ന്യൂഡൽഹി: നിലവിൽ നടന്നുകൊണ്ടിരിക്കുന്ന ബലാത്സംഗ കേസിലെ വിചാരണ നടപടികൾ തടയണമെന്ന് ആവശ്യപ്പെട്ട് പുരാവസ്തു തട്ടിപ്പ് കേസ് പ്രതി മോൺസൺ മാവുങ്കൽ സുപ്രീം കോടതിയിൽ ഹർജി നൽകി. ഇതേ പരാതിക്കാരിയുമായി ബന്ധപ്പെട്ട മറ്റൊരു കേസിൽ ശിക്ഷ അനുഭവിക്കുന്ന സാഹചര്യത്തിൽ പുതിയ കേസ് നിലനിൽക്കില്ലെന്നാണ് മോൺസന്റെ വാദം.(Rape case, Monson Mavunkal approaches Supreme Court)
പരാതിക്കാരിയെ പ്രായപൂർത്തിയാകാത്ത സമയത്ത് പീഡിപ്പിച്ചുവെന്ന പോക്സോ കേസിൽ മോൺസൺ ഇപ്പോൾ ശിക്ഷ അനുഭവിച്ചു വരികയാണ്. ഇതേ പരാതിക്കാരിയെ പ്രായപൂർത്തിയായ ശേഷം പീഡിപ്പിച്ചുവെന്ന് ആരോപിക്കുന്ന മറ്റൊരു കേസിൽ കൂടി വിചാരണ നടത്തുന്നതും ശിക്ഷിക്കുന്നതും നിലനിൽക്കില്ലെന്ന് മോൺസൺ ഹർജിയിൽ ചൂണ്ടിക്കാട്ടുന്നു.
ഈ ആവശ്യം ഉന്നയിച്ച് നേരത്തെ കേരള ഹൈക്കോടതിയെ സമീപിച്ചിരുന്നെങ്കിലും കോടതി അത് തള്ളിയിരുന്നു. ഇതേത്തുടർന്നാണ് അഭിഭാഷകൻ പി. വിഷ്ണു മുഖേന സുപ്രീം കോടതിയിൽ അപ്പീൽ നൽകിയത്.
