ന്യൂഡൽഹി: കോടതി നടപടികളിലെ ഭാഷാപരമായ സുതാര്യതയും പ്രാപ്യതയും നിസ്സാരമായി കാണാനാകില്ലെന്ന് സുപ്രീം കോടതി. കുടുംബവഴക്കുകളുമായി ബന്ധപ്പെട്ട കേസ് കേരളത്തിൽ നിന്ന് പഞ്ചാബിലേക്ക് മാറ്റണമെന്ന ഹർജി പരിഗണിക്കുന്നതിനിടയിലാണ് സുപ്രീം കോടതിയുടെ കൗതുകകരമായ നിരീക്ഷണം. കേരളത്തിലുള്ളവർക്ക് “ഇംഗ്ലീഷ് അറിയാമെങ്കിലും അവർ സംസാരിക്കാൻ താല്പര്യപ്പെടുന്നില്ല” എന്ന് ജസ്റ്റിസ് വിക്രം നാഥ്, ജസ്റ്റിസ് സന്ദീപ് മേത്ത എന്നിവരടങ്ങിയ ബെഞ്ച് ചൂണ്ടിക്കാട്ടി.(Supreme Court Kerala English remark, Supreme Court Transfers Matrimonial Case From Kerala To Punjab Citing Language Barrier)
2017-ൽ വിവാഹിതരായ ദമ്പതികൾ 2023-ലാണ് യുകെയിലേക്ക് താമസം മാറിയത്. എന്നാൽ ദാമ്പത്യ തർക്കങ്ങളെ തുടർന്ന് ഭർത്താവ് പ്രായപൂർത്തിയാകാത്ത കുട്ടിയുമായി ഇന്ത്യയിലേക്ക് മടങ്ങുകയും കേരളത്തിൽ കുട്ടിയുടെ കസ്റ്റഡിക്കും വിവാഹമോചനത്തിനുമായി നിയമനടപടികൾ ആരംഭിക്കുകയുമായിരുന്നു. ഇതിനെതിരെ ഭാര്യയാണ് കേസ് പഞ്ചാബിലെ ലുധിയാനയിലേക്ക് മാറ്റണമെന്ന് ആവശ്യപ്പെട്ട് സുപ്രീം കോടതിയെ സമീപിച്ചത്. യുകെയിൽ താമസിക്കുന്ന തനിക്ക് ഭാഷാപരമായ ബുദ്ധിമുട്ടുകൾ ഉൾപ്പെടെയുള്ള കാരണങ്ങളാൽ കേരളത്തിലെ കോടതി നടപടികളിൽ കൃത്യമായി പങ്കെടുക്കാൻ സാധിക്കുന്നില്ലെന്ന് ഭാര്യയ്ക്ക് വേണ്ടി ഹാജരായ അഭിഭാഷകൻ വാദിച്ചു.
എന്നാൽ ഈ വാദത്തെ ഭർത്താവിന്റെ അഭിഭാഷകൻ ശക്തമായി എതിർത്തു. “കേരളത്തിൽ എല്ലാവർക്കും ഇംഗ്ലീഷ് അറിയാം” എന്നും അതിനാൽ കേസ് അവിടെ നടത്തുന്നതിൽ ഭാര്യയ്ക്ക് യാതൊരു ബുദ്ധിമുട്ടും ഉണ്ടാകില്ലെന്നും അദ്ദേഹം കോടതിയെ അറിയിച്ചു. ഈ വാദത്തോടാണ് ജസ്റ്റിസ് മേത്ത വിയോജിച്ചത്. “അവിടെ കാര്യങ്ങൾ വളരെ ബുദ്ധിമുട്ടാണ്, ഞങ്ങളോട് അത് പറയേണ്ടതില്ല. അവർക്ക് ഇംഗ്ലീഷ് അറിയാമെങ്കിൽ പോലും സംസാരിക്കാൻ താല്പര്യപ്പെടാറില്ല,” എന്ന് അദ്ദേഹം മറുപടി നൽകി. ആളുകൾക്ക് ഇംഗ്ലീഷ് മനസ്സിലാകുമെന്ന വെറും അനുമാനത്തിന്റെ പുറത്ത്, ഹർജിക്കാർ നേരിടുന്ന ഭാഷാപരമായ തടസ്സങ്ങളെ നിസ്സാരമായി തള്ളിക്കളയാനാകില്ലെന്ന് സുപ്രീം കോടതി വ്യക്തമാക്കി. കുട്ടിയുടെ യാത്രയുമായി ബന്ധപ്പെട്ട പ്രായോഗിക ബുദ്ധിമുട്ടുകൾ ഭർത്താവിന്റെ ഭാഗം ഉന്നയിച്ചെങ്കിലും, ഭാര്യയുടെ ഭാഗം കൂടി പരിഗണിച്ച കോടതി ഒടുവിൽ കേസ് കേരളത്തിൽ നിന്നും ലുധിയാനയിലെ യോഗ്യമായ കോടതിയിലേക്ക് മാറ്റാൻ ഉത്തരവിട്ടു.
Story Summary
The Supreme Court allowed a matrimonial case to be transferred from Kerala to Punjab, observing that language accessibility cannot be taken for granted. Refuting the husband’s counsel’s claim that “everyone knows English in Kerala,” Justice Sandeep Mehta remarked that even if people there know English, they often prefer not to speak it.
