ന്യൂഡൽഹി: അശ്ലീലവും സഭ്യമല്ലാത്തതുമായ ഉള്ളടക്കങ്ങൾ സംപ്രേഷണം ചെയ്ത അഞ്ച് ഒടിടി പ്ലാറ്റ്ഫോമുകൾ കൂടി നിരോധിച്ചതായി കേന്ദ്ര വാർത്താ വിതരണ മന്ത്രാലയം അറിയിച്ചു. മൂഡ്എക്സ് വിഐപി, കോയൽ പ്ലേപ്രോ, ഡിജിമൂവി പ്ലക്സ്, ഫീൽ, ജുഗ്നു എന്നീ പ്ലാറ്റ്ഫോമുകൾക്കെതിരെയാണ് നടപടി.(Obscene content, Center bans 5 more OTT platforms)
ഈ പ്ലാറ്റ്ഫോമുകളിലെ ഉള്ളടക്കം ഇന്ത്യൻ നിയമങ്ങളുടെ ഗുരുതരമായ ലംഘനമാണെന്ന് മന്ത്രാലയം കണ്ടെത്തി. നിയമവിരുദ്ധമായ ഉള്ളടക്കം നീക്കം ചെയ്യാൻ മന്ത്രാലയം നൽകിയ ഔദ്യോഗിക അറിയിപ്പുകളോട് പ്ലാറ്റ്ഫോം അധികൃതർ പ്രതികരിക്കാത്തതിനെ തുടർന്നാണ് കർശന നടപടി.
ആഭ്യന്തര മന്ത്രാലയം, വനിതാ ശിശു വികസന മന്ത്രാലയം എന്നിവയുമായി നടത്തിയ വിശദമായ ചർച്ചകൾക്ക് ശേഷമാണ് നിരോധനം ഏർപ്പെടുത്തിയത്. ഐടി ആക്ടിലെ സെക്ഷൻ 69എ, സെക്ഷൻ 79(3)(ബി) എന്നീ വകുപ്പുകൾ പ്രകാരമാണ് നടപടി സ്വീകരിച്ചിരിക്കുന്നത്. ഇതനുസരിച്ച് ഈ പ്ലാറ്റ്ഫോമുകളിലേക്കുള്ള പ്രവേശനം തടയാൻ ഇന്റർനെറ്റ് സേവന ദാതാക്കൾക്ക് സർക്കാർ നിർദ്ദേശം നൽകി.
