കൊൽക്കത്ത: സൗത്ത് 24 പർഗാനാസിലെ ബാരൂയിപൂരിൽ പന്ത്രണ്ടുകാരി ക്രൂരമായി പീഡിപ്പിക്കപ്പെട്ടു കൊല്ലപ്പെട്ട സംഭവത്തിന് പിന്നാലെ പശ്ചിമ ബംഗാളിൽ രാഷ്ട്രീയ സംഘർഷം രൂക്ഷമാകുന്നു. കൊല്ലപ്പെട്ട പെൺകുട്ടിയുടെ കുടുംബത്തെ സന്ദർശിക്കാൻ ബാരൂയിപൂരിലേക്ക് പോകാനിരുന്ന തൃണമൂൽ കോൺഗ്രസ് അധ്യക്ഷയും മുൻ മുഖ്യമന്ത്രിയുമായ മമത ബാനർജിയെ പോലീസ് വീട്ടുതടങ്കലിലാക്കിയതായി പരാതി. ഞായറാഴ്ച വൈകുന്നേരമാണ് മമത ബാനർജി തന്നെ അധികൃതർ തടങ്കലിലാക്കിയെന്ന ഗുരുതര ആരോപണവുമായി രംഗത്തെത്തിയത്.(Mamata Banerjee house arrest, Mamata Banerjee Claims House Arrest Over Attempt To Visit Baruipur Rape Victim Family)
ബാരൂയിപൂരിലെ ക്രൂരമായ കൊലപാതകത്തെ തുടർന്ന് പ്രദേശത്ത് വലിയ രീതിയിലുള്ള അക്രമസംഭവങ്ങൾ അരങ്ങേറിയിരുന്നു. ക്രമസമാധാന നില നിയന്ത്രിക്കുന്നതിനായി വൻ പോലീസ് സന്നാഹത്തെയാണ് ഇവിടെ വിന്യസിച്ചിരിക്കുന്നത്. ഇതിനിടയിലാണ് കൊൽക്കത്ത കാളിഘട്ടിലുള്ള മമത ബാനർജിയുടെ വീടിന് മുന്നിലും വൻതോതിൽ പോലീസിനെ വിന്യസിച്ചത്. പശ്ചിമ ബംഗാളിൽ സ്ത്രീകൾക്ക് സുരക്ഷ ഉറപ്പാക്കുമെന്ന് പ്രഖ്യാപിച്ച് അധികാരത്തിലേറിയ ബിജെപി സർക്കാരിന് നേരിടേണ്ടി വന്ന ആദ്യത്തെ വലിയ വെല്ലുവിളിയാണ് ബാരൂയിപൂരിലെ ഈ ക്രൂര സംഭവം.
“ബാരൂയിപൂരിലെ സംഭവം അതീവ ഗുരുതരമായ അവസ്ഥയിലേക്കാണ് നീങ്ങുന്നത്, ജനങ്ങൾക്ക് ഇത് ഇനിയും സഹിക്കാൻ കഴിയില്ല. എന്റെ വീടിന് പുറത്ത് ആയിരക്കണക്കിന് പോലീസുകാരാണ് മാർച്ച് ചെയ്യുന്നത്. പോലീസ് എന്നോട് നേരിട്ട് പറഞ്ഞിട്ടില്ലെങ്കിലും, എന്നെ വീട്ടുതടങ്കലിലാക്കിയിരിക്കുകയാണെന്ന് ഞാൻ മനസ്സിലാക്കുന്നു,” മമത ബാനർജി മാധ്യമങ്ങളോട് പറഞ്ഞു. ഇരയുടെ കുടുംബത്തെ കണ്ട് ആശ്വസിപ്പിക്കാൻ തനിക്ക് ബാരൂയിപൂരിലേക്ക് പോകണമെന്നും അവർ ആവശ്യപ്പെട്ടു.
മമത ബാനർജിയെ പുറത്തുപോകാൻ അനുവദിക്കാതെ പോലീസ് ബാരിക്കേഡുകൾ സ്ഥാപിച്ച് തടഞ്ഞിരിക്കുകയാണെന്ന് തൃണമൂൽ കോൺഗ്രസ് ഔദ്യോഗികമായി സോഷ്യൽ മീഡിയയിലൂടെ ആരോപിച്ചു. ബാരൂയിപൂർ സംഭവത്തിൽ പെൺകുട്ടിയുടെ കുടുംബത്തിന് നീതി ലഭിക്കുന്നത് വരെ തങ്ങൾ പോരാടുമെന്നും പാർട്ടി വ്യക്തമാക്കി. അതേസമയം, തൃണമൂൽ കോൺഗ്രസ് ജനറൽ സെക്രട്ടറി അഭിഷേക് ബാനർജി ഇരയുടെ കുടുംബാംഗങ്ങളുമായി ഫോണിൽ സംസാരിച്ചു. യാതൊരുവിധ രാഷ്ട്രീയ സ്വാധീനവും പ്രതികളെ രക്ഷിക്കാൻ അനുവദിക്കില്ലെന്നും നീതി ഉറപ്പാക്കാൻ തങ്ങളാൽ കഴിയുന്നതെല്ലാം ചെയ്യുമെന്നും അദ്ദേഹം വ്യക്തമാക്കി.
Story Summary
Former West Bengal Chief Minister Mamata Banerjee claimed she was placed under house arrest to stop her from visiting the family of the 12-year-old rape and murder victim in Baruipur. The incident has triggered massive political tension in the state, posing the first major law-and-order challenge for the newly formed BJP government regarding women’s safety.
