ബംഗളുരു : രാജ്യസഭാ, ലെജിസ്ലേറ്റീവ് കൗൺസിൽ തെരഞ്ഞെടുപ്പുകൾക്ക് മുന്നോടിയായി കർണാടകയിൽ വീണ്ടും ‘റിസോർട്ട് രാഷ്ട്രീയം’ സജീവം. ജൂൺ 18-ന് നടക്കുന്ന കൗൺസിൽ തെരഞ്ഞെടുപ്പിൽ ക്രോസ് വോട്ടിങ് തടയുന്നതിനും എതിർപാർട്ടികൾ എം.എൽ.എമാരെ സ്വാധീനിക്കുന്നത് ഒഴിവാക്കുന്നതിനുമായി കോൺഗ്രസ് തങ്ങളുടെ എം.എൽ.എമാരെ സുരക്ഷിത സ്ഥാനത്തേക്ക് മാറ്റും.(Karnataka Congress Resorts To Resort Politics Ahead Of Legislative Council Elections)
ജൂൺ 16-ന് നടക്കുന്ന നിയമസഭാ കക്ഷി യോഗത്തിന് ശേഷം എം.എൽ.എമാരെ ബെംഗളൂരുവിൽ നിന്ന് ഏകദേശം 28 കിലോമീറ്റർ അകലെയുള്ള മൈസൂർ റോഡിലെ വണ്ടർല അമ്യൂസ്മെന്റ് പാർക്കിനുള്ളിലെ ‘ടെറിയ റിസോർട്ടിലേക്ക്’ മാറ്റാനാണ് തീരുമാനം. തെരഞ്ഞെടുപ്പ് ദിവസം വോട്ട് രേഖപ്പെടുത്താൻ നിയമസഭയിലേക്ക് പോകുന്നതുവരെ ഇവർ റിസോർട്ടിൽ തന്നെ തുടരും.
ഏഴ് സീറ്റുകളിലേക്കാണ് തെരഞ്ഞെടുപ്പ് നടക്കുന്നത്. കോൺഗ്രസ് അഞ്ച് പേരെയും (ബി.കെ. ഹരിപ്രസാദ്, തിപ്പണ്ണപ്പ കംകനൂർ, പി.വി. മോഹൻ, ശിവണ്ണ ബി.എസ്, വിനയ് കാർത്തിക് പ്രകാശ്), ബി.ജെ.പി രണ്ട് പേരെയും (ലിംഗരാജ് പാട്ടീൽ, രഘു ആർ), ജെ.ഡി.എസ് ഒരാളെയും (ഗോവിന്ദരാജു) മത്സരത്തിനിറക്കിയിട്ടുണ്ട്. നിലവിലെ അംഗബലം വെച്ച് കോൺഗ്രസിന് നാല് സീറ്റും ബി.ജെ.പിക്ക് രണ്ട് സീറ്റും ഉറപ്പാണ്. അവസാനത്തെ ഏഴാമത്തെ സീറ്റിനായുള്ള പോരാട്ടമാണ് നിർണ്ണായകമായിരിക്കുന്നത്. കോൺഗ്രസ് സ്ഥാനാർത്ഥി വിനയ് കാർത്തിക് പ്രകാശും ജെ.ഡി.എസ് സ്ഥാനാർത്ഥി ഗോവിന്ദരാജുവും തമ്മിലുള്ള നേരിട്ടുള്ള പോരാട്ടമാണ് ഇവിടെ നടക്കുന്നത്. ജയസാധ്യത ഉറപ്പാക്കുന്നതിനും കൂറുമാറ്റം തടയുന്നതിനുമായി രാഷ്ട്രീയ തന്ത്രങ്ങൾ ശക്തമാക്കുകയാണ് കോൺഗ്രസ് നേതൃത്വം.
Story Summary
The Congress party has shifted its MLAs to a resort in Bengaluru to prevent cross-voting and poaching ahead of the June 18 Legislative Council elections. With eight candidates competing for seven seats, the battle for the final, closely contested seat has prompted the party to sequester its legislators to ensure all five of its candidates secure the necessary votes.
