ശ്രീനഗർ: ജമ്മു കശ്മീരിലെ സർക്കാർ സ്കൂൾ ലൈബ്രറികളിൽ വിതരണം ചെയ്ത പുസ്തകത്തിൽ വിഘടനവാദി അനുകൂല പരാമർശങ്ങൾ കണ്ടെത്തിയതിനെത്തുടർന്ന് കടുത്ത നടപടിയുമായി ലഫ്റ്റനന്റ് ഗവർണറുടെ ഭരണകൂടം. “പേഴ്സണാലിറ്റീസ് ആൻഡ് ലെജൻഡ്സ് ഓഫ് ജെ ആൻഡ് കെ” എന്ന പുസ്തകത്തിൽ വിഘടനവാദി നേതാവ് മക്ബൂൽ ഭട്ടിനെ മഹത്വവൽക്കരിക്കുന്ന ഉള്ളടക്കം ഉണ്ടായതാണ് വിവാദമായത്. സംഭവത്തിൽ എട്ട് ഉദ്യോഗസ്ഥരെ സർക്കാർ സസ്പെൻഡ് ചെയ്തു.(J&K Administration Suspends Officials After Controversy Over Pro-Separatist Book)
പുസ്തകത്തിന്റെ രചയിതാക്കളായ ഹിലാൽ അഹമ്മദ്, സന്തോഷ് മീന എന്നിവരെയും പ്രസാധകരായ ഒബ്റോയ് ബുക്ക് സർവീസിനെയും സർക്കാർ കരിമ്പട്ടികയിൽപ്പെടുത്തി. ഇവർ പ്രസിദ്ധീകരിച്ച എല്ലാ പുസ്തകങ്ങളും കേന്ദ്രഭരണപ്രദേശത്ത് നിന്നും പിൻവലിക്കാൻ നിർദ്ദേശം നൽകിയിട്ടുണ്ട്. സമഗ്ര ശിക്ഷാ പദ്ധതിയുടെ ഭാഗമായി കശ്മീരിലെയും ജമ്മുവിലെയും പതിനായിരക്കണക്കിന് സർക്കാർ സ്കൂളുകളിലേക്കാണ് ഈ പുസ്തകങ്ങൾ വിതരണം ചെയ്തിരുന്നത്.
പുസ്തകത്തിലെ ഉള്ളടക്കം രാജ്യവിരുദ്ധമാണെന്നും, യുവതലമുറയിൽ വിഘടനവാദി ആശയങ്ങൾ വളർത്താൻ ശ്രമിക്കുന്ന “അക്കാദമിക് ജിഹാദ്” ആണെന്നും ബി.ജെ.പി നേതാവും പ്രതിപക്ഷ നേതാവുമായ സുനിൽ ശർമ്മ ആരോപിച്ചു. സയ്യിദ് അലി ഷാ ഗീലാനി, മസ്രത്ത് ആലം തുടങ്ങിയ വിഘടനവാദി നേതാക്കളുടെ ആശയങ്ങൾ പ്രചരിപ്പിക്കാനാണ് പുസ്തകം ശ്രമിക്കുന്നതെന്ന് അദ്ദേഹം കൂട്ടിച്ചേർത്തു. സംഭവം ശ്രദ്ധയിൽപ്പെട്ട ഉടൻ തന്നെ ശക്തമായ നടപടിക്ക് നിർദ്ദേശം നൽകിയതായി സ്കൂൾ വിദ്യാഭ്യാസ മന്ത്രി സക്കീന ഇട്ടു പറഞ്ഞു.
Story Summary
The Jammu and Kashmir administration has suspended eight officials and blacklisted authors and publishers after a controversial book containing pro-separatist content regarding JKLF founder Maqbool Bhat was distributed in government school libraries. Following intense political backlash from the BJP, which labeled the incident as “academic jihad,” the Education Minister has initiated a high-level inquiry, vowing strict action against those involved in the deliberate conspiracy.
