ഗാസിയാബാദ്: ഓൺലൈൻ ഗെയിമിന് അടിമകളായ മൂന്ന് സഹോദരിമാർ ഫ്ലാറ്റിന്റെ ഒൻപതാം നിലയിൽ നിന്ന് ചാടി ആത്മഹത്യ ചെയ്തു (Ghaziabad sisters suicide). ഉത്തർപ്രദേശിലെ ഗാസിയാബാദിലുള്ള ഭാരത് സിറ്റി സൊസൈറ്റിയിൽ ബുധനാഴ്ച പുലർച്ചെ രണ്ട് മണിയോടെയാണ് നാടിനെ നടുക്കിയ സംഭവം നടന്നത്. പഖി (12), പ്രാചി (14), വിഷിക (16) എന്നിവരാണ് മരിച്ചത്. കൊറിയൻ ടാസ്ക് അധിഷ്ഠിത ഗെയിമിന് ഇവർ അടിമകളായിരുന്നുവെന്നും മാതാപിതാക്കൾ ഫോൺ ഉപയോഗിക്കുന്നത് തടഞ്ഞതിലുള്ള മനോവിഷമത്തിലാണ് പെൺകുട്ടികൾ ഈ കടുംകൈ ചെയ്തതെന്നുമാണ് പ്രാഥമിക വിവരം.
വീട്ടുകാർ ഉറങ്ങിക്കിടക്കുമ്പോൾ പൂജാമുറിയിൽ കയറി വാതിൽ അകത്തുനിന്നും പൂട്ടിയ ശേഷം ജനലിലൂടെ ഓരോരുത്തരായി താഴേക്ക് ചാടുകയായിരുന്നു. താഴെ വീഴുന്ന വലിയ ശബ്ദം കേട്ട് ഓടിയെത്തിയ സെക്യൂരിറ്റി ഗാർഡുകളും നാട്ടുകാരുമാണ് വിവരം മാതാപിതാക്കളെ അറിയിച്ചത്. ആശുപത്രിയിൽ എത്തിച്ചെങ്കിലും മൂവരും മരണപ്പെട്ടിരുന്നു. മരിക്കുന്നതിന് മുൻപ് എട്ട് പേജുള്ള ഒരു ആത്മഹത്യക്കുറിപ്പും ഡയറിയും ഇവർ എഴുതിവെച്ചിരുന്നു. “ഈ ഡയറിയിൽ എഴുതിയിരിക്കുന്നത് എല്ലാം സത്യമാണ്, അതൊന്ന് വായിക്കണം. ഐ ആം സോറി പപ്പ,” എന്ന് കുറിപ്പിൽ പറയുന്നു. കരയുന്ന ഒരു ഇമോജിയും ഇതോടൊപ്പം വരച്ചുചേർത്തിട്ടുണ്ട്.
കോവിഡ് കാലത്താണ് പെൺകുട്ടികൾ ഓൺലൈൻ ഗെയിമുകൾക്ക് അടിമകളായതെന്ന് പോലീസ് പറയുന്നു. ഇവർക്ക് കൊറിയൻ പേരുകൾ നൽകുകയും തങ്ങൾ കൊറിയൻ രാജകുമാരിമാരാണെന്ന് വിശ്വസിക്കുകയും ചെയ്തിരുന്നതായി റിപ്പോർട്ടുകളുണ്ട്. സ്കൂളിൽ പോകാൻ മടിച്ചിരുന്ന പെൺകുട്ടികൾ ഗെയിമിനായി കൂടുതൽ സമയം ചിലവഴിച്ചിരുന്നു. കൊറിയൻ ലവ് ഗെയിം (Korean Love Game) എന്ന ആപ്പിലെ വിവിധ ടാസ്ക്കുകൾ ഇവർ പൂർത്തിയാക്കിയിരുന്നതായും ഇതിന്റെ ഭാഗമാണോ ആത്മഹത്യയെന്നും പോലീസ് അന്വേഷിക്കുന്നുണ്ട്.
Summary: Three sisters aged 12, 14, and 16 committed suicide by jumping from the 9th floor of their apartment in Ghaziabad, allegedly due to addiction to a Korean online task-based game and parental intervention.
