റാഞ്ചി: ദിവസങ്ങൾക്ക് മുൻപ് കാണാതാവുകയും പിന്നീട് മരിച്ചെന്ന് കരുതി കുടുംബാംഗങ്ങൾ ആചാരപ്രകാരം മൃതദേഹം അടക്കം ചെയ്യുകയും ചെയ്ത ആൾ ദിവസങ്ങൾക്ക് ശേഷം ജീവനോടെ വീട്ടിൽ തിരിച്ചെത്തി. ജാർഖണ്ഡിലെ ഖുന്തി ജില്ലയിലാണ് സിനിമയെ വെല്ലുന്ന ഈ സംഭവം നടന്നത്. 70 കിലോമീറ്റർ അകലെയുള്ള രാംഗഢിൽ പോയി തിരിച്ചെത്തിയ 45-കാരനായ വിശ്രാം മുണ്ടയാണ് തന്നെ ഓർത്ത് കരഞ്ഞിരുന്ന കുടുംബാംഗങ്ങളെയും ഗ്രാമവാസികളെയും ഒരേപോലെ ഞെട്ടിച്ചുകൊണ്ട് വീട്ടുപടിക്കൽ തിരിച്ചെത്തിയത്.(Man Returns Home Alive Days After Family Performs Last Rites In Jharkhand Khunti)
പോലീസ് കണ്ടെടുത്ത അജ്ഞാത മൃതദേഹം വിശ്രാം മുണ്ടയുടേതാണെന്ന് കുടുംബാംഗങ്ങൾ മാറി തിരിച്ചറിഞ്ഞതാണ് ഈ വൻ അബദ്ധത്തിന് കാരണമായതെന്ന് ഖുന്തി സബ് ഡിവിഷണൽ പോലീസ് ഓഫീസർ വരുൺ രജക് മാധ്യമങ്ങളോട് വ്യക്തമാക്കി. പത്രതോലി ഗ്രാമവാസിയായ വിശ്രാം മുണ്ടയെ കഴിഞ്ഞ മേയ് 10-നാണ് ഒരു വിവാഹച്ചടങ്ങിൽ പങ്കെടുക്കാൻ വീട്ടിൽ നിന്നിറങ്ങിയതിന് ശേഷം കാണാതാകുന്നത്.
കുടുംബാംഗങ്ങൾ പരമാവധി തിരച്ചിൽ നടത്തിയെങ്കിലും കണ്ടെത്താനായില്ല. തൊട്ടടുത്ത ദിവസം ഖുന്തിയിലെ ഒരു ഓടയിൽ നിന്നും പോലീസ് ഒരു അജ്ഞാത മൃതദേഹം കണ്ടെടുത്തു. വിവരമറിഞ്ഞ് ഖുന്തി സദർ ആശുപത്രിയിലെത്തിയ ബന്ധുക്കൾ ഇത് കാണാതായ വിശ്രാം മുണ്ടയുടെ മൃതദേഹമാണെന്ന് സ്ഥിരീകരിക്കുകയായിരുന്നു. മൃതദേഹത്തിന്റെ ഉയരവും ശരീരപ്രകൃതിയും മുഖവുമെല്ലാം വിശ്രാം മുണ്ടയുമായി അസാധാരണമാംവിധം സാദൃശ്യമുള്ളതായിരുന്നു. ഇതോടെ ബന്ധുക്കൾക്കും ഗ്രാമവാസികൾക്കും മൃതദേഹത്തിന്റെ കാര്യത്തിൽ യാതൊരു സംശയവുമുണ്ടായിരുന്നില്ല. പോലീസ് തുടർനടപടികൾ പൂർത്തിയാക്കി മൃതദേഹം വിട്ടുനൽകുകയും, കുടുംബാംഗങ്ങൾ ഗോത്രവർഗ്ഗ ആചാരപ്രകാരം ഇത് സംസ്കരിക്കുകയും ചെയ്തു.
എന്നാൽ, സംസ്കാര ചടങ്ങുകളെല്ലാം കഴിഞ്ഞ് ഏതാനും ദിവസങ്ങൾക്ക് ശേഷം വിശ്രാം മുണ്ട ഖുന്തിയിൽ വാടകയ്ക്ക് താമസിക്കുന്ന തന്റെ മകളുടെ വീട്ടുപടിക്കൽ പെട്ടെന്ന് പ്രത്യക്ഷപ്പെടുകയായിരുന്നു. തങ്ങളെ വിട്ടുപോയയാൾ മുന്നിൽ വന്നു നിൽക്കുന്നത് കണ്ട് ബന്ധുക്കൾ ആദ്യം അമ്പരന്നു. ആരോടും പറയാതെ താൻ രാംഗഢിലേക്ക് ഒരു യാത്ര പോയതായിരുന്നുവെന്നാണ് വിശ്രാം മുണ്ട കുടുംബത്തോട് പറഞ്ഞത്. മുണ്ട തിരിച്ചെത്തിയതോടെ, അന്ന് അടക്കം ചെയ്തത് ആരുടെ മൃതദേഹമാണെന്ന ചോദ്യം ഉയർന്നിരിക്കുകയാണ്. ഇതിനെത്തുടർന്ന്, അടക്കം ചെയ്ത മൃതദേഹം പുറത്തെടുത്ത് ഡി.എൻ.എ പരിശോധന നടത്തി യഥാർത്ഥ വ്യക്തിയെ തിരിച്ചറിയാനുള്ള നടപടികൾ പോലീസ് ആരംഭിച്ചിട്ടുണ്ട്.
Story Summary
In a bizarre turn of events, 45-year-old Vishram Munda from Jharkhand’s Khunti district returned home alive days after his family mistakenly identified an unclaimed body as his and performed burial rituals. Following his shocking return from a trip to Ramgarh, police have initiated the process of exhuming the buried body to conduct a DNA test for correct identification.
