കൊച്ചി: ഗുരുതരമായ ഹൃദയസംബന്ധമായ അസുഖത്തെത്തുടർന്ന് ഓപ്പൺ ഹാർട്ട് സർജറിക്ക് വിധേയനായ കണ്ണൻ സാഗർ ആശുപത്രിയിൽ നിന്നും ഡിസ്ചാർജ് ആയി (Kannan Sagar). തന്റെ ജീവിതം തിരിച്ചുപിടിക്കാൻ സഹായിച്ച ഡോക്ടർമാർക്കും സാമ്പത്തികമായും മാനസികമായും പിന്തുണച്ച സഹപ്രവർത്തകർക്കും വൈകാരികമായ കുറിപ്പിലൂടെ താരം നന്ദി അറിയിച്ചു.
ശസ്ത്രക്രിയയ്ക്കും ചികിത്സയ്ക്കുമായി വലിയ സാമ്പത്തിക പ്രതിസന്ധി നേരിട്ടപ്പോൾ മെഗാസ്റ്റാർ മമ്മൂട്ടി, രമേശ് പിഷാരടി എന്നിവർ വലിയ രീതിയിൽ സഹായിച്ചതായി കണ്ണൻ വെളിപ്പെടുത്തി. ഓസ്ട്രേലിയയിലായിരുന്നിട്ടും മമ്മൂട്ടി ഫൗണ്ടേഷൻ വഴി കാര്യങ്ങൾ കൃത്യമായി നിരീക്ഷിക്കുകയും ധൈര്യം നൽകുകയും ചെയ്ത മമ്മൂക്കയോടുള്ള കടപ്പാട് അദ്ദേഹം പ്രത്യേകം എടുത്തു പറഞ്ഞു.
ആശുപത്രിയിൽ എത്തിയത് മുതൽ കൂടെനിന്ന കെ.എസ്. പ്രസാദ്, രക്തദാതാക്കളെ സംഘടിപ്പിക്കാൻ മുന്നിട്ടിറങ്ങിയ സാജു കൊടിയൻ എന്നിവരെയും താരം സ്മരിച്ചു. കൂടാതെ ‘മാ’ (MAA) സംഘടനയുടെ പ്രവർത്തകർക്കും അദ്ദേഹം നന്ദി അറിയിച്ചു. രാജഗിരി ആശുപത്രിയിലെ സി.വി.ടി.എസ് (CVTS) വിഭാഗത്തിലെ ഡോക്ടർമാരെയും നഴ്സുമാരെയും ‘മാലാഖമാർ’ എന്നാണ് താരം വിശേഷിപ്പിച്ചത്. തന്റെ ‘ആട് 3’, ‘വാഴ 2’ എന്നീ സിനിമകൾ കണ്ട സ്റ്റാഫുകൾ നൽകിയ അഭിനന്ദനങ്ങൾ വേദനകൾ മറക്കാൻ സഹായിച്ചുവെന്നും അദ്ദേഹം കുറിച്ചു.
ശസ്ത്രക്രിയ വിജയകരമായി പൂർത്തിയായെങ്കിലും കൃത്യമായ ഇടവേളകളിൽ ചെക്കപ്പിനായി എത്തണമെന്നും വിശ്രമം വേണമെന്നും ഡോക്ടർമാർ നിർദ്ദേശിച്ചിട്ടുണ്ട്. തമാശകളിലൂടെ പ്രേക്ഷകരെ ചിരിപ്പിച്ചിരുന്ന താരം വേഗത്തിൽ പൂർണ്ണ ആരോഗ്യവാനായി മടങ്ങിയെത്തട്ടെ എന്ന പ്രാർത്ഥനയിലാണ് ആരാധകരും സുഹൃത്തുക്കളും.
Story Summary: Actor and mimicry artist Kannan Sagar has been discharged from Rajagiri Hospital after a successful heart surgery. He expressed his heartfelt gratitude to Mammootty, Ramesh Pisharody, and the Mammootty Foundation for their timely financial support, as well as to the doctors and colleagues like K.S. Prasad and Saju Kodiyan who stood by him.
