ബംഗളൂരു: മോഷണശ്രമത്തിനിടെ വീട്ടുകാരുടെ തല്ലു കിട്ടിയ കള്ളൻ ഒടുവിൽ വീട്ടുകാർക്കെതിരെ തന്നെ പോലീസിൽ പരാതി നൽകി. ബംഗളൂരു ആർ.ടി. നഗർ സ്വദേശിയായ അസ്ഗർ ഖാൻ എന്ന ഓട്ടോ ഡ്രൈവറാണ് ഈ വിചിത്ര പരാതിയുമായി പോലീസിനെ സമീപിച്ചത് (Thief files complaint against victims). ചൊക്കനഹള്ളി മെയിൻ റോഡിലുള്ള ഒരു വീട്ടിൽ മോഷണത്തിനായി അതിക്രമിച്ചു കയറിയപ്പോഴായിരുന്നു നാടകീയമായ സംഭവങ്ങൾ അരങ്ങേറിയത്. ഇലക്ട്രിക്കൽ സാധനങ്ങൾ മോഷ്ടിക്കാൻ ശ്രമിക്കുന്നതിനിടെ വീട്ടുകാർ ചോദ്യം ചെയ്തതോടെ തർക്കമുണ്ടാവുകയും അത് വലിയ അടിപിടിയിൽ കലാശിക്കുകയും ചെയ്തു.
വീട്ടുകാരെ മർദ്ദിക്കാൻ അസ്ഗർ തന്റെ സുഹൃത്തുക്കളായ റസാഖിനെയും ശ്യാമിനെയും സഹായത്തിന് വിളിച്ചു. തുടർന്നുണ്ടായ സംഘർഷത്തിൽ വീട്ടുടമയുടെ തലയ്ക്ക് സുഹൃത്തുക്കൾ ബിയർ കുപ്പികൊണ്ട് അടിക്കുകയും ചെയ്തു. ബഹളം കേട്ട് അയൽവാസികൾ ഓടിക്കൂടിയതോടെ അസ്ഗറിന്റെ സുഹൃത്തുക്കൾ രക്ഷപ്പെട്ടു. എന്നാൽ, സ്ഥലത്ത് കുടുങ്ങിപ്പോയ അസ്ഗറിനെ കൂടിനിന്നവരിൽ ആരോ ഒരാൾ മരക്കഷണം കൊണ്ട് തലയ്ക്കടിച്ചു. ഈ പരിക്കിന് ചികിത്സ തേടിയ ശേഷമാണ് തന്നെ മർദ്ദിച്ചവരെ കണ്ടെത്തണമെന്നാവശ്യപ്പെട്ട് അസ്ഗർ പോലീസിൽ പരാതി നൽകിയത്. നിലവിൽ അസ്ഗറിനും സുഹൃത്തുക്കൾക്കുമെതിരെ വീട്ടുകാരും, മർദ്ദനമേറ്റെന്ന് കാട്ടി അസ്ഗറും നൽകിയ പരാതികളിൽ പോലീസ് കേസെടുത്ത് അന്വേഷണം ആരംഭിച്ചു.
Summary: In a bizarre incident in Bengaluru, an auto driver named Azgar Khan filed a police complaint against his victims, alleging assault after he was caught and beaten while attempting to steal electrical items from their house.
