ഇന്ത്യൻ നാവികസേനയുടെ പുതിയ മേധാവിയായി വൈസ് അഡ്മിറൽ കൃഷ്ണ സ്വാമിനാഥനെ നിയമിച്ചു. നിലവിൽ മുംബൈയിലെ വെസ്റ്റേൺ നേവൽ കമാൻഡ് മേധാവിയായി സേവനമനുഷ്ഠിക്കുന്ന അദ്ദേഹം മെയ് 31-ന് ചുമതലയേൽക്കും (New Navy Chief Krishna Swaminathan). 2028 ഡിസംബർ 31 വരെയാണ് അദ്ദേഹത്തിന്റെ കാലാവധി. നിലവിലെ നേവി ചീഫ് അഡ്മിറൽ ദിനേഷ് കെ. ത്രിപാഠി വിരമിക്കുന്ന ഒഴിവിലേക്കാണ് നിയമനം. ഐ.എൻ.എസ് വിക്രമാദിത്യ ഉൾപ്പെടെയുള്ള പ്രമുഖ യുദ്ധക്കപ്പലുകളുടെ കമാൻഡറായി സേവനമനുഷ്ഠിച്ചിട്ടുള്ള കൃഷ്ണ സ്വാമിനാഥൻ നാവികസേനയിലെ കരുത്തുറ്റ സാന്നിധ്യമാണ്.
1987 ജൂലൈ 1-നാണ് അദ്ദേഹം ഇന്ത്യൻ നാവികസേനയിൽ കമ്മീഷൻ ചെയ്യപ്പെട്ടത്. കമ്മ്യൂണിക്കേഷൻ ആൻഡ് ഇലക്ട്രോണിക് വാർഫെയർ സ്പെഷ്യലിസ്റ്റാണ്. ഐ.എൻ.എസ് വിദ്യുത്, ഐ.എൻ.എസ് വിനാശ്, ഐ.എൻ.എസ് കുലിഷ്, ഐ.എൻ.എസ് മൈസൂർ, വിമാനവാഹിനിക്കപ്പലായ ഐ.എൻ.എസ് വിക്രമാദിത്യ എന്നിവ അദ്ദേഹം നയിച്ചിട്ടുണ്ട്. നാഷണൽ ഡിഫൻസ് അക്കാദമി (NDA) പൂർവ്വ വിദ്യാർത്ഥിയാണ്. കൊച്ചി ശാസ്ത്ര സാങ്കേതിക സർവ്വകലാശാലയിൽ (CUSAT) നിന്ന് എം.എസ്.സി ടെലികമ്മ്യൂണിക്കേഷൻസും മുംബൈ സർവ്വകലാശാലയിൽ നിന്ന് പിഎച്ച്.ഡിയും കരസ്ഥമാക്കിയിട്ടുണ്ട്. അതിവിശിഷ്ട സേവാ മെഡൽ, വിശിഷ്ട സേവാ മെഡൽ എന്നിവ നൽകി രാജ്യം അദ്ദേഹത്തെ ആദരിച്ചിട്ടുണ്ട്. കൊച്ചിയിലെ സതേൺ നേവൽ കമാൻഡിൽ ചീഫ് സ്റ്റാഫ് ഓഫീസറായും (ട്രെയിനിംഗ്) അദ്ദേഹം പ്രവർത്തിച്ചിട്ടുണ്ട്. നാവികസേനയുടെ സുരക്ഷാ മാനദണ്ഡങ്ങൾ നിശ്ചയിക്കുന്ന ഇന്ത്യൻ നേവി സേഫ്റ്റി ടീം രൂപീകരിക്കുന്നതിൽ അദ്ദേഹം നിർണ്ണായക പങ്കുവഹിച്ചു.
Summary: Vice Admiral Krishna Swaminathan has been appointed as the next Chief of Naval Staff, effective May 31, 2026. Currently the Western Naval Commander, he will succeed Admiral Dinesh K Tripathi. With a distinguished career since 1987, Swaminathan has commanded prestigious vessels like INS Vikramaditya and INS Mysore. An alumnus of NDA and a PhD holder, he is a specialist in Electronic Warfare and a recipient of the Ati Vishisht Seva Medal.
