ആന്ധ്രയിൽ ചന്ദ്രബാബു നായിഡു, ഒഡീഷയിൽ മോഹൻ ചരൺ മാജി: ഇന്ന് പുതിയ സർക്കാരുകൾ സത്യപ്രതിജ്ഞ ചെയ്ത് അധികാരമേൽക്കും
Jun 12, 2024, 09:12 IST
ന്യൂഡൽഹി: ഇന്ന് പുതിയ സർക്കാരുകൾ ആന്ധ്രപ്രദേശിലും ഒഡിഷയിലും സത്യപ്രതിജ്ഞ ചെയ്ത് അധികാരമേൽക്കും. ആന്ധ്രയിൽ അധികാരത്തിലേറുന്നത് ടി ഡി പി നേതൃത്വത്തിൽ സഖ്യകക്ഷി സര്‍ക്കാരാണ്. ചന്ദ്രബാബു നായിഡു ആന്ധ്രാപ്രദേശിൽ മുഖ്യമന്ത്രി പദത്തില്‍ എത്തുന്നത് നാലാം തവണയാണ്. സത്യപ്രതിജ്ഞാ ചടങ്ങുകൾ നടക്കുന്നത് രാവിലെ 11.27ന് വിജയവാഡയിലെ ഗണ്ണാവരം വിമാനത്താവളത്തിന് സമീപം കേസരപ്പള്ളി ഐ ടി പാർക്കിലാണ്. ഉപമുഖ്യമന്ത്രിയായി ജനസേന നേതാവ് പവൻ കല്യാൺ എത്തുമെന്നാണ് അഭ്യൂഹങ്ങൾ. 175 അംഗ സഭയിൽ ടി ഡി പിക്ക് 135, ജനസേനക്ക് 21, ബി ജെ പിക്ക് 8 എന്നിങ്ങനെയാണ് അംഗങ്ങൾ. ചന്ദ്ര ബാബു നായിഡു സത്യപ്രതിജ്ഞാ ചടങ്ങിന് മുന്‍മുഖ്യമന്ത്രി ജഗന്‍ മോഹന്‍ റെഡ്ഡിയെയും ക്ഷണിച്ചിട്ടുണ്ട്. ചടങ്ങിൽ പ്രധാനമന്ത്രി നരേന്ദ്ര മോദി, ആഭ്യന്തര മന്ത്രി അമിത് ഷാ, ബി ജെ പി അധ്യക്ഷൻ ജെ.പി. നദ്ദ, വിവിധ സംസ്ഥാനങ്ങളിലെ മുഖ്യമന്ത്രിമാർ, രജനികാന്ത്, ചിരഞ്ജീവി അടക്കമുള്ള സിനിമാതാരങ്ങൾ എന്നിവരും പങ്കെടുക്കുന്നു.