ന്യൂഡൽഹി: ബിജെപി തനിക്ക് പാർട്ടിയിൽ ചേരാൻ വാഗ്ദാനം നൽകിയിരുന്നുവെന്നും എന്നാൽ അത് താൻ പൂർണ്ണമായും നിരസിച്ചുവെന്നും മുതിർന്ന തൃണമൂൽ കോൺഗ്രസ് നേതാവും എംപിയുമായ സൗഗത റോയ്. മമത ബാനർജിക്കൊപ്പം തന്നെ തുടരുമെന്ന് വ്യക്തമാക്കിയ സൗഗത റോയ്, താൻ വിജയിച്ച ചിഹ്നത്തെയും പാർട്ടിയെയും ഒറ്റിക്കൊടുക്കില്ലെന്നും വ്യക്തമാക്കി.(TMC MP Saugata Roy rejects BJP offer amid party’s internal crisis)
രാജ്യസഭാംഗം സുഖേന്ദു ശേഖർ റോയിയുടെ രാജി പാർട്ടിക്ക് വലിയ നഷ്ടമല്ലെന്ന് അദ്ദേഹം അഭിപ്രായപ്പെട്ടു. ഒരിക്കൽ പോലും തിരഞ്ഞെടുപ്പിൽ മത്സരിച്ചു ജയിച്ചിട്ടില്ലാത്ത ഒരാളുടെ അഭിപ്രായത്തിന് വലിയ വില കൽപ്പിക്കേണ്ടതില്ലെന്നും സൗഗത റോയ് പരിഹസിച്ചു. തിരഞ്ഞെടുപ്പ് തോൽവി ഉൾക്കൊള്ളാനുള്ള മാനസിക കരുത്ത് എല്ലാവർക്കും ഉണ്ടാകണമെന്നില്ലെന്നും, സാഹചര്യം മോശമാകുമ്പോൾ കൂറുമാറുന്നവരാണ് നിലവിൽ പാർട്ടിയെ വിട്ടുപോകുന്നതെന്നും അദ്ദേഹം ചൂണ്ടിക്കാട്ടി.
വിമത വിഭാഗം പാർട്ടിയുടെ തിരഞ്ഞെടുപ്പ് ചിഹ്നം സ്വന്തമാക്കാൻ ശ്രമിക്കുമെന്ന റിപ്പോർട്ടുകളെയും അദ്ദേഹം തള്ളിക്കളഞ്ഞു. തിരഞ്ഞെടുപ്പ് കമ്മീഷനാണ് ചിഹ്നം അനുവദിക്കുന്നത്, അല്ലാതെ എംഎൽഎമാരുടെ എണ്ണം നോക്കിയല്ല തീരുമാനമെടുക്കുന്നതെന്നും അദ്ദേഹം വ്യക്തമാക്കി. വിമതർക്ക് സ്വന്തമായി ഒരു അസംബ്ലി സീറ്റ് പോലും വിജയിപ്പിക്കാനുള്ള കരുത്തില്ലെന്നും ബിജെപിയുടെ പ്രലോഭനങ്ങളിൽ വീണാണ് ഇവർ പ്രവർത്തിക്കുന്നതെന്നും അദ്ദേഹം ആരോപിച്ചു.
മമത ബാനർജി തെരുവിലിറങ്ങി പ്രതിഷേധിച്ചാൽ തൃണമൂൽ കോൺഗ്രസ് വീണ്ടും അധികാരത്തിൽ തിരിച്ചെത്തുമെന്ന് അദ്ദേഹം ആത്മവിശ്വാസം പ്രകടിപ്പിച്ചു. നിലവിൽ ഡൽഹിയിൽ നടക്കുന്ന ഇന്ത്യ മുന്നണി യോഗത്തിൽ മമത ബാനർജി പങ്കെടുക്കുന്നത് പാർട്ടിയെ കൂടുതൽ ശക്തമാക്കുമെന്നും, ബിജെപിക്കെതിരായ പോരാട്ടത്തിൽ കൂടുതൽ പ്രതിപക്ഷ പാർട്ടികളുടെ പിന്തുണ തൃണമൂലിന് കരുത്തുപകരുമെന്നും സൗഗത റോയ് കൂട്ടിച്ചേർത്തു.
Story Summary
Senior Trinamool Congress MP Saugata Roy has confirmed receiving an offer to join the BJP but rejected it, asserting his loyalty to Mamata Banerjee. He dismissed the recent resignations of party rebels as insignificant, claiming they lack popular support, and expressed confidence that Mamata Banerjee would lead the party back to power.
