കൊൽക്കത്ത: യോഗ ഇന്ന് ലോകത്തിലെ ഏറ്റവും വലിയ കൂട്ടായ്മയായി മാറിയെന്നും, വ്യത്യസ്ത രാജ്യങ്ങളിലെയും സംസ്കാരങ്ങളിലെയും ജനങ്ങളെ ഒന്നിപ്പിക്കാൻ ഇതിന് കഴിയുന്നുണ്ടെന്നും പ്രധാനമന്ത്രി നരേന്ദ്ര മോദി പറഞ്ഞു. കൊൽക്കത്തയിൽ നടന്ന പന്ത്രണ്ടാമത് അന്താരാഷ്ട്ര യോഗാദിന ആഘോഷങ്ങളിൽ സംസാരിക്കുകയായിരുന്നു അദ്ദേഹം.(International Day of Yoga, PM Modi Says Yoga Has Become The Worlds Largest Community Celebration)
ജൂൺ 21-നെ ഇന്ന് ലോകമെമ്പാടും യോഗാദിനമായി അംഗീകരിച്ചിരിക്കുന്നുവെന്ന് പ്രധാനമന്ത്രി വ്യക്തമാക്കി. യോഗ വ്യക്തിജീവിതത്തിൽ മാത്രമല്ല, ലോകത്തിന്റെ ഭാവിക്ക് കൂടിയുള്ളതാണെന്ന് പ്രധാനമന്ത്രി നരേന്ദ്ര മോദി. യോഗയെ ഒരു ദിവസത്തെ ആഘോഷമായി ഒതുക്കാതെ, മെച്ചപ്പെട്ട ആരോഗ്യത്തിനായി വർഷം മുഴുവൻ അത് ജീവിതത്തിന്റെ ഭാഗമാക്കണമെന്ന് പ്രധാനമന്ത്രി ആഹ്വാനം ചെയ്തു.
“യോഗയെ നമ്മുടെ ജീവിതത്തിന്റെയും കുടുംബത്തിന്റെയും വരും തലമുറകളുടെയും ഭാഗമാക്കാൻ നമുക്ക് പ്രതിജ്ഞയെടുക്കാം. ശരീരം വഴക്കമുള്ളതാക്കാനും ഊർജ്ജസ്വലത നിലനിർത്താനും സമ്മർദ്ദരഹിതമായ ജീവിതം നയിക്കാനും യോഗ സഹായിക്കുന്നു,” പ്രധാനമന്ത്രി പറഞ്ഞു. 20 വയസ്സിലുള്ളതിനേക്കാൾ വഴക്കം 40-ാം വയസ്സിലും, 30 വയസ്സിലുള്ളതിനേക്കാൾ ഊർജ്ജം 50-ാം വയസ്സിലും ഉണ്ടായിരിക്കുക എന്നതാകണം ഓരോരുത്തരുടെയും ലക്ഷ്യമെന്നും അദ്ദേഹം ഓർമ്മിപ്പിച്ചു.
‘ആരോഗ്യകരമായ വാർധക്യത്തിന് യോഗ’ എന്നതാണ് ഈ വർഷത്തെ പ്രമേയം. യോഗ പ്രായമായവർക്ക് മാത്രമല്ല, എല്ലാ പ്രായക്കാർക്കും വേണ്ടിയുള്ളതാണെന്നും അദ്ദേഹം വ്യക്തമാക്കി. ശരീരത്തെ നിയന്ത്രിക്കാൻ പഠിക്കുമ്പോൾ ആരോഗ്യം ഒരു ശീലമായി മാറുന്നു. ശാരീരിക ആരോഗ്യം മാത്രമല്ല, മാനസികാരോഗ്യത്തിലേക്കുള്ള വഴി കൂടിയാണ് യോഗയെന്ന് മോദി കൂട്ടിച്ചേർത്തു. രാമകൃഷ്ണ പരമഹംസർ, സ്വാമി വിവേകാനന്ദൻ തുടങ്ങിയ മഹത്തുക്കൾ യോഗയെ ലോകത്തിന് പരിചയപ്പെടുത്തിയ ബംഗാളിന്റെ മണ്ണിൽ ഈ ചടങ്ങ് നടക്കുന്നത് സവിശേഷമാണെന്നും അദ്ദേഹം പറഞ്ഞു. പശ്ചിമ ബംഗാൾ ഗവർണർ ആർ.എൻ. രവി, മുഖ്യമന്ത്രി സുവേന്ദു അധികാരി തുടങ്ങിയവർ ചടങ്ങിൽ പങ്കെടുത്തു. 15 മിനിറ്റ് നീണ്ടുനിന്ന പ്രസംഗത്തിൽ, ലോകത്തിന്റെ മികച്ച ഭാവിക്ക് യോഗ അത്യന്താപേക്ഷിതമാണെന്ന് അദ്ദേഹം അടിവരയിട്ടു.
Story Summary
Prime Minister Narendra Modi addressed the 12th International Day of Yoga celebrations in Kolkata, highlighting that yoga has evolved into the world’s largest community celebration. He noted that the day, observed on the longest day of the year, serves as a unifying force for people across diverse cultures and nations.
