രാജ്കോട്ട്: മദ്യപാനത്തെ ചൊല്ലിയുള്ള തർക്കത്തെ തുടർന്ന് മകനെ കൊലപ്പെടുത്തി ആത്മഹത്യയാണെന്ന് വരുത്തിതീർക്കാൻ മാതാപിതാക്കളുടെ ശ്രമം. ഗുജറാത്തിലെ രാജ്കോട്ട് ജില്ലയിലാണ് സംഭവം. രാം ബാബൂഭായ് ബാംഭാവ (23) എന്ന യുവാവാണ് കൊല്ലപ്പെട്ടത് (Gujarat Parents Kill Son). മകൻ ആത്മഹത്യ ചെയ്തുവെന്നാണ് മാതാപിതാക്കൾ ആദ്യം നാട്ടുകാരോടും പോലീസിനോടും പറഞ്ഞിരുന്നത്. എന്നാൽ പോസ്റ്റ്മോർട്ടം റിപ്പോർട്ടിലൂടെ കൊലപാതകമാണെന്ന് തെളിയുകയായിരുന്നു.
ജൂൺ 30-നാണ് സംഭവം നടന്നത്. രാമിന് മദ്യപിക്കുന്ന ശീലമുണ്ടായിരുന്നത് വീട്ടിൽ എപ്പോഴും വഴക്കിന് കാരണമായിരുന്നു. സംഭവദിവസവും മദ്യപാനത്തെ ചൊല്ലി മാതാപിതാക്കളായ ബാബൂഭായ്, മനീഷാബെൻ എന്നിവരുമായി രൂക്ഷമായ തർക്കമുണ്ടായി. തർക്കം രൂക്ഷമായതോടെ അമ്മ രാമിനെ നിർബന്ധിച്ച് ആസിഡ് കുടിപ്പിക്കുകയും, അച്ഛൻ ക്രൂരമായി മർദ്ദിക്കുകയും തുടർന്ന് കഴുത്തുഞെരിച്ചു കൊലപ്പെടുത്തുകയുമായിരുന്നു.
കൊലപാതകത്തിന് ശേഷം സംഭവം ആത്മഹത്യയാണെന്ന് വരുത്തിതീർക്കാൻ പിതാവ് പ്രാദേശിക രാഷ്ട്രീയ സ്വാധീനം ഉപയോഗിക്കാൻ ശ്രമിച്ചു. എന്നാൽ മരണത്തിൽ ദുരൂഹതയുണ്ടെന്ന് തോന്നിയ ഭാര്യ ബൻഷിബെൻ പോലീസിൽ പരാതി നൽകി. തുടർന്നുള്ള വിശദമായ പോസ്റ്റ്മോർട്ടം റിപ്പോർട്ടിലാണ് യുവാവിനെ ആസിഡ് കുടിപ്പിച്ചതും കഴുത്തുഞെരിച്ചതും വ്യക്തമായത്. വിവരങ്ങൾ പുറത്തുവന്നതോടെ പോലീസ് മാതാപിതാക്കളെ അറസ്റ്റ് ചെയ്തു. കേസിൽ കൂടുതൽ അന്വേഷണം പുരോഗമിക്കുകയാണ്.
Summary: In a chilling incident in Rajkot, Gujarat, parents murdered their 23-year-old son, Ram Bambhava, following a violent dispute over his alcohol addiction and attempted to frame the death as a suicide. The victim’s mother reportedly forced him to consume acid while the father strangled him to death. The parents initially attempted to use political influence to influence the investigation, but the truth was exposed by the post-mortem report and a formal complaint from the victim’s wife, leading to their arrest.
