കരിയറിലെ തുടർച്ചയായ പരാജയങ്ങളെയും പ്രതിസന്ധികളെയും അതിജീവിച്ച് ഗൂഗിളിൽ ഉന്നത പദവിയിലെത്തിയ ഒരു ഇന്ത്യൻ യുവാവ് തന്റെ സിംഗിൾ മദറായ അമ്മയ്ക്ക് നൽകിയ വൈകാരികമായ സർപ്രൈസ് സോഷ്യൽ മീഡിയയിൽ തരംഗമാകുന്നു (Indian Techie Surprises Mother). യുഎസിലെ ഗൂഗിളിൽ പ്രൊഡക്ട് മാനേജരായി ജോലി ചെയ്യുന്ന അഭിജയ് അറോറ വുയ്യൂരു എന്ന യുവാവാണ് ന്യൂയോർക്കിലെ വിഖ്യാതമായ ടൈംസ് സ്ക്വയറിലെ കൂറ്റൻ ബിൽബോർഡ് വാടകയ്ക്കെടുത്ത് തന്റെ അമ്മയ്ക്ക് ആദരമർപ്പിച്ചത്. തന്നെ വളർത്താൻ അമ്മ സഹിച്ച ത്യാഗങ്ങൾക്കുള്ള നന്ദി സൂചകമായാണ് അഭിജയ് ഈ അപൂർവ്വ സമ്മാനം ഒരുക്കിയത്.
ഇൻസ്റ്റാഗ്രാമിൽ പങ്കുവെച്ച വീഡിയോയിൽ, അഭിജയ് ഇന്ത്യയിലുള്ള തന്റെ അമ്മയെ വീഡിയോ കോൾ ചെയ്യുകയും ന്യൂയോർക്കിലെ കൂറ്റൻ സ്ക്രീനിലേക്ക് നോക്കാൻ ആവശ്യപ്പെടുകയും ചെയ്യുന്നു. നിമിഷങ്ങൾക്കകം ടൈംസ് സ്ക്വയറിലെ വലിയ ബിൽബോർഡിൽ അമ്മയുടെ ചിത്രം മകനൊപ്പം തെളിഞ്ഞു വന്നു. ആയിരക്കണക്കിന് മൈലുകൾക്കപ്പുറം ഇരുന്ന് സ്ക്രീനിൽ തന്റെ ചിത്രം കണ്ട അമ്മ വികാരാധീനയാകുകയും സന്തോഷം പങ്കുവെക്കുകയും ചെയ്തു. തന്റെ ജീവിതത്തിലെ ഏറ്റവും സവിശേഷമായ ദിവസമാണിതെന്നും കഠിനമായ പ്രതിസന്ധി ഘട്ടങ്ങളിലും തന്റെ സ്വപ്നങ്ങൾക്ക് തണലായി നിന്ന അമ്മയ്ക്കുള്ള സമർപ്പണമാണിതെന്നും അഭിജയ് കുറിച്ചു. ഹരിയാനയിലെ പഞ്ച്കുളയിൽ ഒരു സിംഗിൾ മദറിന്റെ തണലിലാണ് അഭിജയ് വളർന്നത്. സ്വന്തമായി പുസ്തകങ്ങൾ വാങ്ങാൻ പോലും ബുദ്ധിമുട്ടിയപ്പോഴും മകന് മികച്ച വിദ്യാഭ്യാസം നൽകാൻ ആ അമ്മ ശ്രദ്ധിച്ചിരുന്നു. 2012-ൽ കഠിനമായി ശ്രമിച്ചിട്ടും ഐഐടി-ജെഇഇ പ്രവേശന പരീക്ഷയിൽ പരാജയപ്പെട്ടത് അഭിജയിനെ മാനസികമായി തളർത്തിയിരുന്നു.
തുടർന്നുള്ള കരിയറും പ്രതിസന്ധികൾ നിറഞ്ഞതായിരുന്നു. 2016-ൽ ബിരുദം നേടി പുറത്തിറങ്ങിയപ്പോൾ ഒരു ജോലി പോലും ലഭിച്ചില്ല. പിന്നീട് ജിമാറ്റ് പരീക്ഷ മൂന്ന് തവണ എഴുതിയെങ്കിലും 2021-ൽ അപേക്ഷിച്ച എല്ലാ ബിസിനസ്സ് സ്കൂളുകളും അദ്ദേഹത്തെ നിരസിച്ചു. അമേരിക്കയിലെത്തിയ ശേഷവും കടുത്ത വിസ പ്രതിസന്ധികളും തൊഴിലില്ലായ്മയും നേരിടേണ്ടി വന്നു. ആഴ്ചയിൽ നൂറിലധികം ജോലികൾക്ക് അപേക്ഷിച്ചിട്ടും നിരസിക്കപ്പെട്ടപ്പോൾ അമ്മയും ഭാര്യയുമാണ് തനിക്ക് കരുത്ത് നൽകിയതെന്ന് അഭിജയ് ഓർക്കുന്നു. പ്രതിസന്ധികളിൽ തളരാതെ ഒരു എഐ അധിഷ്ഠിത റെസ്യൂമെ ടൂൾ നിർമ്മിക്കുകയും ഓൺലൈൻ നെറ്റ്വർക്കിംഗ് ശക്തമാക്കുകയും ചെയ്തതോടെയാണ് അഭിജയിന്റെ ജീവിതം മാറുന്നത്. 2022-ൽ ഹാർവാർഡ് യൂണിവേഴ്സിറ്റിയിൽ പ്രവേശനം നേടിയ അദ്ദേഹം 2025-ൽ യുഎസിലെ സാൻ ഫ്രാൻസിസ്കോയിൽ യൂട്യൂബിന്റെ പ്രൊഡക്ട് മാനേജരായി ഗൂഗിളിൽ ജോലിക്കു ചേർന്നു. പരാജയങ്ങളിൽ നിന്ന് ഗൂഗിളിന്റെ വിജയപ്പടവുകൾ കീഴടക്കിയ ഈ യുവാവിന്റെയും അദ്ദേഹത്തെ വളർത്തിയ അമ്മയുടെയും കഥ ഇന്റർനെറ്റിൽ ലക്ഷക്കണക്കിന് ആളുകൾക്ക് പ്രചോദനമായി മാറുകയാണ്.
View this post on Instagram
