ഡൽഹി: ദി ടെലഗ്രാഫ് പത്രത്തിന്റെ മുൻ എഡിറ്റർ ആർ.രാജഗോപാലിന്റെ പാസ്പോർട്ട് പുതുക്കുന്നതുമായി ബന്ധപ്പെട്ട് നിലനിന്നിരുന്ന തടസ്സങ്ങൾ നീങ്ങി (R Rajagopal Passport). കൊൽക്കത്ത പോലീസ് പുതിയ അന്വേഷണ റിപ്പോർട്ട് സമർപ്പിച്ചതോടെ അദ്ദേഹത്തിന്റെ പാസ്പോർട്ട് പ്രിന്റിംഗ് നടപടികൾ ആരംഭിച്ചതായാണ് ലഭ്യമാകുന്ന വിവരം. പശ്ചിമ ബംഗാൾ മുഖ്യമന്ത്രി മമത ബാനർജി ഉൾപ്പെടെയുള്ള പ്രമുഖർ വിഷയത്തിൽ നേരിട്ട് ഇടപെട്ടതോടെയാണ് അധികൃതർ അനുകൂല നടപടി സ്വീകരിച്ചത്.
കൊൽക്കത്തയിൽ നിന്നുള്ള പ്രമുഖ ഇംഗ്ലീഷ് ദിനപ്പത്രമായ ‘ദി ടെലഗ്രാഫിന്റെ’ മുൻ എഡിറ്ററായ ആർ. രാജഗോപാൽ ദേശീയതലത്തിൽ തന്നെ ഏറെ ശ്രദ്ധേയനായ മാധ്യമപ്രവർത്തകനാണ്. ഭരണകൂടത്തിന്റെ നയങ്ങൾക്കെതിരെ തികച്ചും നിർഭയമായി പ്രതികരിക്കുകയും, വിമർശനാത്മകവും മൂർച്ചയേറിയതുമായ തലക്കെട്ടുകളിലൂടെ വാർത്തകൾ ജനങ്ങളിൽ എത്തിക്കുകയും ചെയ്യുന്നതിലൂടെയാണ് അദ്ദേഹം ശ്രദ്ധ നേടിയത്. അടുത്തിടെ അദ്ദേഹം പാസ്പോർട്ട് പുതുക്കാൻ അപേക്ഷ നൽകിയെങ്കിലും അധികൃതർ അത് തടഞ്ഞുവെക്കുകയായിരുന്നു.
ആദ്യം സ്റ്റേറ്റ് ഇന്റലിജൻസ് റിപ്പോർട്ടിന്റെ (SIR) പേരിലും, പിന്നീട് വോട്ടർ പട്ടികയിൽ നിന്നും പേര് ഒഴിവാക്കി എന്ന വിചിത്രമായ കാരണം പറഞ്ഞുമായിരുന്നു പാസ്പോർട്ട് ഓഫീസ് അപേക്ഷ മടക്കിയത്. അദ്ദേഹത്തിനെതിരെ കേസുകളോ മറ്റ് ക്രിമിനൽ പശ്ചാത്തലങ്ങളോ ഇല്ലാതിരുന്നിട്ടും, സ്വതന്ത്ര പത്രപ്രവർത്തനത്തിന് ഭരണകൂടം ഏർപ്പെടുത്തിയ വിലക്കാണിതെന്ന് കാണിച്ച് രാജ്യവ്യാപകമായി വലിയ വിമർശനം ഉയർന്നിരുന്നു. ഇതിന് പിന്നാലെ മാധ്യമലോകവും വിവിധ രാഷ്ട്രീയ നേതാക്കളും രാജഗോപാലിന് ഐക്യദാർഢ്യവുമായി രംഗത്തെത്തുകയും, രാഷ്ട്രീയ സമ്മർദ്ദം ശക്തമാവുകയും ചെയ്തതോടെയാണ് ഒടുവിൽ അധികൃതർ നിലപാട് മാറ്റിയത്.
Story Summary:
The obstacles in renewing the passport of R. Rajagopal, former editor of The Telegraph, have been cleared after the Kolkata Police submitted a new report. The move comes after widespread criticism and the intervention of various political leaders, including the Chief Minister.
