ഡൽഹി: നാല് പതിറ്റാണ്ട് മുമ്പ് ഡൽഹിയിൽ ഭാര്യയെ ക്രൂരമായി കൊലപ്പെടുത്തി ഒളിവിൽ പോയ പ്രതിയെ ഡൽഹി പോലീസ് പിടികൂടി ( Delhi Murder Case 1986 Arrest). ബിഹാർ നളന്ദ സ്വദേശിയായ ചന്ദ്രശേഖർ പ്രസാദ് (82) ആണ് ക്രൈം ബ്രാഞ്ചിന്റെ പിടിയിലായത്. ഡൽഹിയിലെ നംഗ്ലി പൂനയിലുള്ള ഒരു ഫാക്ടറി ഗോഡൗണിൽ വ്യാജ പേരിൽ ഒളിവിൽ കഴിയുകയായിരുന്നു ഇയാൾ. ആധുനിക അന്വേഷണ സംവിധാനങ്ങളോ ഡിജിറ്റൽ രേഖകളോ ഇല്ലാതിരുന്ന കാലത്ത് നടന്ന കൊലപാതകത്തിലെ പ്രതിയെ ശാസ്ത്രീയമായ നീക്കങ്ങളിലൂടെയാണ് പോലീസ് വലയിലാക്കിയത്.
1986 ഒക്ടോബർ 19-നാണ് കേസിനാസ്പദമായ സംഭവം നടന്നത്. കിഴക്കൻ ഡൽഹിയിലെ ഷക്കർപൂരിലെ വസതിയിൽ വെച്ച് ഭാര്യയുടെ സ്വഭാവത്തിൽ സംശയം തോന്നിയ ചന്ദ്രശേഖർ പ്രസാദ്, ഇഷ്ടിക കൊണ്ട് തലയ്ക്കടിച്ചാണ് അവരെ കൊലപ്പെടുത്തിയത്. കൊലപാതകത്തിന് ശേഷം വീട്ടിലെ വേലക്കാരനെ തോക്കിൻമുനയിൽ നിർത്തി ഇയാൾ കൂട്ടുപ്രതികൾക്കൊപ്പം രക്ഷപ്പെടുകയായിരുന്നു. 1987-ൽ കോടതി ഇയാളെ പിടികിട്ടാപ്പുള്ളിയായി പ്രഖ്യാപിച്ചെങ്കിലും പോലീസിന് കണ്ടെത്താനായിരുന്നില്ല.
പ്രതിയെക്കുറിച്ചുള്ള ഫോട്ടോകളോ ആധാർ വിവരങ്ങളോ മൊബൈൽ ട്രാക്കിംഗ് സംവിധാനങ്ങളോ ലഭ്യമല്ലാതിരുന്നത് അന്വേഷണത്തിന് വലിയ വെല്ലുവിളിയായിരുന്നു. എന്നാൽ ക്രൈം ബ്രാഞ്ച് കേസ് പുനഃപരിശോധിക്കുകയും പ്രതിയുടെ മക്കളുടെയും ബന്ധുക്കളുടെയും ഫോൺ നമ്പരുകൾ രഹസ്യമായി നിരീക്ഷിക്കുകയും ചെയ്തു. നളന്ദയിൽ നടത്തിയ അന്വേഷണത്തിൽ ഇയാൾ ജീവിച്ചിരിപ്പുണ്ടെന്നും കുടുംബത്തിലെ ചടങ്ങുകൾക്കായി വരാറുണ്ടെന്നും മനസ്സിലാക്കി. ഒടുവിൽ ഡൽഹിയിലെ ഒരു ഫാക്ടറിയിൽ വെച്ച് ഏപ്രിൽ 22-ന് ഇയാളെ പിടികൂടി. പഞ്ചാബിൽ റിക്ഷാ തൊഴിലാളിയായും ഹരിയാനയിലെ ആശ്രമത്തിലും ഇയാൾ ഒളിവിൽ കഴിഞ്ഞിരുന്നു.
Summary: Delhi Police arrested 82-year-old Chandra Shekhar Prasad, who had been absconding for 40 years after allegedly murdering his wife in 1986. The accused was traced through a combination of human intelligence and technical surveillance of his family members. Prasad, who confessed to the crime, had spent decades living under false identities in various states, including Punjab and Haryana.
