതെങ്കിലും ഒരു തിരിച്ചറിയൽ രേഖയും ഫോട്ടോയും സമർപ്പിക്കേണ്ടതുണ്ട്:
വോട്ടർ ഐഡി കാർഡ് (EPIC)
റേഷൻ കാർഡ് / തൊഴിലുറപ്പ് കാർഡ് (VB-G RAMG Job Card)
ഡ്രൈവിംഗ് ലൈസൻസ്, പാൻ കാർഡ്, പാസ്പോർട്ട്
ആയുഷ്മാൻ ഭാരത് ഹെൽത്ത് കാർഡ്
ഫോട്ടോ പതിച്ച പെൻഷൻ രേഖകൾ
കേന്ദ്ര/സംസ്ഥാന സർക്കാർ അല്ലെങ്കിൽ പൊതുമേഖലാ സ്ഥാപനങ്ങൾ നൽകിയിട്ടുള്ള സർവീസ് ഐഡി കാർഡുകൾ
സ്കൂൾ/കോളേജ്/യൂണിവേഴ്സിറ്റികൾ നൽകുന്ന ഔദ്യോഗിക ഐഡി കാർഡ്
മറ്റ് സർക്കാർ അംഗീകൃത തിരിച്ചറിയൽ രേഖകൾ
സ്മാർട്ട് കാർഡുകൾ പൂർണ്ണമായി വിതരണം ചെയ്യുന്നത് വരെയുള്ള ഇടക്കാലയളവിൽ, മുകളിൽ പറഞ്ഞ ഏതെങ്കിലും ഒരു ഫോട്ടോ പതിച്ച തിരിച്ചറിയൽ രേഖ കാണിച്ച് സ്ത്രീകൾക്ക് സൗജന്യമായി യാത്ര ചെയ്യാം. ബസിലുള്ള കണ്ടക്ടർ ഐഡി പരിശോധിച്ച് ഉറപ്പുവരുത്തിയ ശേഷം സ്ത്രീകൾക്ക് ‘സീറോ വാല്യൂ ടിക്കറ്റ്’ അല്ലെങ്കിൽ തെർമൽ പേപ്പർ ടിക്കറ്റ് നൽകുന്നതായിരിക്കും. മേയ് 16-ന് ധനകാര്യ വകുപ്പിന്റെയും മേയ് 18-ന് ചേർന്ന കാബിനറ്റ് യോഗത്തിന്റെയും അനുമതിയോടെയാണ് ഗവർണർ ഈ ചരിത്രപരമായ ഉത്തരവ് പുറപ്പെടുവിച്ചിരിക്കുന്നത്. 2026 ജൂൺ 1 മുതൽ പദ്ധതി സംസ്ഥാനത്തുടനീളം ഔദ്യോഗികമായി ആരംഭിക്കും.
Story Summary
The West Bengal government has announced free travel for women in all state-run buses starting June 1, 2026, to promote women’s empowerment. Beneficiaries can apply for a QR-coded digital Smart Card using valid identity proofs, while temporary ‘Zero Value Tickets’ will be issued in the interim period upon showing a photo ID.
