ന്യൂഡൽഹി : ഇന്ത്യയുടെ ഇന്ധന സ്വയംപര്യാപ്തത ലക്ഷ്യമിട്ടുള്ള സുപ്രധാന നീക്കവുമായി കേന്ദ്ര സർക്കാർ. നിലവിലെ E20 മാനദണ്ഡങ്ങൾക്ക് അപ്പുറം, കൂടുതൽ എഥനോൾ കലർത്തിയ പെട്രോളിന് എക്സൈസ് തീരുവയിൽ നിന്ന് ഇളവ് നൽകി സർക്കാർ ഉത്തരവിറക്കി. E22, E25, E27, E30 തുടങ്ങിയ ഇന്ധന മിശ്രിതങ്ങൾക്കാണ് ഈ നികുതി ഇളവ് ബാധകമാകുന്നത്.(India Waives Excise Duty on High Ethanol Petrol)
രാജ്യത്തിന്റെ ഊർജ്ജ ആവശ്യങ്ങൾക്കായി ഇറക്കുമതി ചെയ്യുന്ന അസംസ്കൃത എണ്ണയെ ആശ്രയിക്കുന്നത് കുറയ്ക്കുക എന്ന ലക്ഷ്യത്തോടെയാണ് ഈ നടപടി. ഇതോടെ, കർഷകർക്കും ഗ്രാമീണ സമ്പദ്വ്യവസ്ഥയ്ക്കും കൂടുതൽ നേട്ടമുണ്ടാകുന്ന രീതിയിൽ തദ്ദേശീയമായി നിർമ്മിക്കുന്ന ‘ഗ്രീൻ ഫ്യൂവൽ’ പ്രോത്സാഹിപ്പിക്കപ്പെടും.
എഥനോൾ മിശ്രിതങ്ങളുടെ വർദ്ധിച്ചുവരുന്ന ഉപയോഗം മുന്നിൽക്കണ്ട്, ഇവയുടെ ഗുണനിലവാരം ഉറപ്പാക്കാൻ ബ്യൂറോ ഓഫ് ഇന്ത്യൻ സ്റ്റാൻഡേർഡ്സ് (BIS) നേരത്തെ തന്നെ രംഗത്തിറങ്ങിയിരുന്നു. പുതിയ മാനദണ്ഡങ്ങളായ IS 19850:2026 മെയ് 15-ന് നിലവിൽ വന്നു. ഇന്ധനത്തിലെ എഥനോളിന്റെ അളവ്, ഒക്ടേൻ റേറ്റിംഗ്, സുരക്ഷാ മുൻകരുതലുകൾ എന്നിവ സംബന്ധിച്ച വ്യക്തമായ മാർഗ്ഗനിർദ്ദേശങ്ങൾ ഇതിൽ ഉൾക്കൊള്ളിച്ചിട്ടുണ്ട്.
എഥനോൾ അജണ്ടയിലെ നാഴികക്കല്ലുകൾ
2018-ലെ ദേശീയ ജൈവ ഇന്ധന നയത്തിന് ശേഷം, എഥനോൾ മിശ്രിത ലക്ഷ്യങ്ങൾ രാജ്യം അതിവേഗമാണ് കൈവരിച്ചത്. 2030-ഓടെ കൈവരിക്കേണ്ടിയിരുന്ന 20 ശതമാനം എഥനോൾ മിശ്രിതം എന്ന ലക്ഷ്യം, 2025-26 വർഷത്തോടെ തന്നെ പൂർത്തിയാക്കാൻ സാധിക്കുമെന്നാണ് വിലയിരുത്തൽ. ഇന്ധന മേഖലയിലെ ഈ മാറ്റത്തെക്കുറിച്ച് കേന്ദ്ര റോഡ് ഗതാഗത മന്ത്രി നിതിൻ ഗഡ്കരി നേരത്തെ വ്യക്തമാക്കിയിരുന്നു. “നമ്മുടെ നയം ഇറക്കുമതിക്ക് പകരമുള്ളതും ചെലവ് കുറഞ്ഞതും പരിസ്ഥിതി സൗഹൃദവുമാണ്. ഈ ഇന്ധനത്തിലൂടെ രാജ്യത്തിന് പുറത്തേക്ക് ഒഴുകുന്ന പണം കർഷകരിലേക്കും ഗ്രാമീണ മേഖലയിലേക്കും എത്തും,” അദ്ദേഹം പറഞ്ഞു.
ഉയർന്ന എഥനോൾ മിശ്രിതത്തിലേക്കുള്ള ചുവടുവെപ്പിന്റെ ഭാഗമായി, കഴിഞ്ഞ ജൂൺ അഞ്ചിന് ലോക പരിസ്ഥിതി ദിനത്തിൽ ‘E85’ പെട്രോൾ അവതരിപ്പിച്ചു. 85 ശതമാനം എഥനോൾ അടങ്ങിയ ഈ ഇന്ധനം ഫ്ലെക്സ്-ഫ്യൂവൽ എഞ്ചിനുകൾ ഉള്ള വാഹനങ്ങൾക്ക് മാത്രമാണ് ഉപയോഗിക്കാൻ സാധിക്കുക. നിലവിൽ രാജ്യത്തെ 48 പൊതുമേഖലാ ഇന്ധന സ്റ്റേഷനുകളിൽ ലഭ്യമാക്കിയ ഈ ഇന്ധനത്തിന്, E20 ഇന്ധനത്തേക്കാൾ ലിറ്ററിന് 20 രൂപയോളം വിലക്കുറവും നൽകുന്നുണ്ട്. എഥനോൾ മിശ്രിതങ്ങളുടെ ഉപയോഗം സംബന്ധിച്ച് നേരത്തെ ഉയർന്നുവന്ന ആശങ്കകളെ സർക്കാർ തള്ളിക്കളഞ്ഞു. ഈ മാറ്റം കൃത്യമായ പഠനങ്ങൾക്ക് ശേഷമാണ് നടപ്പിലാക്കുന്നതെന്നും, ഭാവിയിൽ ഊർജ്ജ സുരക്ഷയ്ക്ക് ഇത് അത്യന്താപേക്ഷിതമാണെന്നും സർക്കാർ വ്യക്തമാക്കിയിട്ടുണ്ട്.
Story Summary
The central government has exempted petrol blended with higher levels of ethanol from excise duty, extending tax support beyond the current E20 standard. According to a government notification, cited in a Reuters report, petrol containing 22 per cent to 30 per cent ethanol will not attract excise duty. The exemption covers fuel variants such as E22, E25, E27 and E30, marking the first major fiscal incentive for ethanol blends above E20.
