1996-ൽ എവറസ്റ്റ് കൊടുമുടിയിലെ ‘ഡെത്ത് സോൺ’ എന്ന് വിളിക്കപ്പെടുന്ന ഉയരത്തിൽ വെച്ച് മരണപ്പെട്ട ‘ഗ്രീൻ ബൂട്ട്സ്’ എന്നറിയപ്പെടുന്ന പർവതാരോഹകന്റെ മൃതദേഹം തിരിച്ചെത്തിക്കാനുള്ള പുതിയ ദൗത്യം ആരംഭിക്കുന്നു. മൂന്ന് പതിറ്റാണ്ടുകൾക്ക് ശേഷം അദ്ദേഹത്തിന്റെ ഭൗതികാവശിഷ്ടങ്ങൾ നാട്ടിലെത്തിക്കാനുള്ള ശ്രമത്തിലാണ് ഇന്ത്യൻ അധികൃതർ. 1996-ലെ ശക്തമായ മഞ്ഞുവീഴ്ചയ്ക്കിടെ എവറസ്റ്റിന്റെ വടക്കുകിഴക്കൻ ഭാഗത്തുള്ള ഒരു ചെറിയ ഗുഹയിൽ വെച്ചാണ് ഈ പർവതാരോഹകൻ മരണപ്പെട്ടത്. അന്ന് മുതൽ അദ്ദേഹത്തിന്റെ പച്ച നിറത്തിലുള്ള ബൂട്ടുകൾ ശ്രദ്ധിക്കപ്പെട്ടതോടെയാണ് ‘ഗ്രീൻ ബൂട്ട്സ്’ എന്ന പേര് ലഭിച്ചത്. വർഷങ്ങളായി എവറസ്റ്റ് കീഴടക്കാൻ പോകുന്നവർക്ക് ഇതൊരു അടയാളമായി മാറിയിരുന്നു.(Mount Everest Green Boots climber remains to be retrieved)
ഇത്രയും കാലം ഇദ്ദേഹം സേവാങ് പാൽജോർ എന്ന ഇന്ത്യൻ പർവതാരോഹകനാണെന്നാണ് വിശ്വസിക്കപ്പെട്ടിരുന്നത്. എന്നാൽ, ഇപ്പോൾ പുറത്തുവന്ന റിപ്പോർട്ടുകൾ പ്രകാരം അദ്ദേഹം ദോർജെ മോരുപ് ആണെന്നാണ് സൂചന. ഇദ്ദേഹവും പാൽജോറും ഒരേ ദിവസം തന്നെയാണ് എവറസ്റ്റിൽ മരണപ്പെട്ടത്. ഈ തിരിച്ചറിയൽ പലർക്കും അദ്ഭുതമുണ്ടാക്കിയിട്ടുണ്ട്.
ഭൗതികാവശിഷ്ടം തിരിച്ചെത്തിക്കാൻ വിദഗ്ധരായ ആറ് ഷെർപ്പകൾ അടങ്ങുന്ന സംഘത്തെ നിയോഗിക്കാൻ ടെൻഡർ വിളിച്ചിട്ടുണ്ട്. ഒക്ടോബറോടെ മൃതദേഹം ഡൽഹിയിലെത്തിക്കുകയാണ് ലക്ഷ്യം. സമുദ്രനിരപ്പിലെ ഓക്സിജന്റെ മൂന്നിലൊന്ന് മാത്രം ലഭ്യമായ 8,500 മീറ്റർ ഉയരത്തിൽ മൃതദേഹം ചുമന്നുകൊണ്ടുവരിക എന്നത് അതിദുഷ്കരമായ ദൗത്യമാണ്. മരവിച്ചുപോയ മൃതദേഹം ഏകദേശം 200 കിലോയോളം ഭാരം വരാൻ സാധ്യതയുള്ളതിനാൽ, വളരെ സാഹസികമായി മാത്രമേ ഇത് താഴേക്ക് കൊണ്ടുവരാൻ സാധിക്കൂ.
1996-ൽ ഇൻഡോ-ടിബറ്റൻ ബോർഡർ പോലീസിന്റെ എവറസ്റ്റ് ദൗത്യത്തിലുണ്ടായിരുന്ന അംഗങ്ങളാണ് ദോർജെ മോരുപ്പും സേവാങ് പാൽജോറും. എവറസ്റ്റ് കീഴടക്കാൻ ശ്രമിക്കുന്നതിനിടെയാണ് ഇവർ ഹിമപാതത്തിൽ പെട്ടത്. പതിറ്റാണ്ടുകളായി എവറസ്റ്റ് കൊടുമുടിയിൽ മരവിച്ചു കിടക്കുന്ന ഈ പർവതാരോഹകന് അന്ത്യവിശ്രമം ഒരുക്കാൻ കഴിയുമെന്ന പ്രതീക്ഷയിലാണ് അധികൃതർ.
Story Summary
Thirty years after a blizzard killed a climber known as ‘Green Boots’ on Mount Everest, an Indian expedition plans to retrieve the body, which has been identified as that of Dorje Morup rather than Tsewang Paljor as previously believed. The recovery mission, expected to cost $150,000, will be an extremely dangerous and arduous task for the Sherpa team, as they navigate the extreme conditions of the ‘death zone’ to bring the remains home for closure.
