ന്യൂഡൽഹി: ആഫ്രിക്കൻ രാജ്യങ്ങളിൽ എബോള വൈറസ് രോഗബാധ അതിവേഗം പടരുന്ന പശ്ചാത്തലത്തിൽ മുൻകരുതൽ നടപടികളുമായി കേന്ദ്ര സർക്കാർ. കേന്ദ്ര ആരോഗ്യ സെക്രട്ടറിയുടെ അധ്യക്ഷതയിൽ വിളിച്ചുചേർത്ത അടിയന്തര ഉന്നതതല യോഗത്തിൽ മുഴുവൻ സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും ആരോഗ്യ സെക്രട്ടറിമാർ പങ്കെടുത്തു.(Ebola Virus Outbreak India Issues High Alert And Holds Cabinet Review Meeting)
രോഗവ്യാപനം ഇന്ത്യയിലേക്ക് എത്താതിരിക്കാനുള്ള പ്രതിരോധ തയ്യാറെടുപ്പുകളും അടിയന്തര നടപടികളും യോഗം വിശദമായി ചർച്ച ചെയ്തു. നിലവിൽ ഇന്ത്യയിൽ എബോള കേസുകളൊന്നും റിപ്പോർട്ട് ചെയ്തിട്ടില്ലെന്ന് കേന്ദ്ര ആരോഗ്യ മന്ത്രാലയം ഔദ്യോഗികമായി വ്യക്തമാക്കി.
ആഫ്രിക്കയിലെ നിലവിലെ സാഹചര്യം കണക്കിലെടുത്ത് ലോകാരോഗ്യ സംഘടന അന്താരാഷ്ട്ര ആരോഗ്യ അടിയന്തരാവസ്ഥ പ്രഖ്യാപിച്ചതിന് തൊട്ടുപിന്നാലെയാണ് കേന്ദ്ര സർക്കാരിന്റെ ഈ അടിയന്തര നീക്കം. മുൻകരുതൽ എന്ന നിലയിൽ നിരീക്ഷണ സംവിധാനങ്ങൾ ശക്തമാക്കിയിട്ടുണ്ട്. വിദേശത്തുനിന്ന് എത്തുന്നവരുടെ സ്ക്രീനിങ്, ക്വാറന്റൈൻ, സാമ്പിൾ ടെസ്റ്റിങ് എന്നിവ ഉറപ്പാക്കാനുള്ള വിശദമായ സ്റ്റാൻഡേർഡ് ഓപ്പറേറ്റിങ് നടപടിക്രമങ്ങൾ കേന്ദ്രം സംസ്ഥാനങ്ങൾക്ക് കൈമാറി. എല്ലാ തലങ്ങളിലും അതീവ ജാഗ്രത പുലർത്തണമെന്ന് സംസ്ഥാനങ്ങളോട് കേന്ദ്രം നിർദേശിച്ചിട്ടുണ്ട്.
Story Summary
In response to the Ebola virus outbreak in African nations, the Central Government convened a high-level meeting with health secretaries from all states and union territories to review preparedness. Although no cases have been reported in India, strict screening and quarantine protocols have been activated following the World Health Organization’s declaration of a global health emergency.
