ന്യൂഡൽഹി: നീറ്റ് യുജി (NEET UG 2026) പുനഃപരീക്ഷയുടെ അഡ്മിറ്റ് കാർഡുകൾ നാഷണൽ ടെസ്റ്റിങ് ഏജൻസി (NTA) ഔദ്യോഗിക വെബ്സൈറ്റിൽ പ്രസിദ്ധീകരിച്ചു (NEET UG 2026 re exam admit card). പരീക്ഷ എഴുതുന്ന ഉദ്യോഗാർഥികൾക്ക് എൻടിഎയുടെ ഔദ്യോഗിക വെബ്സൈറ്റായ neet.nta.nic.in സന്ദർശിച്ചോ, അല്ലെങ്കിൽ ഡിജിലോക്കർ (DigiLocker) ആപ്ലിക്കേഷൻ വഴിയോ തങ്ങളുടെ അഡ്മിറ്റ് കാർഡുകൾ പരിശോധിക്കാനും ഡൗൺലോഡ് ചെയ്യാനും സാധിക്കും.
ഉദ്യോഗാർത്ഥിയുടെ പേര്, റോൾ നമ്പർ, അനുവദിച്ചിട്ടുള്ള പരീക്ഷാ കേന്ദ്രത്തിന്റെ വിശദാംശങ്ങൾ, പരീക്ഷാ സമയം, പാലിക്കേണ്ട പ്രധാന നിർദ്ദേശങ്ങൾ തുടങ്ങിയ അവശ്യ വിവരങ്ങൾ അഡ്മിറ്റ് കാർഡിലുണ്ടാകും. അഡ്മിറ്റ് കാർഡിൽ രേഖപ്പെടുത്തിയിട്ടുള്ള വിവരങ്ങളിൽ എന്തെങ്കിലും തരത്തിലുള്ള തെറ്റുകളോ പൊരുത്തക്കേടുകളോ (Discrepancies) ഉദ്യോഗാർഥികളുടെ ശ്രദ്ധയിൽപ്പെട്ടാൽ, അവർക്ക് പ്രവൃത്തി ദിവസങ്ങളിൽ രാവിലെ 10 മണിക്കും വൈകുന്നേരം 5 മണിക്കും ഇടയിൽ എൻടിഎ ഹെൽപ്പ്ലൈൻ നമ്പറുകളിൽ ബന്ധപ്പെടാവുന്നതാണ്. അതല്ലെങ്കിൽ [email protected] എന്ന ഔദ്യോഗിക വിലാസത്തിൽ ഇമെയിൽ വഴി പരാതി അയക്കണമെന്നും അധികൃതർ അറിയിച്ചു.
അതേസമയം , നീറ്റ് പരീക്ഷയുടെ ചോദ്യപേപ്പർ ചോർത്തി ലക്ഷക്കണക്കിന് സാധാരണക്കാരായ വിദ്യാർഥികളുടെ ഭാവി അനിശ്ചിതത്വത്തിലാക്കിയ വൻ ക്രമക്കേടിനെതിരെ രാജ്യത്തുടനീളം ഇപ്പോഴും കടുത്ത പ്രതിഷേധങ്ങൾ ഉയരുകയാണ്. രാജ്യത്തെ മെഡിക്കൽ പ്രവേശന പരീക്ഷയുടെ വിശ്വാസ്യത തകർത്തതിന്റെയും ലക്ഷക്കണക്കിന് കുട്ടികളെ മാനസിക സമ്മർദ്ദത്തിലാക്കിയതിന്റെയും പൂർണ്ണ ഉത്തരവാദിത്തമേറ്റെടുത്ത് കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ അടിയന്തരമായി രാജി വയ്ക്കണമെന്ന ആവശ്യം പ്രതിപക്ഷ പാർട്ടികളും വിദ്യാർത്ഥി സംഘടനകളും ശക്തമാക്കിയിട്ടുണ്ട്. നീറ്റ് പരീക്ഷയ്ക്ക് പുറമെ സിബിഎസ്ഇ, സിയുഇടി (CUET), എസ്എസ്സി (SSC) പരീക്ഷകളിലുണ്ടായ തുടർച്ചയായ ക്രമക്കേടുകൾക്കും അഴിമതി ആരോപണങ്ങൾക്കും കൃത്യമായ മറുപടി നൽകാൻ കേന്ദ്ര സർക്കാർ ഇതുവരെ തയ്യാറായിട്ടില്ലെന്നത് വലിയ വിമർശനങ്ങൾക്ക് കാരണമാകുന്നുണ്ട്.
അതിനിടെ, നീറ്റ് ചോദ്യപേപ്പർ ചോർച്ച കഷ്ടപ്പെട്ട് രാത്രിയും പകലും ഇരുന്ന് പഠിച്ച ലക്ഷക്കണക്കിന് വിദ്യാർഥികൾക്കും അവരുടെ രക്ഷിതാക്കൾക്കും വലിയ മാനസിക ആഘാതമാണ് ഉണ്ടാക്കിയതെന്ന് നാഷണൽ ടെസ്റ്റിങ് ഏജൻസിയെ (NTA) രൂക്ഷമായി വിമർശിച്ചുകൊണ്ട് സുപ്രീംകോടതി നിരീക്ഷിച്ചിരുന്നു. ഈ തട്ടിപ്പിന് പിന്നിൽ പ്രവർത്തിച്ച യഥാർത്ഥ ഉത്തരവാദികളെ കണ്ടെത്തി കർശനമായി ശിക്ഷിച്ചില്ലെങ്കിൽ ഭാവിയിലും ഇത്തരം സംഭവങ്ങൾ ആവർത്തിക്കുമെന്നും കോടതി ഓർമ്മിപ്പിച്ചു. യുപിഎസ്സി (UPSC) പോലെയുള്ള രാജ്യത്തെ പ്രമുഖവും സുതാര്യവുമായ പരീക്ഷാ ഏജൻസികളെ കണ്ട് പഠിക്കണമെന്നും, കേവലം താൽക്കാലിക സ്വഭാവത്തോടെയല്ല മറിച്ച് ഓർമ്മകളും മുൻകാല അനുഭവങ്ങളും ഉൾക്കൊണ്ട് ഉത്തരവാദിത്തത്തോടെ പ്രവർത്തിക്കാൻ എൻടിഎ തയ്യാറാകണമെന്നും ജസ്റ്റിസുമാരായ പി.എസ്. നരസിംഹ, അലോക് ആരാധെ എന്നിവരടങ്ങിയ സുപ്രീംകോടതി ബെഞ്ച് നേരത്തെ കർശനമായി വ്യക്തമാക്കിയിരുന്നു.
Story Summary: The National Testing Agency (NTA) has released the admit cards for the NEET UG 2026 re-examination on its official website and DigiLocker. Candidates can download it via neet.nta.nic.in. Amidst this, nationwide protests continue against the NTA over the NEET question paper leak controversy, with demands for the resignation of Education Minister Dharmendra Pradhan, following severe criticism from the Supreme Court.
