കൊൽക്കത്ത : പാർട്ടി ടിക്കറ്റിനെച്ചൊല്ലിയുള്ള വിവാദങ്ങൾക്ക് പിന്നാലെ വിമത എം.പി കാകോലി ഘോഷ് ദസ്തിദാറിന്റെ മകൻ ഡോ. ബൈദ്യനാഥ് ഘോഷ് ദസ്തിദാർ നിയമനടപടിയുമായി രംഗത്തെത്തി. ബരാസത്ത് നിയമസഭാ മണ്ഡലത്തിൽ മത്സരിക്കാൻ താൻ ടിക്കറ്റ് ആവശ്യപ്പെട്ടിട്ടില്ലെന്നും, ഇക്കാര്യം ഉന്നയിച്ച് മമത ബാനർജി ഉൾപ്പെടെയുള്ളവർ നടത്തിയ പരാമർശങ്ങൾ അപകീർത്തികരമാണെന്നും ചൂണ്ടിക്കാട്ടിയാണ് നോട്ടീസ്.(TMC Rebellion Dr Baidyanath Ghosh Dastidar Sends Legal Notice To Mamata Banerjee And Leaders)
ബരാസത്തിൽ മത്സരിക്കാൻ താൻ ടിക്കറ്റ് ആഗ്രഹിച്ചിരുന്നില്ലെന്നും തനിക്ക് അത്തരത്തിൽ ഒരു രാഷ്ട്രീയ മോഹവുമില്ലെന്നും ഡോ. ബൈദ്യനാഥ് വ്യക്തമാക്കി. തന്റെ മാതാവിന്റെ രാഷ്ട്രീയ നിലപാടുകളെ സ്വാധീനിക്കാൻ ഈ വിഷയം ഉപയോഗിക്കുകയാണെന്നും അദ്ദേഹം ആരോപിക്കുന്നു. ടിക്കറ്റിനായി താൻ അപേക്ഷിച്ചു എന്ന് പറയപ്പെടുന്ന സമയത്ത് താൻ മസാച്യുസെറ്റ്സ് ജനറൽ ഹോസ്പിറ്റലിൽ ന്യൂറോ ഇമേജിംഗ് വിഭാഗത്തിൽ ജോലി ചെയ്യുകയായിരുന്നുവെന്നും, അതിനാൽ തെരഞ്ഞെടുപ്പിൽ മത്സരിക്കുക എന്നത് അസാധ്യമായിരുന്നുവെന്നും നോട്ടീസിൽ പറയുന്നു.
കല്യാൺ ബാനർജി, മഹുവ മൊയ്ത്ര, സൗഗത റോയ്, സൊനാലി ഗുഹ തുടങ്ങിയ നേതാക്കൾ തനിക്കെതിരെ നടത്തിയ അപകീർത്തികരമായ പ്രസ്താവനകൾ പിൻവലിക്കണമെന്നും, 15 ദിവസത്തിനുള്ളിൽ പരസ്യമായി മാപ്പ് പറയണമെന്നുമാണ് ആവശ്യം. കലാപമുയർത്തിയ വിമത എം.പിമാരെ ‘ഗദ്ദാർ’ എന്ന് വിശേഷിപ്പിച്ച് മുതിർന്ന നേതാവ് കല്യാൺ ബാനർജി രംഗത്തെത്തിയിരുന്നു. പാർട്ടിയോട് കൂറില്ലെങ്കിൽ രാജിവെച്ച് ജനവിധി തേടാൻ കീർത്തി ആസാദ് ഉൾപ്പെടെയുള്ളവർ വെല്ലുവിളിക്കുകയും ചെയ്തു. ഇതിനിടയിലാണ് തങ്ങളുടെ തല മുറിച്ചാലും കുനിയുന്നില്ലെന്ന് കാകോലി ഘോഷ് ദസ്തിദാർ പ്രതികരിച്ചത്. വിമത ക്യാമ്പ് ലോക്സഭയിൽ പ്രത്യേക അംഗീകാരത്തിനായി നീക്കം ശക്തമാക്കിയതോടെ തൃണമൂൽ കോൺഗ്രസ് വലിയൊരു പ്രതിസന്ധിയിലൂടെയാണ് കടന്നുപോകുന്നത്.
Story Summary
Dr. Baidyanath Ghosh Dastidar, son of rebel TMC MP Kakoli Ghosh Dastidar, has issued a legal notice to Mamata Banerjee and several senior party leaders, demanding a public apology for falsely claiming he sought a political ticket from the Barasat constituency. This legal action escalates the internal turmoil within the TMC, as rebel MPs push for separate parliamentary recognition while party loyalists continue to label them as betrayers.
