മുംബൈ: മഹാരാഷ്ട്രയിലെ പ്രമുഖ വ്യവസായി വിശാൽ അഗർവാളിന്റെ മകൻ കേതൻ അഗർവാളിന്റെ മരണവുമായി ബന്ധപ്പെട്ട അന്വേഷണം ഞെട്ടിക്കുന്ന വഴിത്തിരിവിലേക്ക് (Ketan Agarwal Siya Goyal Pune Murder Case). ആദ്യം അപകടമരണമെന്നാണ് കരുതിയിരുന്ന സംഭവം ആസൂത്രിത കൊലപാതകമാണെന്ന് പൊലീസ് കണ്ടെത്തിയതോടെ പ്രതിശ്രുത വധുവായ സിയ ഗോയലും അവളുടെ സുഹൃത്തായ ചേതൻ ചൗധരിയും അറസ്റ്റിലായി.
ഈ വർഷം ഫെബ്രുവരിയിലായിരുന്നു കേതന്റെയും സിയയുടെയും വിവാഹനിശ്ചയം. നവംബറിൽ രാജസ്ഥാനിലെ ഉദയ്പൂരിൽ വമ്പിച്ച ആഘോഷങ്ങളോടെയായിരുന്നു വിവാഹം നിശ്ചയിച്ചിരുന്നത്. ഇതിനായി കോടിക്കണക്കിന് രൂപ ചെലവഴിച്ച് കൊട്ടാരവും യാത്രാസൗകര്യങ്ങളും ഉൾപ്പെടെയുള്ള ഒരുക്കങ്ങൾ കുടുംബങ്ങൾ നടത്തിയിരുന്നു.
ജൂൺ 18ന് സിയയുടെ ജന്മദിനത്തോടനുബന്ധിച്ച് പൂനെയിലെ ലോഹഗഡ് കോട്ടയിലേക്കുള്ള ട്രെക്കിങ്ങിനിടെയാണ് കേതൻ മലഞ്ചെരിവിലേക്ക് വീണ് മരിച്ചതെന്നാണ് ആദ്യം റിപ്പോർട്ട് ചെയ്തത്. ഫോട്ടോ എടുക്കുന്നതിനിടെ കാൽവഴുതി വീണുവെന്നായിരുന്നു സിയയുടെ ആദ്യ മൊഴി.
എന്നാൽ ലോണാവാല റൂറൽ പൊലീസ് നടത്തിയ വിശദമായ അന്വേഷണത്തിൽ നിരവധി ദുരൂഹതകൾ കണ്ടെത്തി. മൊബൈൽ ഫോൺ വിവരങ്ങൾ, കോൾ രേഖകൾ, സാക്ഷിമൊഴികൾ, സിസിടിവി ദൃശ്യങ്ങൾ എന്നിവ പരിശോധിച്ചതോടെ അപകടമരണമെന്ന നിഗമനം തള്ളപ്പെട്ടു.
അന്വേഷണത്തിൽ, സിയയ്ക്ക് 22 കാരനായ ചേതൻ ചൗധരിയുമായി അടുത്ത ബന്ധമുണ്ടായിരുന്നുവെന്ന് വ്യക്തമായി. വിവാഹത്തിൽ താൽപര്യമില്ലാതിരുന്ന സിയ, കേതനെ ഒഴിവാക്കാൻ ചേതനുമായി ചേർന്ന് പദ്ധതി തയ്യാറാക്കിയെന്നാണ് പൊലീസ് പറയുന്നത്.
സംഭവദിവസം വിനോദയാത്രയുടെ പേരിൽ കേതനെ ലോഹഗഡിലേക്ക് കൊണ്ടുപോയ ശേഷം, സമീപത്ത് കാത്തുനിന്നിരുന്ന ചേതനെ സ്ഥലത്തേക്ക് വിളിച്ചുവരുത്തിയതായും തുടർന്ന് ഇരുവരും ചേർന്ന് കേതനെ പിന്നിൽ നിന്ന് തള്ളിയിട്ടതായുമാണ് അന്വേഷണ സംഘം കണ്ടെത്തിയത്. ദമ്പതികളെ പിന്തുടരുന്ന ചേതന്റെ സിസിടിവി ദൃശ്യങ്ങളും അന്വേഷണത്തിന് നിർണായക തെളിവായി.
കഴിഞ്ഞ ഏഴ് മാസത്തിനിടെ സിയയും ചേതനും തമ്മിൽ ആയിരക്കണക്കിന് ഫോൺവിളികളും നൂറുകണക്കിന് മണിക്കൂർ നീണ്ട സംഭാഷണങ്ങളും നടന്നതായി അന്വേഷണത്തിൽ കണ്ടെത്തിയിട്ടുണ്ട്. ഇരുവരും തമ്മിലുള്ള ബന്ധം കഴിഞ്ഞ വർഷം അവസാനത്തോടെയാണ് ആരംഭിച്ചതെന്നാണ് പൊലീസ് പറയുന്നത്.
കേതൻ അഗർവാളിന്റെ മരണവുമായി ബന്ധപ്പെട്ട് കൊലപാതകം, ക്രിമിനൽ ഗൂഢാലോചന എന്നീ കുറ്റങ്ങൾ ചുമത്തി സിയ ഗോയലിനെയും ചേതൻ ചൗധരിയെയും അറസ്റ്റ് ചെയ്തിട്ടുണ്ട്. കേസിൽ കൂടുതൽ പേർക്ക് പങ്കുണ്ടോയെന്ന കാര്യം ഉൾപ്പെടെ പൊലീസ് വിശദമായി അന്വേഷിച്ചുവരികയാണ്.
Story Summary: Police have arrested Ketan Agarwal’s fiancée Siya Goyal and her friend Chetan Chaudhary in connection with the Pune businessman’s son’s death. Investigators allege the duo conspired to murder Ketan by pushing him off a cliff during a trekking trip.
