ജെവാർ: ഉത്തർപ്രദേശിലെ ജെവാറിൽ പുതുതായി ഉദ്ഘാടനം ചെയ്ത നോയിഡ അന്താരാഷ്ട്ര വിമാനത്താവളത്തിൽ നിന്നുള്ള ആദ്യ വിമാന സർവീസുകൾക്ക് ഇൻഡിഗോ എയർലൈൻസ് തുടക്കം കുറിച്ചു (Noida International Airport). എൻ.സി.ആർ മേഖലയിലെ ഏറ്റവും പുതിയ വിമാനത്താവളത്തിൽ നിന്ന് സർവീസ് നടത്തുന്ന ആദ്യ എയർലൈൻ എന്ന നേട്ടം ഇതോടെ ഇൻഡിഗോ സ്വന്തമാക്കി. ലഖ്നൗവിൽ നിന്നുള്ള ഇൻഡിഗോയുടെ ആദ്യ വിമാനം തിങ്കളാഴ്ച രാവിലെ നോയിഡ അന്താരാഷ്ട്ര വിമാനത്താവളത്തിൽ വന്നിറങ്ങിയതോടെയാണ് ചരിത്രപരമായ ഈ യാത്രയ്ക്ക് തുടക്കമായത്. തുടർന്ന് ബെംഗളൂരുവിലേക്കുള്ള ആദ്യ വിമാനവും ഇവിടുന്ന് പറന്നുയർന്നു.
നോയിഡ അന്താരാഷ്ട്ര വിമാനത്താവളത്തിൽ നിന്ന് രാജ്യത്തെ 16-ലധികം നഗരങ്ങളിലേക്ക് നേരിട്ടുള്ള കണക്റ്റിവിറ്റി ഇൻഡിഗോ നൽകുന്നുണ്ട്. അമൃത്സർ, ജോധ്പൂർ, ബറേലി, ഭോപ്പാൽ, ജയ്പൂർ, ധരംശാല, ചണ്ഡീഗഡ്, കിഷൻഗഡ്, പന്ത്നഗർ, ജമ്മു തുടങ്ങിയ പ്രധാന നഗരങ്ങളെയും മെട്രോകളെയും തമ്മിൽ ബന്ധിപ്പിക്കുന്ന 14 പുതിയ റൂട്ടുകളാണ് ഇതിലൂടെ നിലവിൽ വന്നത്. ടിയർ 2, ടിയർ 3 നഗരങ്ങളിൽ നിന്നുള്ള യാത്രക്കാർക്ക് ഈ പുതിയ സർവീസുകൾ വലിയ ആശ്വാസമാകും. ഇതോടെ ഡൽഹിയിലെ ഇന്ദിരാഗാന്ധി അന്താരാഷ്ട്ര വിമാനം, ഗാസിയാബാദിലെ ഹിൻഡൻ വിമാനത്താവളം എന്നിവയ്ക്ക് ശേഷം എൻ.സി.ആർ മേഖലയിലെ മൂന്ന് വിമാനത്താവളങ്ങളിലും സർവീസ് നടത്തുന്ന ഏക എയർലൈനായി ഇൻഡിഗോ മാറി.
ഇന്ത്യയുടെ വ്യോമയാന ചരിത്രത്തിലെ പുതിയ അധ്യായമാണിതെന്ന് ഇൻഡിഗോ ചീഫ് സ്ട്രാറ്റജി ഓഫീസർ അലോക് സിംഗ് അഭിപ്രായപ്പെട്ടു. ഒന്നിലധികം വിമാനത്താവളങ്ങളുള്ള ലോകത്തെ പ്രമുഖ നഗരങ്ങളുടെ പട്ടികയിലേക്ക് ഡൽഹി എൻ.സി.ആർ മേഖലയും ഇപ്പോൾ ഉയർന്നിരിക്കുകയാണ്. പടിഞ്ഞാറൻ ഉത്തർപ്രദേശിലേക്കും എൻ.സി.ആർ മേഖലയിലേക്കും കൂടുതൽ യാത്രാ സൗകര്യങ്ങൾ ഒരുക്കുന്നതിൽ തങ്ങൾ പ്രതിജ്ഞാബദ്ധമാണെന്നും അദ്ദേഹം കൂട്ടിച്ചേർത്തു. വരും ദിവസങ്ങളിൽ കൂടുതൽ യാത്രക്കാർക്ക് കൂടുതൽ തിരഞ്ഞെടുപ്പുകളും സൗകര്യങ്ങളും നൽകാൻ വിമാനത്താവള അധികൃതരുമായി ചേർന്ന് പ്രവർത്തിക്കുമെന്ന് നോയിഡ അന്താരാഷ്ട്ര വിമാനത്താവളം വൈസ് ചെയർമാൻ ക്രിസ്റ്റോഫ് ഷ്നെൽമാൻ പറഞ്ഞു. യമുന എക്സ്പ്രസ് വേയിൽ സ്ഥിതി ചെയ്യുന്ന ഈ വിമാനത്താവളം വരുംകാലത്ത് മേഖലയിലെ പ്രധാന ഏവിയേഷൻ-ലോജിസ്റ്റിക്സ് ഹബ്ബായി മാറുമെന്നാണ് പ്രതീക്ഷിക്കുന്നത്.
Summary: IndiGo has become the first airline to commence flight operations from the newly inaugurated Noida International Airport (NIA) in Jewar, Uttar Pradesh. The launch, marked by flights arriving from Lucknow and departing for Bengaluru, connects the airport to over 16 destinations across India, significantly enhancing regional connectivity for the Delhi-NCR and western Uttar Pradesh regions. With this addition, IndiGo now operates across all three airports in the NCR, aiming to bolster trade, tourism, and travel convenience for millions of passengers.
