ന്യൂഡൽഹി: ഓവർസീസ് സിറ്റിസൺ ഓഫ് ഇന്ത്യ കാർഡുടമകൾക്കും പൗരത്വത്തിന് അപേക്ഷിക്കുന്നവർക്കും ആശ്വാസമായി പൗരത്വ ചട്ടങ്ങളിൽ ഭേദഗതി വരുത്തി കേന്ദ്ര ആഭ്യന്തര മന്ത്രാലയം. 2026 ഏപ്രിൽ 30-ന് പുറത്തിറക്കിയ ഗസറ്റ് വിജ്ഞാപന പ്രകാരം ഒസിഐ കാർഡ് രജിസ്ട്രേഷൻ, റദ്ദാക്കൽ തുടങ്ങിയ നടപടികൾ ഇനി ഡിജിറ്റൽ പ്ലാറ്റ്ഫോം വഴി നിർവ്വഹിക്കാം.(Centre notifies changes to Citizenship Rules; focus on OCI registration)
ഒസിഐ കാർഡിനായുള്ള അപേക്ഷകളും കാർഡ് ഉപേക്ഷിക്കുന്നതിനുള്ള അപേക്ഷകളും ഇനി മുതൽ https://ociservices.gov.in എന്ന ഔദ്യോഗിക പോർട്ടൽ വഴി ഇലക്ട്രോണിക് രീതിയിൽ സമർപ്പിക്കണം. പഴയ ‘പേപ്പർ – ഇങ്ക്’ രീതിക്ക് പകരമായാണ് ഈ സംവിധാനം. അപേക്ഷകർക്ക് ഇനി മുതൽ ഫിസിക്കൽ കാർഡിന് പകരം ഡിജിറ്റൽ രജിസ്ട്രേഷൻ രേഖയായ ‘ഇ-ഒസിഐ’ തിരഞ്ഞെടുക്കാം. അപേക്ഷകൾ രണ്ട് കോപ്പികൾ സമർപ്പിക്കണമെന്ന നിബന്ധന ഒഴിവാക്കി.
വിദേശത്ത് ജനിക്കുന്ന ഇന്ത്യൻ പൗരന്മാരുടെ കുട്ടികൾക്ക് ഇന്ത്യൻ പാസ്പോർട്ടിനൊപ്പം മറ്റൊരു രാജ്യത്തിന്റെയും പാസ്പോർട്ട് കൈവശം വയ്ക്കാൻ അനുവാദമുണ്ടാകില്ല. ഇക്കാര്യം വ്യക്തമാക്കുന്ന സത്യവാങ്മൂലം ഇന്ത്യൻ കോൺസുലേറ്റിൽ സമർപ്പിക്കണം. ഒസിഐ അപേക്ഷകർക്ക് വേഗത്തിലുള്ള ഇമിഗ്രേഷൻ നടപടികൾക്കായി സമ്മതപത്രം നൽകാം. ഇതിനായി ബയോമെട്രിക് വിവരങ്ങൾ കൈമാറാൻ അപേക്ഷകർ സമ്മതിക്കണം.
ഒസിഐ അല്ലെങ്കിൽ പൗരത്വ അപേക്ഷകൾ നിരസിക്കപ്പെട്ടാൽ, ആ തീരുമാനം എടുത്ത ഉദ്യോഗസ്ഥനേക്കാൾ ഒരു റാങ്ക് ഉയർന്ന ഉദ്യോഗസ്ഥന് അപ്പീൽ നൽകാൻ പുതിയ നിയമം അനുവാദം നൽകുന്നു. തീരുമാനമെടുക്കുന്നതിന് മുൻപ് ബാധിക്കപ്പെട്ട വ്യക്തിക്ക് തന്റെ ഭാഗം വിശദീകരിക്കാനുള്ള അവസരവും ഉറപ്പാക്കിയിട്ടുണ്ട്. ഒസിഐ പദവി ഉപേക്ഷിക്കുകയോ സർക്കാർ അത് റദ്ദാക്കുകയോ ചെയ്താൽ, കൈവശമുള്ള ഫിസിക്കൽ കാർഡ് തൊട്ടടുത്തുള്ള ഇന്ത്യൻ മിഷനിലോ ഫോറിനേഴ്സ് റീജിയണൽ രജിസ്ട്രേഷൻ ഓഫീസിലോ ഏൽപ്പിക്കണം. കാർഡ് തിരികെ നൽകിയില്ലെങ്കിലും സർക്കാരിന് അത് റദ്ദാക്കാൻ അധികാരമുണ്ടാകും.
