സൈന്യവുമായി ബന്ധപ്പെട്ട പരാമർശം; രാഹുൽ ഗാന്ധിക്കെതിരെ തെരഞ്ഞെടുപ്പ് കമ്മീഷന് പരാതി നൽകി ബിജെപി
ന്യൂഡൽഹി: ദരിദ്ര, സംവരണ വിഭാഗങ്ങളിൽ നിന്നുള്ളവരും സമ്പന്ന കുടുംബങ്ങളുമടങ്ങുന്ന രണ്ട് വിഭാഗത്തിലുള്ള സൈനികരെയാണ് മോദി സർക്കാർ സൃഷ്ടിച്ചതെന്ന കോൺഗ്രസ് നേതാവ് രാഹുൽ ഗാന്ധിയുടെ പരാമർശത്തിനെതിരെ കർശന നടപടിയെടുക്കണമെന്ന് തെരഞ്ഞെടുപ്പ് കമ്മീഷനോട് ആവശ്യപ്പെട്ട് ബിജെപി.
വിദേശകാര്യ മന്ത്രി എസ്. ജയശങ്കർ, കേന്ദ്ര മന്ത്രിമാരായ അർജുൻ റാം മേഘ്‌വാൾ, രാജീവ് ചന്ദ്രശേഖർ എന്നിവരുൾപ്പെടെയുള്ള മുതിർന്ന പാർട്ടി പ്രതിനിധി സംഘം തെരഞ്ഞെടുപ്പ് കമ്മീഷനെ സമീപിച്ച് പരാതി നൽകി. ബിജെപി രാജ്യസഭാ എംപിയും ദേശീയ മാധ്യമ ചുമതലയുള്ള അനിൽ ബലൂനിയും സംഘത്തിലുണ്ടായിരുന്നു. രാഹുൽ ഗാന്ധിയുടെ പരാമർശം വളരെ ഗൗരവമുള്ളതാണെന്ന് വിശേഷിപ്പിച്ച ജയശങ്കർ, ബിജെപി പ്രതിനിധി സംഘം ഇത് തെരഞ്ഞെടുപ്പ് കമ്മീഷന്‍റെ ശ്രദ്ധയിൽപ്പെടുത്തിയെന്നും രാഹുലിനെതിരെ വളരെ കർശനമായ നടപടി സ്വീകരിക്കണമെന്നും അദ്ദേഹം പരാമർശം പിൻവലിക്കണമെന്നും ആവശ്യപ്പെട്ടു.