ന്യൂഡൽഹി: ഒമാൻ തീരത്ത് വാണിജ്യ കപ്പലിന് നേരെ നടന്ന ആക്രമണത്തിൽ ഇന്ത്യ ശക്തമായ അതൃപ്തി രേഖപ്പെടുത്തി. സംഭവത്തിൽ അമേരിക്കൻ ചാർജ് ഡി അഫയേഴ്സ് ജേസൺ മീക്സിനെ വിദേശകാര്യമന്ത്രാലയം നേരിട്ട് വിളിച്ചുവരുത്തിയാണ് പ്രതിഷേധം അറിയിച്ചത്. ഡൊണാൾഡ് ട്രംപ് യുഎസ് പ്രസിഡന്റായി ചുമതലയേറ്റ ശേഷം ആദ്യമായാണ് ഇത്തരമൊരു നയതന്ത്ര ഇടപെടൽ ഇന്ത്യയുടെ ഭാഗത്തുനിന്നുണ്ടാകുന്നത്.(India Summons US Diplomat Over Commercial Vessel Attack Near Oman)
ഹോർമുസ് കടലിടുക്കിന് സമീപം സൊഹാർ തീരത്തുനിന്ന് 20 നോട്ടിക്കൽ മൈൽ അകലെ വെച്ചാണ് ‘സെറ്റെബെല്ലോ’ എന്ന ഇന്ധന ടാങ്കറിന് നേരെ ആക്രമണമുണ്ടായത്. കപ്പലിലെ 28 ജീവനക്കാരിൽ 24 പേരും ഇന്ത്യക്കാരാണ്. ആക്രമണത്തിൽ മൂന്ന് ഇന്ത്യക്കാരെ കാണാതായിട്ടുണ്ട്. 21 ഇന്ത്യക്കാരെ സുരക്ഷിതമായി രക്ഷപ്പെടുത്താൻ സാധിച്ചു.
മേഖലയിലെ കപ്പലുകൾക്ക് നേരെ തുടരുന്ന ആക്രമണങ്ങൾ അതീവ ആശങ്കാജനകമാണെന്ന് വിദേശകാര്യ മന്ത്രാലയം പ്രസ്താവനയിൽ വ്യക്തമാക്കി. വാണിജ്യ കപ്പലുകളെയും സിവിലിയൻ അടിസ്ഥാന സൗകര്യങ്ങളെയും ലക്ഷ്യമിട്ടുള്ള ഇത്തരം നീക്കങ്ങൾ ഉടൻ അവസാനിപ്പിക്കണമെന്ന് ഇന്ത്യ ആവശ്യപ്പെട്ടു.
സ്വതന്ത്രവും തടസ്സമില്ലാത്തതുമായ സമുദ്രഗതാഗതവും വ്യാപാരവും എത്രയും വേഗം പുനഃസ്ഥാപിക്കുക. അക്രമങ്ങൾ അവസാനിപ്പിച്ച് നയതന്ത്ര ചർച്ചകളിലൂടെ മേഖലയിൽ സമാധാനവും സ്ഥിരതയും ഉറപ്പാക്കുക.ഇന്ത്യൻ പൗരന്മാരുടെ സുരക്ഷയ്ക്കും സമുദ്ര വ്യാപാര സുരക്ഷയ്ക്കും മുൻഗണന നൽകുന്നതിനാലാണ് ഇത്തരമൊരു കർശന നടപടിയിലേക്ക് രാജ്യം നീങ്ങിയതെന്ന് നയതന്ത്ര വൃത്തങ്ങൾ സൂചിപ്പിക്കുന്നു.
Story Summary
India has summoned the US Charge d’Affaires, Jason Meeks, to express grave concern over the attack on the commercial vessel ‘Setebello’ near the coast of Oman. While 21 Indian crew members were rescued, three remain missing; India has demanded an immediate end to attacks on civilian shipping and urged for the restoration of maritime trade and regional stability through diplomatic dialogue.
