ന്യൂഡൽഹി: പ്രധാനമന്ത്രി നരേന്ദ്ര മോദിയുടെ ഭരണനേട്ടങ്ങളെ പരിഹസിച്ച് മല്ലികാർജുന ഖാർഗെ. കഴിഞ്ഞ 12 വർഷത്തെ ഭരണത്തിനിടയിൽ മുദ്രാവാക്യങ്ങൾ മുഴക്കുകയല്ലാതെ ജനങ്ങൾക്ക് ഗുണകരമായതൊന്നും ചെയ്യാൻ മോദി സർക്കാരിനായിട്ടില്ലെന്ന് അദ്ദേഹം കുറ്റപ്പെടുത്തി. തെരഞ്ഞെടുപ്പിലൂടെ അധികാരത്തിലെത്തി ഏറ്റവും കൂടുതൽ കാലം പ്രധാനമന്ത്രിയായിരുന്ന നേതാവെന്ന മോദിയുടെ പുതിയ റെക്കോർഡ് ബിജെപി ആഘോഷിക്കുന്നതിനിടെയാണ് ഖാർഗെയുടെ വിമർശനം.(Mallikarjun Kharge Criticizes Modi Government Over 12 Year Tenure)
ചരിത്രത്തെ വികലമാക്കുന്നതിലൂടെ സത്യം ഇല്ലാതാക്കാൻ കഴിയില്ലെന്ന് ഖാർഗെ ചൂണ്ടിക്കാട്ടി. ഇന്ത്യയിൽ ഏറ്റവും കൂടുതൽ കാലം പ്രധാനമന്ത്രിയായിരുന്നത് പണ്ഡിറ്റ് ജവഹർലാൽ നെഹ്റുവാണെന്നും, തൊട്ടുപിന്നാലെ ഇന്ദിരാ ഗാന്ധിയാണെന്നും അദ്ദേഹം ഓർമ്മിപ്പിച്ചു. തുടർച്ചയായി ഏറ്റവും കൂടുതൽ കാലം പ്രധാനമന്ത്രി പദവിയിലിരുന്ന വ്യക്തിയെ കണ്ടെത്താൻ ബിജെപി ഇപ്പോൾ പുതിയതും പരിഹാസ്യവുമായ മാനദണ്ഡങ്ങൾ കണ്ടെത്തേണ്ടി വന്നിരിക്കുകയാണ്, ഖാർഗെ പരിഹസിച്ചു.
സർദാർ വല്ലഭായ് പട്ടേൽ, ഡോ. ബി.ആർ. അംബേദ്കർ, ഡോ. ശ്യാമ പ്രസാദ് മുഖർജി തുടങ്ങിയ പ്രമുഖർ ആരുടെ മന്ത്രിസഭയിലാണ് സേവനമനുഷ്ഠിച്ചതെന്ന് ഓർക്കണമെന്ന് അദ്ദേഹം ബിജെപിയെ വെല്ലുവിളിച്ചു. പണപ്പെരുപ്പം, തൊഴിലില്ലായ്മ, അഴിമതി എന്നിവയിൽ ജനങ്ങൾ നട്ടംതിരിയുകയാണെന്ന് ഖാർഗെ പറഞ്ഞു. സർക്കാരിന്റെ ‘നേട്ടങ്ങൾ’ വെറും ഇവന്റ് മാനേജ്മെന്റും കെട്ടിച്ചമച്ച കഥകളും മാത്രമാണെന്നും അദ്ദേഹം ആരോപിച്ചു. എല്ലാ മേഖലകളിലും ഭരണപരാജയമാണ് കാണാൻ കഴിയുന്നതെന്നും, ഇത് ജനങ്ങളോടുള്ള വലിയ വഞ്ചനയാണെന്നും ഖാർഗെ കൂട്ടിച്ചേർത്തു.
Story Summary
Congress President Mallikarjun Kharge has sharply criticized the Modi government, labeling its 12-year tenure as one defined by empty slogans rather than tangible achievements. Challenging the BJP’s celebration of Prime Minister Modi’s record-breaking tenure, Kharge highlighted historical facts regarding India’s former Prime Ministers and accused the current government of failing the public through corruption, inflation, and unemployment.
